ያይቆኦቤ ኪኢቶ'' 2

1

2

3

4

5

¹ታ ዒሾንሦ! ታ ሚሾንሦ! ቦንቺንቴ ኑ ጎዳሢ ዬሱስ ኪሪስቶሴ ዒ'ንሢ ጉሙርቃያ ማዔሢሮ ፔቴ''ሢ ባጋሢዳፓ ባሻያ ማሂ ዛጊ ዱሙሞ ሳዛ'' ጌሢፖቴ።

²ጎዖንቴ ላምዖ ዓሲ ዒንሢ ቡኪንቴ ቤዞ ሙኬኔ ኑ ጎዖም፤ ፔቴ'' ዓሢ ኬኤሎ''ይዳ ዎርቄ ዢኢሮ ዓኣሢ ሃሣ ሚዛጲ ማኣዖ ማይንቴ ዖርጎቺ ዓሲ፥ ባጋሢ ቱርጫዺ ኪንቄ ማኣዖ ማይንቴያ ማንቆ ዓሲ ማዔቶ፥

³ዒንሢ፡ ሚዛጶ ዓፒሎ ማይንቴ ዓሢ ቦንቺ፦ «ሃኖ' ኮዦ ቤዜሎይዳ ዴዔ» ጌዒጋፓ ማንቆ ዓሢም ጋዓንቴ፦ «ኔኤኒ ያኣሶ ዔቄ ጋዓንዳኔ፤ ሃንጎ ዒንሢ ዒዛ ሃይካ ሙኪ ቶኮ ዴማ'' ዴዔ» ጋዓንዳኔ።

⁴ዬያይዲፆና ዒንሢ ባኣኮ''ይዳ ዒንሢ ፔቴ''ሢ ሂርኪዲ ባጋሢ ባሼ ማሂ ዱሙሞ ሳዛ'' ጌሣያ፥ ሃሣ ፑርቱሞና ዓሲዳ ዎጋያ ማዒባኣዓዳ?

⁵ታኣኒ ዒንሢ ናሽካ፥ ታኣኮ ዒሾንሦ! ሚሾንሦ! ዋይዙዋቴ፤ ፆኦሲ ዒዛ ጉሙርቂ ጎናሲ ዔኪፆና ዔያታ ዖርጎቺ ማዓንዳጉዲና ዒዛ ናሽካ ዓሶም ሃጊ ማዓንዳ ዎዛ ማሂ ዒንጌ ካኣቱሞ ዔያታ ዻካላንዳጉዲ ሃያ ሳዖይዳ ዓኣ ማንቆ ዓሶ ዒዚ ዶኦሪባኣዓዳ?

⁶ዒንሢ ጋዓንቴ ማንቆ ዓሶ ቦሃኔ፤ ዒንሢ ሜታሳ ዓሶና ሃሣ ዎጎ ቤዞ ዒንሢ ዔኪ ዔኪ ዓኣዻ ዓሳ ዖርጎጮ ዓሶቱዋዓዳ?

⁷ዒንሢ ዛሎ''ና ዔኤሊ''ንታ ቦንቺንቴ ሱ'ንፆ ዒንሢኮ ጫሽካሢ ዔያቶቱዋዓዳ?

⁸ጌኤዦ ማፃኣፖይዳ፦ «ዓሲ ዓዳ'' ኔና ማሂ ናሽኬ» ጌይንቲ ፃኣፒንቴ ፆኦሲኮ ቦንቺንቴ ዎጎ ዒንሢ ኩንሣያ ማዔቶ ኮሺ ዒንሢ ማዻኔ።

⁹ዓሶ ባኣካ'' ዒንሢ ዱማሲሢ ጌሤቶ ጋዓንቴ ጎሜ ዒንሢ ማዻኔ፤ ዎጎኮ ዒንሢ ዑሣ ዓኣዺፆና ዎጋ'' ፔ ቶኦኪና ዒንሢም ዻቢንቶ ዻዋንዳኔ።

¹⁰ዓሲ' ፆኦሲ ዓይሢፆ ቢያሢዳፓ ፔቴ'' ዻባዖ፥ ሃንጎ ዓቴ''ሢ ቢያ ኩንሤያታቶዋ ቢያሢ ዒዚ ዻቤያ ማዓንዳኔ።

¹¹«ማቾ ሃሣ ዓኒ ማዒባኣ ዓሲና ላሂፖ» ጌዔ ጎዳሢ ዬያጉዲ ሃሣ «ዓሲ ዎዺፖ» ጌዔኔ፤ ኔኤኒ ማቾ ሃሣ ዓኒ ማዒባኣ ዓሲና ላሂባኣያ ማዔቶዋ ዓሲ ኔ ዎዼቴ ዎጎ ኔ ዻቤኔ።

¹²ዒንሢ ጌስታኣና ሃሣ ማዻኣና ዎጋ'' ጎሜ ዓይላቶይዳፓ ጉቤ ኬሴ'' ዓሲጉዲ ማዑዋቴ።

¹³ዓይጎሮ ጌዔቶ ፆኦሲኮ ዎጋ'' ዓቶም ጎውዋ ዓሲም ፔኤሮ ዓቶም ጎውዋሴ፤ ያዺ ማዔቶዋ ዓቶም ጌይሢ ዎጌ ባባሻኔ።

¹⁴ታ ዒሾንሦ! ታ ሚሾንሦ! ዓሲ፦ «ዬሱሴ ታ ጉሙርቃኔ» ጋዓዖ፥ ጉሙርቂፆ ኮሺ ማዾና ፔጋሲባኣቶ ዒዛ ዓይጎ ማኣዳ''ንዳይ? ጉሙርቂፃ ዒዛኮ ዒዛ ዻቂሻኒ ዳንዳዓ?

¹⁵ኮኦኪንሢና፡ ማኣዓ ባኣዚ''ና ሙዓ ባኣዚ''ና ባኣ ጌርሲንሢ ሃሣ ጌሮንሢ ማዓ ዓሲ ዒንሢኮ ዓኣንቴ፥

¹⁶ዒንሢ ዔያቶ ናንጎም ኮይሳ ባኮ ዒንጉዋዖ ጉሪ፦ «ኮሺ ዓኣዹዋቴ! ዒንሢም ዖይዾንጎ! ሙዒ ሚሽኩዋቴ!» ጌዔያታቶ ዔያቶ ዓይጎ ማኣዳ''ንዳይ?

¹⁷ዬያሮ ኮሺ ማዾይዳፓ ዱማዼ ዬሱሴ ጉሙርቂሢ ፔ ቶኦኪና ሃይቄያኬ።

¹⁸ጋዓንቴ፦ «ኔኤኒ ታ ዬሱሴ ጉሙርቃኔ ጌዒ ዖቶርቃያታቶ፥ ታ ኮሺ ማዾ ማዻያኬ ጋዓ ዓሲ ዓኣቶ፥ ታኣኒ ዒዛም ኔኤኮ ዬሱሴ ጉሙርቂፆ ኔ ማዾ''ይዳፓ ዱማሲ ታና ቤኤዜ፤ ታኣኒያ ታ ማዾ''ና ዬሱሴ ጉሙርቂፆ ታኣሲ'' ኔና ቤኤዛንዳኔ» ጋዓንዳኔ።

¹⁹ኔኤኒ፦ «ፔቴ'' ፆኦሲ ዓኣኔ ጌዒ ጉሙርቃኔ» ዬይ ኮሺኬ፤ ጋዓንቴ ጉሙርቂፆ ፑርቶ ዓያናኣ ጉጉሙርቃኔ፤ ሃሣ ዒጊጪያ ጎጎጋይቃኔ።

²⁰ኔኤኒ ሃይ ዔኤያሢ! ማዾይዳፓ ዱማዼ ጉሙርቂሢ ዓኣፒ ባኣያ ማዔሢ ኔ ዛጋ?

²¹ኑ ዓዳሢ ዓብራሃሜ ፔ ናኣዚ'' ዪሳኣቄ ዒንጎ ባኮ ሺኢሺ ካኣሽኮ ቤዞይዳ ፆኦሲም ዒንጎ ባኣዚ'' ማዓንዳጉዲ ሺኢሼ ዎዶ''ና፥ ማዾና ፂሊ''ባኣዓዳ?

²²ዬይ ጉሙርቂፃ ማዾና ዎላ'' ማዔሢና ጉሙርቂፃኣ ማዾና ጎናዼሢ ኔ ዛጋ?

²³ጌኤዦ ማፃኣፖይዳ፦ «ዓብራሃሜ ፆኦሲ ጉሙርቄኔ፤ ፆኦሲያ ዒዛ ፔ ዓሲ ማሄኔ» ጌይንቴ ቃኣላ'' ኩሜኔ፤ ዬያይዲፆና ዓብራሃሜ ፆኦሲኮ ላጌ'' ጌይንቴኔ።

²⁴ዓካሪ ዓሲ ፂላ''ሢ ጉሙርቂሢና ሌሊቱዋንቴ ማዾና ዎላ'' ማዔሢ ኔ ዛጋኔ።

²⁵ዓኒ ባኣያ ዞኦዛ ኮኦማ፥ ሬዓባ ጌይንታ ላኣሌላ ዒስራዔኤሌኮ ኪኢቶ'' ዓሶ ፔ ማኣራ ዔኪ ሾኦቺንሢፆና ሃሣ ጊንሣ ሜሌ'' ጎይሢና ፑኒንቲ ዔያታ ቶሊ'' ዴንዳንዳጉዲ ማሂፆና ፔ ማዾ''ና ፂሊ''ባኣዓዳ?

²⁶ሼምፖይዳፓ ዱማዼ ዓሽኪ ሃይቄያታሢጉዲ ማዾይዳፓ ዱማዼ ጉሙርቂሢ ያዼ ሃይቄያኬ።