Galatia 6

1

2

3

4

5

6

¹Toranoo kara emin! Maneniko lahenda kamahereꞌ esa tao salaꞌ, sona emi fo riꞌ manuu Dula-dale Malalao-malalafuꞌ a kuasa Na, meu dedea moo ni, meniꞌ dale balaroe-balanauꞌ. Boe ma moo faliꞌ ana, ela tuka Manetualain eno matetu Na. Tehuu manea emi ao-ina mara ela bosoꞌ tuda leo ria sala na meu.

²Maneniko lahenda hapu susa, sona emi fekeꞌ ara tulu-fali ni. No ria na emi tao tuka Kristus atoran.

³Maneniko lahenda natutua-nadedema aon nae, ria lena neme lahenda fekeꞌ a mai, sekona te ta leo naꞌ fa, sona ana edi-fule seluꞌ ao-ina na ria.

⁴De, lahenda ra muste esaꞌ ko parisaꞌ aon, hata fo ana tao a. Maneniko hata fo ana tao ni a, malole a, sona neuꞌ ko nameda nan dai so. Bosoꞌ mararaaꞌ ana no lahenda fekeꞌ.

⁵Au afada ae leoꞌ na, nana huu lahenda esaꞌ ko lepaꞌ aon hata fo ana tao a.

⁶Tehuu lahenda fo sipo Manetualain nanori-nafadan, ana muste bati ria hata-nuun fee lahenda fo nanori-nafadan a.

⁷Mafarereneꞌ! Manetualain bubuluꞌ basa-basan. De, bosoꞌ tipu-dai seluꞌ ao-ina heheli mara, ma bosoꞌ tipu-dai neuꞌ Ana. Lahenda sele-kari hata ubeaꞌ nai oka-tine, neuꞌ ko ana hapu faliꞌ buna-boan.

⁸Leoꞌ na boe, maneniko lahenda tao tadaluꞌ tuka ria hihii-nanaun, neuꞌ ko ana hapu faliꞌ soda nalulutuꞌ a. Tehuu maneniko lahenda tao hal malole tuka Dula-dale Malalao-malalafuꞌ a hihii-nanaun, neuꞌ ko ana hapu soda roo-tetu manaetu-manabasa taaꞌ a.

⁹Huu ria na, emi bosoꞌ ao mara mataꞌ a tao hal malole. Naraa no ledo-fain te, ita hapu faliꞌ buna-boa malole, sadi ita tanenete taroo.

¹⁰De, maneniko ita hapu lelaꞌ, sona tao memaꞌ hata malole fee basa lahenda ra, lena-lenaꞌ fee ita toranoo kamahere nara.

¹¹Besaꞌ ia au duiꞌ mata ki susuraꞌ ia, pake dudui selaꞌ mesan.

¹²Mafarereneꞌ! Manatipu-manadaiꞌ ara boe ramahere Yesus Kristus fo riꞌ maten nai ai kake a. Tehuu ara nau raseti emi fo sunat, nana huu ara bii lahenda Yahudi fekeꞌ ara neuꞌ ko ese-rumu si, kalu ara ranori-rafada rae, Manetualain boe sipoꞌ no malole lahenda fo ta tuka atoran sunat. Huu ria na, de ara rasosoropoo reuꞌ lahenda Yahudi ra matan.

¹³Leo mae ara sunat boe, tehuu sira siꞌ ta tuka katemaꞌ atoran agama a fa. Ara nau emi sunat, ela dadi meuꞌ sira lahendan. No ria na, sira partei na soꞌu-fua si.

¹⁴Tehuu au, nau io-oa adaꞌ noi ita Ramatuan Yesus Kristus. Ana mate nai ai kake a, ela namate basa hata tadaluꞌ fo lahenda taon, tuka dae-bafoꞌ a hihii-nanaun. Huu ria na, au ta tao daleꞌ neuꞌ dae-bafoꞌ a hihii-nanaun. Ma dae-bafoꞌ a hihii-nanaun boe ta nai au daleꞌ soꞌ.

¹⁵Sunat do, ta sunat, ria ta penting fa. Tehuu penting nana riꞌ, ita sipo soda bebeuꞌ neme Manetualain mai.

¹⁶Au hule fo Manetualain natudu Ria dale susue-lalain neuꞌ basa lahenda fo tuka au nanori-nafadak, de ara bisa rasoda no tetu-temaꞌ, mole-dame, ma tesatei-tamadaleꞌ, ma ratudu sira dale kasian nara esa no esa. Huu fo tebe-tebe sira dadi reuꞌ Manetualain lahendan so.

¹⁷Tui teaꞌ, te au ta nau tao daleꞌ neuꞌ basa hata ia ra soꞌ. Au ao-ina ka piiꞌ mesan, nana huu au alalau Yesus Kristus.

¹⁸Toranoo kara emin! Au hule fo ita Ramatuan Yesus Kristus natudu dale malole Na neuꞌ emi basa. Noi rii naꞌ so! Soda-moleꞌ neme au mai, Paulus