Jakobo 2

1

2

3

4

5

¹O ŋoc lasitêwaac, amac akêŋ gêwiŋ aêacnêŋ ŋawasi Ŋatau Jesu Kilisi, tec apuc lau ŋam atom, alic samob têtôm tauŋgeŋ.

²Ŋac teŋ togêlôŋ gold ma toŋakwê ŋawasi embe naêsô nêm akac saŋa êna, ma ŋac ŋalêlôm sawa teŋ toŋakwê kômŋa embe êsô êna amboac tonaŋ,

³ma amac matem êndiŋ ŋac toŋakwê ŋawasi e asôm gebe Ôŋgôŋ lêpôŋ ŋajam tonec,” ma asôm êndêŋ ŋac ŋalêlôm sawa gebe “Naôkô ônê” me “mêŋôŋgôŋ masac êsi ockaiŋŋa,”

⁴embe aŋgôm amboac tonaŋ, oc awa lau êkôc atom me. Ma atu mêtôcwaga, taŋ taêŋ gêjam biŋ keso naŋ atom me.

⁵O ŋoc lasitêwaace, aŋô acgom. Anôtô kêjaliŋ êsêac, taŋ lau nomŋa sêlic amboac lau ŋalêlôm sawa naŋ sa, gebe têtu lau tolêlôm sêkêŋ gêwiŋŋa ma sêwê kaiŋ gamêŋ, taŋ eŋ gêjac mata gêdêŋ lau-têntac-gêwiŋ-eŋwaga naŋ.

⁶Ma amac abu ŋac ŋalêlôm sawa. Asa lau sêkôniŋ amac. Asa lau sê amac jaakô mêtôcwaga laŋôŋnêmŋa. Lau tolêlôm goc.

⁷Lau tonaŋ sêsôm biŋ alôb-alôb kêpi ŋaê ŋajam, taŋ Anôtô kêkêŋ gêdêŋ amac naŋ.

⁸Amac embe aŋgôm biŋsu, taŋ aêacnêŋ Kiŋ kêkêŋ gêdêŋ aêac kêtôm teto gêc naŋ, ŋanô êsa, go ŋajam. Biŋsu tau tonec gebe “Têmtac êwiŋ lau wacbaŋ aôm amboac têmtac gêwiŋ taôm.”

⁹Mago amac embe apuc lau ŋam, go aŋgôm sec ma biŋsu êmêtôc amac amboac lau-sêgêli-biŋsuwaga.

¹⁰Ŋac taŋ kêmasaŋ biŋsu samob, mago kêgêli tageŋgeŋ naŋ, kêtôm gêgôm samob popoc.

¹¹Ŋac taŋ kêsôm gebe “Ôŋgôm gêŋ mockaiŋo to mockaiŋŋa atom” naŋ, kêsôm teŋ gêwiŋ gebe “Ônac ŋamalac êndu atom.” Ma aôm embe ôŋgôm mockaiŋ atom, mago embe ônac ŋamalac êndu, naŋ kôgêli biŋsugac.

¹²Amboac tonaŋ asôm nêm biŋ to aŋgôm nêm gêŋ atôm lau, taŋ Anôtô oc êmêtôc êsêac êndaŋguc biŋsu, taŋ kêgaboac êsêac su naŋ.

¹³Ma êndêŋ mêtôc tonaŋ Anôtô taê walô êsêac, taŋ taêŋ walô lau atom naŋ atomanô. Mago ŋac, taŋ taê walô lau naŋ, oc êtêc mêtôc tonaŋ atom.

¹⁴O ŋoc lasitêwaac, ŋac teŋ embe ôsôm gebe “Aê kakêŋ gawiŋ,” mago eŋ ŋac koleŋ atom, oc ênam eŋ sa amboac ondoc. Ênê kêkêŋ gêwiŋ oc ênam eŋ kêsi me masi.

¹⁵Embe lasimi me lasimio teŋ nêŋ ŋakwê masi me sêpô lêna mo kêtôm bêcgeŋŋa

¹⁶ma amacnêm teŋ embe êsôm êndêŋ êsêac gebe “Ana tobiŋmalôgeŋ, asô nêm ŋakwê sa êjandaŋ amac to aniŋ nêm gêŋ,” mago akêŋ gêŋ êôc êsêac ôliŋ tôŋŋa teŋ êndêŋ êsêac atom, oc ênam êsêac sa amboac ondoc.

¹⁷Biŋ takêŋ gêwiŋŋa amboac tonaŋ. Embe takêŋ êwiŋ, mago tanam ŋakoleŋ êwiŋ atom, oc takêŋ gêwiŋ tau êtu gêŋ mêtê ŋaôma.

¹⁸Ma ŋac teŋ embe êsôm gebe “Aôm kôkêŋ gêwiŋ ma aê gajam koleŋ,” go jasôm gebe “Ôtôc nêm kôkêŋ gêwiŋ, taŋ ŋakoleŋ masi naŋ, êndêŋ aê, go aê jatôc ŋoc koleŋ, taŋ êwaka ŋoc kakêŋ gêwiŋ sa naŋ, êndêŋ aôm.”

¹⁹Aôm kôkêŋ gêwiŋ gebe Anôtô tageŋ tec gêmoa me. Ŋajam. Mago ŋalau sec sêkêŋ gêwiŋ biŋ tonaŋ amboac tonaŋgeŋ ma têtêc tauŋ ŋanô.

²⁰O melocma, aôm gobe takêŋ gêwiŋ, taŋ ŋakoleŋ masi naŋ, gêŋ ŋanômêgoc. Aôm gobe aê jawa biŋ tau ŋam sa êndêŋ aôm me.

²¹Aêac abeŋi Abraham amboac ondoc. Gêdêŋ taŋ eŋ kêkêŋ latu Isak kêtu da gêsac altar ŋaô naŋ, Anôtô gêlic eŋ ŋac gêdêŋ kêtu ênê koleŋ tonaŋŋa.

²²Kec, aôm gôlicgac gebe eŋ kêkêŋ gêwiŋ ma gêjam ŋakoleŋ ulu kêtômgeŋ, tec sêjam tauŋ sa, tec nê koleŋ gêjac dabiŋ nê kêkêŋ gêwiŋ su.

²³Ma biŋ, taŋ teto gêc naŋ, kêtu anô gebe “Abraham kêkêŋ gêwiŋ Anôtô, tec Anôtô gêlic eŋ ŋac gêdêŋ” ma sêsam eŋ gebe Anôtônê ŋac.

²⁴Kec, amac alicgac gebe ŋamalac êtu ŋac gêdêŋ êtu nê koleŋŋa, êtu eŋ kêkêŋ gêwiŋŋa tageŋ nec atom.

²⁵Mockaiŋo Rahab kêtôm tonaŋ. Eŋ kêkôc keleŋwaga sa ma kêkêŋ êsêac sêsa intêna teŋ sêja. Tec Anôtô gêlic eŋ awê gêdêŋ kêtu ênê koleŋŋa.

²⁶Aêac ôliŋ embe ŋalau masi, oc êtu mêtê. Ma aêacnêŋ takêŋ gêwiŋ embe ŋakoleŋ masi, oc êtu mêtê amboac tonaŋgeŋ.