YAKUUB 2

1

2

3

4

5

¹Iwaḵ pem, dhalku/ mii ki mii ka gwar ’de/ mo me’d jin bu’thkina um moŋgam gwo is mo e Tap̱a Yesus Ḵrisṯẖos bana mo, a’di jin ta Tap̱a gi monyca mo.

²Haali/ waḵki/ wathiŋ kamu/ ta gi ’dolkon to me’d mo dhali hi’th burrinye/ jin bol tiya e ki ’bor i is mo mmoyayu/ e gu’b gi montul is bum mo tani dhali wathiŋ kamu/ jin hatha’ko’d hi’th burrinyem p̱orkin p̱u’dki’d mo si’da/ tani

³dhali um c̱i a’di jin hithi burrinye/ jin bol tiya e ki ’bor ahirdhe/ mo dhali o gwo mo ki: C̱a’bi imahan mo ma gana, dhali um ka yiha/ ki o wathi/ jin hatha’ko’d gwo mo ki: Doshi mmaṯṯaan, walla, C̱a’bi e sho’k pem mmahan mo ma tani

⁴’kona um ki mii to ka ḵwam bwa wakan e bwam is bum mo dhali ta imandwall gwo gom gwonthus kun kulumkina um ibwa mo ’taa?

⁵Dhuyi ’ce mo ma, uma waḵ pem gun enka/ mo. Din ma Arumgimis ki kwany uni gwansan kun hatha’ko’d e mony’cesh mo mmota pa ki pa mo e moŋgam gwo is mo dhali mmota imanḵal mal gi bampa/ gi momis jin okina a’di gwo is gom uni gwansan kun eni a’di mo ’taa?

⁶Hili um this wathi/ jin hatha’ko’d mii mo. A’di diki ta unim pa kun ’cwar umma? A’di diki ta uni gun dir um e mo jin dwallu gwo mo ’taa?

⁷A’di diki ta uni gun wal gwo sora p̱o/ gway yan ki a’di jin taḵu mo jin yuḵu um mo ’taa?

⁸Waḵki/ um ka jiŋ gana/ thimki gwoŋḵan ma maliḵ mo isi me’d Gwo ma Arumgimis kun ’kwarkunu mo ki: /E mini en amannyaḵ c̱a’b pini me’d is piniŋ gana/ mo tani um miin ki ’bore/ mo be.

⁹Hili waḵki/ um mii mii ka gwar ’de/ mo tani um miiki miinthus mo dhali um waḵa gwoŋḵan jin c̱inu mo me’d ’kwani gun dhaŋki gwo mo be.

¹⁰Haali/ a’di yin jin dhuki gwoŋḵan jin c̱inu mo ka ’dan’dap̱ mo hili i/ush me’d mo gom jan ṯal ’de/ mo tani a’di wara’d ki wathi/ jin dina mii i’ba/ mo gom uni ’baar mo be.

¹¹Haali/ a’di jin o gwo mo ki: Dhalku/ c̱al ki mii mii mo ma, a’di si’da/ o gwo doḵ/e mo ki: Dhalka ’kosh ki mii ’kosh mo ma. Waḵki/ /e diki mii miinyc̱al mo hili i’kosha ’kosh mo tani /e waran ka mandhaŋ gwoŋḵan jin c̱inu mo be.

¹²Wakan oyi um gwo mo dhali miiyi to mo wakan me’d uni gwansan gun minu dwall gwo mo ’ko’di gwoŋḵan jin dhu’da dhu ki ’kus mo.

¹³Haali/ gwon dwall a’di dar gi mo jin minu miimii mo e a’di jin diki ṯor momiimii mo. Hili momiimii ta mo jin p̱inu mii e ap̱o/ gwon dwall mo be.

¹⁴Dhali gwo bala nyo/u kata mo, iwaḵ pem mo, waḵki/ wathi/ o gwo ki a’di ta’d gi moŋgam gwo is mo hili idiki mii to mo tani a/mina moŋgam gwo is piti ita a’di is ki me’d mo ’taa?

¹⁵Waḵka kan walla ’bwahan hatha to hi’th ’ko’d mo dhali dar gi tonṯe/ mmoshwa mo tani

¹⁶dhali jan ’de/ ’peni um o uni gwo mo ki: Iiku/ ki moŋḵu’th is mo ma, dhali, ’Bathi is ki ’ba’th mo, dhali, ’Tu’di/ mo, ki dar gi to jin c̱ina um uni mo mmota mo gom buŋgwar is buni mo tani a/dhali mii yan a’di nyo/u ki ’bore/ ’taa?

¹⁷Wakan si’da/ moŋgam gwo is ki is piti mo waḵki/ a’di dinuki mii to mo tani a’di wu’d mo be.

¹⁸Hili wathin ’deŋ kamu/ midi o gwo mo ki: /E tan gi moŋgam gwo is mo dhali aha/ tana gi mii mo. Ṯor aha/ moŋgam gwo is pini ki dar gi miim pini mo ma dhali aha/ ki miim pem mo tani mina ṯor /e moŋgam gwo is pem mo be.

¹⁹/E gami gwo is ka Arumgimis ṯal ’de/ mo. /E miin ki ’bore/ mo be. Me’da rum thus kun nyo/on si’da/ gam gwo is mo dhali cuna is ki thunthur mo.

²⁰/E ona bwa ki to minu ṯora, /e cim p̱us yan, ki moŋgam gwo is ki dar gi mii mo tani a’di ta’da bush ’ko’d mo be.

²¹Ibrahiim jin ta’da babam bana dinuki kar ki mo ma ḵar/e ki mii mo ki a’di c̱i ya/m piti ka Is/hak ap̱owa gwaṯa/ jin miinuwa basa ’cesh mo?

²²/E mishin ki moŋgam gwo is nyaḵ ya ki miim piti mo dhali moŋgam gwo is a’di thimkunu ki mii mo be.

²³Dhali Gwo ma Arumgimis jin ’kwarkunu mo thimki gwo jin onu mo ka: Ibrahiim gamki’da Arumgimis gwo is mo dhali a’di karu a’di ki mo ma ḵar/e mo, dhali a’di yuḵu ka mugu ma Arumgimis mo be.

²⁴/E mishin ki wathi/ a’di karu ka ḵar/e ki mii mo dhali yisa ki moŋgam gwo is a’di ’de/ yisa.

²⁵Dhali ki mii jin nyaḵa’d kan mo tani dinuki kara Rahab si’da/ jin mii miinyc̱al mo, ki mo ma ḵar/e ki mii mo me’d jin bu’thkina a’di igumbway mo dhali ṯu’c uni ki ii ka pije/ ki bwaya kamu/ mowa?

²⁶Haali/ me’d buŋgwar jin dar gi shi/in mo tani a’di wuki’d mo, wakan si’da/ moŋgam gwo is jin dar gi mii mo tani a’di wuki’d mo be.