1Phralale, te varesave manušes arakhľanas paš oda, sar kerel varesavo binos, akor tumen, save san duchovne, pomožinen leske te avel andral oda avri, ale keren oda andre pokora. No, de pozora the pre peste, hoj the tu te na peres andro pokušeňje.
2Ľidžan o pharipena jekh avreskere a oleha doľikerena o zakonos le Kristoskero.
3Bo te peske vareko gondoľinel, hoj hino vareko a ov nane ňiko, korkoro pes klaminel.
4Sako mi dikhel pre peste, so kerel, a paľis pes šaj lašarela korkoro andre peste, ale na anglal aver.
5Bo sako ľidžala peskero pharipen.
6Oda manuš, savo sikľol o lav, mi del oles, ko les sikavel, savore lačhipnastar, so les hin.
7Ma klaminen pes korkoren! Le Devlestar ňiko na asala. Bo savoro, so o manuš sadzinel, oda the kidela upre.
8Bo oda, ko sadzinel avke, hoj te el pre dzeka peskere ťeloske, andral o ťelos kidela upre o kirňipen. Ale oda, ko sadzinel avke, hoj te el pre dzeka le Duchoske, andral o Duchos kidela upre o večno dživipen.
9Choc te na birinas, ma preačhas te kerel o lačhipen, bo avela jekhvar o časos, hoj kidaha upre o uľipen.
10Vašoda, medik amen hin časos, keras o lačhipen savorenge a mek buter le phralenge the le pheňenge andro pačaben.
11Dikhen, save bare pismenenca tumenge me mire vasteha pisinav!
12Ola, save kamen te el pre dzeka le manušenge, tumen ispiden, hoj tumen te den te občhinel (obrezinel), ča vašoda, hoj pre lende te na džan vaš o kerestos le Kristoskero.
13Bo aňi on, save hine občhinde (obrezimen), na doľikeren o zakonos. Ale kamen, hoj pes tumen te den te občhinel vašoda, hoj pes paľis on te lašaren oleha, hoj kerde občhinďipen (e obriezka) pre tumaro ťelos.
14Ňisoha man na kamav te lašarel, ča le kerestoha, pre savo muľa amaro Raj o Ježiš Kristus. O svetos mange hin ole kerestoha ukrižimen a me som ukrižimen le svetoske.
15Bo na džal pal oda, či hin o manuš občhindo abo nane, ale či hino nevo manuš.
16A pre savorende, save pes kamen pal oda te ľikerel, mi avel o smirom the o lačhipen – a the pro Izrael le Devleskero.
17A imar man dureder ňiko te na trapinel, bo me ľidžav pre miro ťelos o jazvi le Kristoskere.
18O lačhipen (milosť) amare Rajeskero le Ježišoskero Kristoskero mi el tumare duchoha, phralale. Amen.
