1दाऊद आ कुम्सो। परमप्रभु यावे, आं पुंइशो लोव़ नेनीन। “गो शिशी तङल” दे इन दाक्शा मप्रोंइतीकेमी आं पुंइशो लोव़ नेनीन। मिनु इन ठीक पतीकेमी आं लोव़ लेत्तीनी।
2मिनु इन गेय पाइब कली निसाफ पा दोस मगेने। मारदे हना ब्रोंइशोपुकी इन ङोंइती ठीक पाइब सुइ मबाक्नीम। भजन संग्रह १३०:३; अय्युब ९:२; रोमी ३:२०
3आं जोरी सत्रुमी आं कली खेदा पतीमी। आं कली खपीम खोल्शा, साइक्चा चिक्ताक्यीमी। मेकोपुकीमी आं कली बेक्शो मुर आन बाक्तीकेम खोदेंशो पा छिङछिङम बाक्पाइक्तीमी।
4मोपतीके आं थुं लुक्च लत। मिनु गो वाम ग्याम दुम्ती।
5गो साइ ङोंइती ङा नाक्त मिम्नुङ। मिनु इन गेय नेल्ल मिम्ना मिम्न बाक्नुङ। इन गुइम पशो नेल्ल मिम्नुङ। भजन संग्रह ७७:६
भजन संग्रह 143
भजन संग्रह 143:1-5