Ʒare Biri 1:1-18

¹Israe ŋic jaŋe Aigita mâreŋkonec waharâ juhapie jara 2 irec mosa 2 â irec ʒoaŋ gie bapa 1 eha Wofuŋzi Sinai mâreŋ burocnao tutumaŋte qoruc bozeo Mose dâŋ kecʒiŋuc âzâcnewec:

²“Ŋoŋe Israe kikefuŋ sasawa wose qâreŋ ejarenʒepieŋ, ehuc fic sâc â guru sâc mamacfâc‐jeŋic jaŋere ʒâŋe biri forakac irec sâcko ŋic sasawa jaŋere ʒâŋe ronʒepieŋ.

³Aroŋhec ŋohe Israe ŋic jara‐jeŋic 20‐o domarâ fekac, ʒikao rarare sâc eŋgopieŋ jaŋere ʒare rofârezepirec.

⁴Ehame guru sâc irecnec micne bapa ŋoherao ʒuhuckenʒepieŋ.

⁵Ine ŋic kecʒiŋuc jaŋe hâcne ŋohehec ranʒepieŋ: Rubeŋ guruonec Sedeure ŋokâ Elizuru,

⁶Simeoŋ guruonec Zurisadaire ŋokâ Selunie,

⁷Juda guruonec Aminadare ŋokâ Nasoŋ,

⁸Isasare guruonec Zuarare ŋokâ Netanele,

⁹Sebuloŋte guruonec Heloŋte ŋokâ Eliaba,

¹⁰Josefere ŋokâ Eferaim guruonec Amihudure ŋokâ Elisama, â Manase guruonec Pedazure ŋokâ Gamalie,

¹¹Benjamiŋte guruonec Gideonire ŋokâ Abidaŋ,

¹²Daŋte guruonec Amisadaire ŋokâ Ahieʒe,

¹³Ase guruonec Okoraŋte ŋokâ Pagiele,

¹⁴Gadere guruonec Reguelere ŋokâ Elisafa,

¹⁵Naftali guruonec Enaŋte ŋokâ Ahira.”

¹⁶Ŋic i jaŋe hâcne kikefuŋkonec rowosâec‐jopakicne, jaŋe mamac ŋosafâc‐jeŋic jaŋere ɋâricfâc jaŋeraonec micne â Israe ŋic gurune gurune jaŋere fekicnefâc.

¹⁷Eme Mose â Aroŋ jahe ŋic ʒâŋe‐jeŋic mukicne jaŋe rocjopapic.

¹⁸Eme jaŋe mosa 2 irec ʒoaŋ gie bapa 1 ira kikefuŋ sasawa hetumaŋ‐jopambiŋ. Ehuc fic sâc â mamacfâc‐jeŋic jaŋere ʒâŋe biri forawec irec sâcko ŋic sasawa jara‐jeŋic 20‐o domarâ fekac jaŋe wose qâreŋ ejarembiŋ.