ያይቆባ 2

1

2

3

4

5

¹ታ ኢሻቶ፥ ሂንቴ ኑ ቦንቾ ጎዳ ዬሱስ ኪሪስቶሳ ኣማኒያባ ጊዲኮ፥ ኣሳ ሶምዖ ፄሊዲ ኣሴ ቦንቾፊቴ።

²ሌሚሶስ፥ ዎርቃ ሚጊዶ ኣꬂዲ፥ ሎዖ ማዖ ማዒዳ ዱሬ ኣሲ ሂንቴ ሺቁዋ ዪስ። ቃሲ ጩርቃ ማዖ ማዒዳ ማንቆ ኣሲካ ዪስ።

³ሎዖ ማዖ ማዒዳ ኣዲያ ሂንቴ ኣꬂ ቦንቺዲ፥ «ኔ ሃይሳን ሎዒያ ኦይዲያን ኡታ» ጊዲ፥ ቃሲ ማንቆ ኣዲያ፥ «ኔ ያን ኤቃ ዎይኮ ሃይሳን ታ ቶሁዋ ማታን ሳዓን ኡታ» ጌታ።

⁴ያቲን፥ ሂንቴ፥ ሂንቴ ጊዶን ሻኬቴꬂ ሜꬌይሳታኔ ኢታ ቆፋራ ዴዒያ ዳይናታ ሜላ ጊዴኬቲዬ?

⁵ታ ሲቆ ኢሻቶ፥ ሲዒቴ። ኣማኖን ዱሬ ጊዳና ሜላኔ ባና ሲቄይሳታስ ኢማና ጊዳ ሳሎ ካዎቴꬃ ላታና ሜላ ሃ ሳዓን ዴዒያ ማንቆታ ፆሳይ ዶሪቤኔዬ?

⁶ሺን ሂንቴ ማንቆታ ቶቼታ። ሂንቴና ኡንዔꬄይሳቲ ዱሬታ ጊዶኮናዬ? ሂንቴና ዳይና ሲንꬂ ጎቼይሳቲ ኤንታ ጊዶኮናዬ?

⁷ሂንቴ ፄጌቲዳ ሎዖ ጎዳ ሱንꬃ ጫዬይሳቲ ኤንታ ጊዶኮናዬ?

⁸ሺን ጌሻ ማፃፋን፥ «ኣሴ ኡባ ኔና ኔ ዶሴይሳዳ ዶሳ» ጌቴቲዲ ፃፌቲዳ ፆሳ ካዎቴꬃ ሂጊያ ሂንቴ ፖሊኮ ሎዖ ኦꬄታ።

⁹ሺን ሂንቴ ኣሳ ሶምዖ ፄሊዲ ቦንቺኮ፥ ናጋራ ኦꬄታ ቃሲ ሂጌይ ሂንቴና ሂጌ ሜንꬂዳ ኣሳዳ ፒርዳና።

¹⁰ኦኒካ ሂጌ ኡባፌ ኢሱዋ ሜንꬂዲ፥ ኣቲዳ ኡባ ናጊኮ ኡባ ሜንꬂዳዳ ታይቤቴስ።

¹¹«ላሞፋ» ጊዳ ጎዳይ፥ ቃሲ «ዎꬎፓ» ጊስ። ሺን ኔኒ ላሞና ኣጋዳ ዎꬊዳባ ጊዲኮ፥ ሂጊያ ሜንꬃዳሳ።

¹²ኣይሌቴꬃፌ ኬሲያ ሂጊያ ሲንꬃን ፒርዳ ኤካናው ዴዒያ ኣሳዳ ኦዴቲቴኔ ኦꬂቴ።

¹³ኣሴ ማሮና ኦናካ ፆሳይ ማሮና ፒርዳና። ሺን ማሮቴꬃይ ፒርዳ ፆኔስ።

¹⁴ታ ኢሻቶ፥ ሂንቴፌ ኢሲ ኣሲ ታው ኣማኖይ ዴዔስ ጊዲ፥ ባ ኣማኑዋ ኦሶን ቤሶና ኢፂኮ ኢያ ኣይ ማዳኔ? ኢያ ኣማኖይ ኢያ ኣሻናው ዳንዳዒ?

¹⁵ሌሚሶስ ኢሲ ኢሻይ ዎይኮ ኢሲ ሚቺያ ካሎቲኮኔ ኤንታው ሚያባይ ꬋዪኮ፥

¹⁶ሂንቴፌ ኢሲ ኣሲ ኤንታኮ፥ «ሳሮ ቢቴ! ታማ ካዪቴ! ካሊዲ ሚቴ!» ጊዲ፥ ኮሺያባ ኤንታው ኢሞና ኢፂኮ ኤንታ ኣይ ማዲ?

¹⁷ሄሳ ጊሾ፥ ኦሶይ ባይና ኣማኖይ ባርካ ሃይቂዳይሳ።

¹⁸ሺን ኢሲ ኣሲ፥ «ኔው ኣማኖይ ዴዔስ፤ ቃሲ ታው ኦሶይ ዴዔስ። ኔኒ ኔ ኣማኑዋ ኔ ኦሱዋፔ ሻካዳ ታና ቤሳ፤ ታካ ታ ኣማኑዋ ታ ኦሱዋን ኔና ቤሳና» ጋና።

¹⁹ኔኒ፥ ኢሲ ፆሳይ ዴዔይሳ ኣማናሳ፤ ሄሲ ሎዖ። ቱና ኣያናቲካ ኣማኖሶና፤ ያሻን ኮኮሮሶና።

²⁰ኔኖ ኤያው! ኣማኖይ ኦሶፔ ሻኬቲዲ ማዶናይሳ ኤራናው ኮያይ?

²¹ኑ ኣዋ ኣብራሃሜይ፥ ባ ናዓ ዪሳቃ ያርሾ ቤሳ ቦላ ዎꬂዳ ዎዴ ባ ኦሱዋን ፂሊቤኔ?

²²ኢያ ኣማኖይኔ ኢያ ኦሶይ ኢሲፌ ኦꬂዳይሳ ቤዒኪ? ኢያ ኣማኖይ ኢያ ኦሱዋን ፖሌቲስ።

²³ጌሻ ማፃፋይ፥ «ኣብራሃሜይ ፆሳ ኣማኒስ። ፆሳይ ሄሳ ኢያው ፂሎቴꬂ ኦꬂዲ ታይቢስ» ጊዳይሲ ፖሌቲስ። ቃሲ ኢ ፆሳ ዳቦ ጌቴቲዲ ፄጌቲስ።

²⁴ኣሲ ኣማኖ ፃላላን ጊዶናሺን ኦሶን ፂሌይሳ ቤዓሳ።

²⁵ሄሳዳካ፥ ላይሚያ ራዓባ ኢስራዔሌፔ ኪቴቲዳይሳታ ሞካዳ ሃራ ኦጌራ ኤንታ ሞይዚዳ ዎዴ ባ ኦሱዋን ፂላቤኬ?

²⁶ሼምፖይ ሻኬቲዳ ኣሳቴꬃይ ሃይቆ ጊዴይሳዳ፥ ኦሶይ ሻኬቲዳ ኣማኖይካ ሃይቂዳይሳ።