1Menge kedowa ko te pegpemenal, aw doen kitaen niyo sebad otaw egpemenal meg-inang te medaet, mèpiya aw sikiyo menge otaw ontò egbeyà-beyaan te Espiritu Santo se megtabang kandin, amon ibingen niyo sikandin lomikò diyà te pegpenimanem, meneng keilangan mèpiya se pedowan niyo kandin. Ontò kaw pekeahà amon eked kaw heman keboyo i Satanas.
2Aw megpetebangay kaw, yan egtoloen niyo se punù i Cristo.
3Aw aneng-aneng te otaw eked sikandin keboyo te medaet, yan se lekatan te kedegdagan din pesalo te kededàtan, so neekalan sikandin.
4Meneng mèpiya aw eneng-enengen te teg sebad-sebad otaw se kandin eg-inangen, so aw megpekeaseb sikandin meg-inang te mèpiya, kenà lekat te eg-inangen te doma otaw se luba din, meneng lekat te kandin eg-inangen.
5Yan keilangan eneng-enengen te teg sebad-sebad otaw se kandin eg-inangen.
6Se menge otaw pigtoledaan te kagi te Timanem, yan se keilangan memegay te menge mèpiya diyà te otaw migtoladà kandan.
7Ontò niyo eneng-enengi se kebenalan seini. Eked keekali se Timanem. Pengkey eden se ipanggas te otaw, yan heman se geniyen din.
8Se kelebadan niyan, aw tomolò se otaw te medaet ibeg te pedowan din, domateng diyà kandin se kemetayun wedad temanan. Meneng se otaw egbeyà-beyaan te Espiritu Santo, yan se otaw begayan din te keentayan wedad temanan.
9Mèpiya aw eked kidon lengà meg-inang te mèpiya, so aw domateng se aldaw tapay pinemallì te Timanem, mekinawà tadon se ontong aw eked kidon lengà.
10Yan seini se mèpiya inangen tadon. Gayed tadon inangen se mèpiya diyà te kedita te otaw, aw labi pa diyà te menge kedowa tadon egpemenal.
11Siak si Pablo se simolat te temanan te kagi ko seini diyà kenyo. Ehai niyo se kededakel te pegsolat ko kani.
12Se menge otaw egtoladà te keilangan tomolò kaw te punù ingkeliwat i Moises aw tolien kaw, yan se otaw meibeg te meluba se menge doma dan Judiyo pineokit te pegtolò niyo te ketanem dan sìyan. Eden dan aw pineokit kenyan, eked dan pemilangi te menge doma dan Judiyo, pengkey egpemenal dan ki Jesus nematay doton te kros.
13Sìyan menge otaw egtoladà te keilangan tomolò kaw te punù ingkeliwat i Moises aw tolien kaw, wedà dan man ketolò se kedita te punù sìyan. Meneng ibeg dan tolien kaw amon iduyun se kandan pegkeotawun pineokit te pegtolò niyo kandan.
14Meneng se kanak, eked a keibeg domuyun te kanak pegkeotawun. Sebad olò se iduyun ko, yan se Pengolo tadon si Jesu Cristo. Nematay sikandin doton te kros amon megpelowà kenitadon lekat te salà. Pineokit te pegkematay din, kenà a den egkeallang te medaet ibeg te keneyonan, aw eked a den heman keibeg taking te mekeboyo.
15Pengkey tolien se otaw aw eked, kenà niyan se eglekatan te mèpiya, meneng se mèpiya, yan se kaling pedowan wedad temanan mekinawà tadon.
16Timanem se egpemegay te kelinaw te pedowan aw keido. Ibeg ko, ibegay din iyan diyà te kedita te otaw egpemenal aw tomaking te kebenalan insolat ko seini, pengkey diyà te menge Judiyo aw menge otaw kenà Judiyo.
17Lekat seini, mèpiya aw wedad otaw mengela te siak se sebad sogounun i Jesus, so doen den menge laas diyà te lawa ko lekat te pegpemilang te doma otaw kanak tandà te pegtaking ko ki Jesus.
18Menge kedowa ko, ibeg ko tebangan kaw te Pengolo tadon si Jesu Cristo. Metoman iyan.
