JAKOB 2

1

2

3

4

5

¹Phralale mire, sar ola, save pačan andro Ježiš Kristus, andro Raj la slavakero: Ma dikhen pro manuš a ma keren rozďjelis maškar o manuša.

²Bo te avľahas andre tumari khangeri murš somnakuňa angrusaha, urdo andro šukar gada, a te avľahas the čoro murš andro melale gada,

³a dikhľanas pre oda, pre kaste hin ola šukar gada a phenďanas leske: “Tu tuke šukares beš kade,” ale le čoreske phenďanas: “Tu ačh kode,” abo: “Beš tuke kade paš mire pindre,”

⁴či na keren oleha rozďjelis maškar tumende? Či na ačhiľan sudci, save namištes gondoľinen a sudzinen?

⁵Šunen, mire lačhe phralale! Či peske na kidňa o Del avri le čoren andral kada svetos, hoj te ačhen barvale andro pačaben a te prilen o kraľišagos, pal savo o Del diňa lav olenge, save les kamen?

⁶Ale tumen tele dikhľan le čores! Či nane oda ipen o barvale, save pre tumende zoraha ispiden a tumen cirden pal o sudi?

⁷Či nane oda on, save namištes vakeren pre oda lačho nav le Rajeskero, so tumenge o Del diňa?

⁸No, te doľikeren o zakonos le kraľišagoskero, avke sar hin pisimen: “Kameha avre manušes avke sar pes korkores!” Ta akor mištes keren.

⁹Ale te keren rozďjelis maškar o manuša, akor keren binos a o zakonos pre tumende sikavel sar pre ola, save namištes keren.

¹⁰Bo oda, ko doľikerďahas calo zakonos, ale jekh prikazaňje na doľikerďahas, hino vinovato andre savore.

¹¹Se Oda, ko phenďa: “Na kereha lubipen”, the phenďa: “Na murdareha.” No, choc na keres lubipen, ale murdares, na doľikeres o zakonos.

¹²Avke vakeren the keren sar ola, save ena sudzimen pal o zakonos so del o sloboda!

¹³Bo o sudos na ela lačhejileskero ke oda, ko na sas lačhejileskero. No, o lačhejileskeriben ňerinel (zviťazinel) upral o sudos!

¹⁴So hin olestar, phralale mire, sar vareko phenel, hoj les hin o pačaben a nane les o skutki? Či šaj les oda pačaben zachraňinel?

¹⁵A te le phrales abo la pheňa na uľahas so te urel a na uľahas len o dživeseskero chaben,

¹⁶a te lenge vareko tumendar phenďahas: “Džan andro smirom, tačaren tumen a chan,” ale te len na diňanas oda, so kampel le ťeloske, so len hin olestar?

¹⁷Avke the o pačaben, te les nane o skutki, hino mulo.

¹⁸Ale vareko phenela: “Tut hin o pačaben a man hin o skutki.” Sikav mange tiro pačaben bi o skutki a me tuke sikavava miro pačaben andral mire skutki.

¹⁹Tu pačas, hoj hin jekh Del? Mištes keres. The o demona pačan a izdran.

²⁰Kames, hoj tuke te sikavav, tu nagoďaver manušeja, hoj o pačaben bi o skutki hino pre ňisoste?

²¹Či na sas o Abraham, amaro dad, ospravedlňimen le skutkendar, sar anďa peskere čhas le Izak te obetinel pro oltaris?

²²Akor dikhes, hoj o pačaben kerelas jekhetane leskere skutkenca a o skutki keren leskero pačaben dokonalo.

²³A ačhiľa pes, so hin pisimen: “O Abraham pačanďiľa le Devleske a rachinelas pes leske oda vaš o spravodľišagos.” A sas vičimen le Devleskero prijaťeľis.

²⁴Avke akor dikhen, hoj o manuš hin ospravedlňimen the le skutkendar a na ča le pačabnastar.

²⁵Avke sas the paš e lubňi Rachab: Či na sas ospravedlňimen le skutkendar, sar priiľa olen, save sas bičhade, a phenďa, hoj te džan het avre dromeha?

²⁶Bo avke sar o ťelos hino mulo bi o duchos, avke hin mulo the o pačaben bi o skutki.