ያዪቆባ ኪታ 2

1

2

3

4

5

¹ታናዳን ፆሳ ካሊያዋንቶ፥ ሂንቴ ኑ ቦንቾ ጎዳ ዬሱሲ ኪሪስቶሳ ኣማኒ ዴዒዴ፥ ዴሙዋ ፄሊዴ፥ ኣሳ ቦንቾፒቴ።

²ኣዪሲ ጎፔ፥ ዎርቃ ሚጊዱዋ ዎꬂዴ፥ ሎዖ ማዩዋ ማዬዳ ኢቲ ኣሳይ ሂንቴ ሺቁዋ ዮፔ፥ ቃሲ ጩርቃ ማዩዋ ማዬዳ ሂዬሳ ኣሲካ ዮፔ፥

³ሎዖ ማዩዋ ማዬዳ ቢታኒያ ሂንቴ ኣꬂ ቦንቺዴ ኣ፥ «ኔኒ ሃዋን ኡባፔ ሎዒያ ኦይዲያን ኡታ» ጊዴ ቃሲ ሂዬሳ ቢታኒያ፥ «ኔኒ ሂኒና ኤቃሻ፤ ዎይ ሃዋን ታ ጌዲያ ማታን ሳዓን ኡታ» ጎፔ፥

⁴ያቲና ሂንቴ ሂንቴ ጊዶን ሻኮቴꬃ ሜꬊያዋንታኔ ኢታ ቆፋና ዴዒያ ዳናቱዋ ጊዲኪቴዬ?

⁵ታናዳን ፆሳ ካሊያዋንቶ፥ ሲሲቴ፤ ፆሳይ ሃ ሳዓን ዴዒያ ሂዬሳ ኣሳይ ኣማኑዋን ዱሬታናዉኔ ባሬና ሲቂያዋንቶ ኢማና ጌዳ ሳሉዋ ካዉቴꬃ ላታናው ዶሪቤኔዬ?

⁶ሺን ሂንቴ ሂዬሳቱዋ ቶቼዲታ። ዱሬቱ ሂንቴና ቱጋዪያዋንታ ጊዲኪኖዬ? ኡንቱንቱ ሂንቴና ዳናን ሞቲያዋንታ ጊዲኪኖዬ?

⁷ሂንቴው ኢሜቴዳ ሎዖ ሱንꬃ ቦሪያዋንቱ ኡንቱንታ ጊዲኪኖዬ?

⁸ሺን ፆሳ ማፃፋን፥ «ኔ ሾሩዋ ኔ ሁጲያዳን ሲቃ» ጌቴቲዴ ፃፌቴዳ ካቲያ ሂጊያ ሂንቴ ፖሎፔ፥ ሎዖባ ኦꬂታ።

⁹ሺን ሂንቴ ኣሳ ዴሙዋ ፄሊዴ ቦንቾፔ፥ ናጋራ ኦꬂታ፤ ቃሲ ሂጊ ሂንቴ ቦላ፥ ሂጊያ ሜንꬄዳዋንቱዳን ፒርዳና።

¹⁰ኣዪሲ ጎፔ፥ ኦኒኔ ሂጊያ ኡባ ናጊዴ፥ ኢቲኖ ሜንꬂያዋ ጊዶፔ፥ ሄ ኡራይ ሂጊያ ኡባ ሜንꬄ።

¹¹ኣዪሲ ጎፔ፥ «ዎሹሞፓ» ጌዳዌ ቃሲ «ዎꬎፓ» ጌዳ፤ ሺን ኔኒ ዎሹማና ꬋዮፔካ፥ ዎꬌዳዋ ጊዶፔ፥ ሂጊያ ሜንꬃዳ።

¹²ኣሳ ኣይሌቴꬃፔ ኬሲያ ሂጊያን፥ ፒርዳ ኣካና ኣሳቱዋዳን ሃሳዪቴኔ ኡንቱንቱዋዳን ኦꬂቴ።

¹³ኣዪሲ ጎፔ፥ ኣሳ ማሪቤና ኡራ ፆሳይ ማሬናን ፒርዳና፤ ማሮቴꬃይ ፒርዳ ፆኔ።

¹⁴ታናዳን ፆሳ ካሊያዋንቶ፥ ኢቲ ኡራይ ባሬው ኣማኑ ዴዔ ጎፔ፥ ቃሲ ኣ ኣማኑዋ ኣ ኦሱ ኤሪሳና ꬋዮፔ፥ ኣ ኣይ ጎዓኔ? ኣ ኣማኑ ኣ ኣሻናው ዳንዳዪ?

¹⁵ኢቲ ኢሻይ፥ ዎይ ኢቲ ሚቻታ ካሎቶፔ፥ ቃሲ ኡንቱንቶ ኡባ ጋላሲ ሚያባይ ꬋዮፔ፥

¹⁶ሂንቴፔ ኢቲ ኡራይ ኡንቱንታ፥ «ሳሮ ቢቴ። ታማ ሆዒቴ። ካሊዴ ሚቴ» ጊዴ፥ ኡንቱንቶ ኮሺያዋ ኢማና ꬋዮፔ፥ ኡንቱንታ ኣይ ጎዓኔ?

¹⁷ሄዋ ዲራው፥ ኣማኑ ኦሱ ባይናን ባሬካ ዴዖፔ ሃይቄዳዋ።

¹⁸ሺን ኢቲ ኡራይ፥ «ኔው ኣማኑ ዴዔ፤ ቃሲ ታው ኦሱ ዴዔ። ኔኒ ኔ ኣማኑዋ ኔ ኦሱዋፔ ሻካዴ ታና ቤሳ፤ ታኒካ ታ ኣማኑዋ ታ ኦሱዋን ኔና ቤሳና» ጋና።

¹⁹ኔኒ ኢቲ ፆሳይ ዴዒያዋ ኣማናሳ፤ ሄዌ ሎዓ። ፃላሄቱካ ቃሲ ኣማኒኖ፤ ያሻን ኮኮሪኖ።

²⁰ኔኒ ኤያይ! ኣማኑ ኦሱዋፔ ሻኬቲዴ ጎዔናዋ ኤራናው ኮያይ?

²¹ኑ ኣቡ ኣብራሃሞ ባሬ ናዓ ዪሳቃ ያርሺያ ሳዓ ቦላ ዎꬄዳ ዎዴ፥ ባሬ ኦሱዋን ፂሊቤኔ?

²²ኣ ኣማኑኔ ኣ ኦሱ ኢቲፔ ኦꬄዳዋኔ ኣ ኣማኑ ኣ ኦሱዋን ፖሌቴዳዋ ቤዒኪ?

²³ፆሳ ማፃፋይ «ኣብራሃሞ ፆሳ ኣማኔዳ። ፆሳይካ ሄዋ ኣው ፂሎቴꬃን ፓይዴዳ» ጌዳዌ ፖሌቴዳ፤ ቃሲ ፆሳ ዳቦ ጌቴቲዴ ኢ ፄሴቴዳ።

²⁴ኣሳይ ኣማኖ ፃላላና ጊዴናን፥ ኦሱዋን ፂሊያዋ ሂንቴ ቤዒታ።

²⁵ሄዋዳንካ ቃሲ ጫራታ ራዓባ ኪቴቶዋንታ ሞካዴ ሃራ ኦጊያና ኡንቱንታ ሞዪዜዳ ዎዴ፥ ባሬ ኦሱዋን ፂላቤይኬ?

²⁶ኣዪሲ ጎፔ፥ ሼምፑ ሻኬቴዳ ቦላይ ሃዪቄዳዋ ጊዲያዋዳን፥ ሄዋዳንካ ቃሲ ኦሱ ሻኬቴዳ ኣማኑ ሃይቄዳዋ።