1कुम्सो पपाइक्ब कली कुम्सो का। ए रागी ङा मुर नेल्ले, ग्येरशा परमप्रभु कली कुम्सो पने।
2गे परमप्रभु कली “इन नें ठेयब बाक्ब” दे कुम्सो पने। मेको कली रिम्शो कुम्सो पने।
3मिनु परमप्रभु कली “इन गेय ठेयब नु हिंचा ङा बाक्नीमी। इन जोरी सत्रु इन ङोंइती हिंशा, ख्रिंख्रि पा बाप्नीम। मारदे हना इन सक्ति थम ठेयब बाक्ब” देनीन।
4रागी ङा मुर नेल्ल इन ङोंइती बाप्नीम। मेकोपुकीमी इन कली ठेयब सेल्शा, कुम्सो पाइनीम। मिनु इन नें कली ठेयब सेल्शा, कुम्सो पाइनीम। ठेयब सेंदा पा।
5जाक्कीन, परमप्रभु आ गेय कोव़ङीन। मेकोमी मुर आन दातेमी ठेयब नु हिंचा ङा गेय पाप्तु।
6मेकोमी समुन्द्रम सोव़शो लां सेल्तु। मुरपुकी सोव़शो लांम गाक्शा, खोला शोक्साक्म। मेकेर गो मेको आ पर्बम ग्येरसाक्क। प्रस्थान १४:२१-२२; यहोसु ३:१६-१७
7मेकोमी आ सक्तिमी गेना हना यो सासन पाइब। मेकोमी रागी रागी आन कली कोव़ब। मेको कली मटीब ठेयब मलेम्मल। ठेयब सेंदा पा।
8जात जात ङा मुरपुकी, आंइ परमप्रभु कली ठेयब सेलीन। मेको कली ठेयब सेल्शो लोव़ नेंसेक्ल।