Ʒare Biri 13:1-24

¹Wofuŋzi Mose ʒiŋuc âzâcnewec:

²“Israe ŋic Kanaaŋ mâreŋ jarepemu i hone tâcneniŋte ŋic 12 sorec‐jopazemec. Mamacfâc‐jeŋic jaŋere guruonec ŋic micne wâŋ wâŋ bâwosâec‐joparâ sorec‐jopate ranʒepieŋ.”

³Iŋuc mume Mose e Wofuŋzi mutâcnecnewec irec sâcko Israe ŋic micne rowosâec‐joparâ Paraŋ mâreŋ burocnao sorec‐jopame rambiŋ.

⁴Ʒâŋe‐jeŋic ine kecʒiŋuc: Rubeŋte guruonec Ʒakurure ŋokâ Samua.

⁵Simeoŋte guruonec Horire ŋokâ Safati.

⁶Judare guruonec Jefunere ŋokâ Kalebe.

⁷Isasare guruonec Josefere ŋokâ Igali.

⁸Eferaimte guruonec Nuŋte ŋokâ Hosea.

⁹Benjamiŋte guruonec Rafure ŋokâ Palati.

¹⁰Sebuloŋte guruonec Sodire ŋokâ Gadiele.

¹¹Josefere guruonec (Manase guru hâcne) Susire ŋokâ Gadi.

¹²Daŋte guruonec Gemaliere ŋokâ Amiele.

¹³Asere guruonec Mikaere ŋokâ Seturu.

¹⁴Naftalire guruonec Wofisire ŋokâ Nabi.

¹⁵Gadere guruonec Makire ŋokâ Geuele.

¹⁶Mosezi ŋic mâreŋ hone tâcneniŋte sorec‐jopawec jaŋere ʒâŋe ine hâcne. Ehuc Mose e Hoseare ŋokâ Nuŋ ere ʒâŋe Josua muwec.

¹⁷Eme Mose e ŋic i jaŋe Kanaaŋ mâreŋ hone tâcneniŋte dâŋ kecʒiŋuc jazahuc sorec‐jopawec: “Ŋoŋe Negebe mâreŋ râpenao tiki mâreŋ fokac ira feranʒepieŋ.

¹⁸Ehuc mâreŋ irec fuŋne hone tâcnehuc ŋic ira juŋgopieŋ jaŋe sanaŋne me dodocne, bocjaha me afecne i mâmâc hone manac efârenʒepieŋ.

¹⁹Erâ mâreŋ juŋgopieŋ i biaŋne me sâqocne, â hae‐jeŋic i jaba sawa me basanaŋ‐jopahuc bakicne,

²⁰erâ mâreŋ i guec sâkohec me mâreŋ kereŋne, erâ jâckâte‐ticne fokac me mâcne, i wâc mâmâc hone‐fârenʒepieŋ. Ŋoŋe hâbi hârohec eniŋ, ehuc mâreŋ irec fâri wiac gâcne bawarenʒepieŋ.” Rambiŋ i waiŋ fâri fufua dameŋko hâcne.

²¹Eme jaŋe ferâ, Ziŋ mâreŋ burocnaonec raku Rehoboo, Hamati hae mendâŋko ira forakac mâreŋ i hone tâcnembiŋ.

²²Ehame Anakare ɋâricfâc Ahimaŋ, Sesai â Talamai jaŋe hâcne ira jumbiŋ. (Heboroŋ hae bambiŋ irec faicnao jara 7 tarame Aigita mâreŋko Zoaŋ hae bakicne.)

²³Eme jaŋe Esikola wâneŋko fisirâ waiŋ qaŋeŋne moc makenehec bâtâcnerâ ŋic jajaheczi reŋkepire risie warembiŋ. Ehuc wâc nemuja â jâchândâŋ gâcne i mâmâc bawarembiŋ.

²⁴Eme ŋic jaŋe waiŋ qaŋeŋne makenehec ira bâtâcnembiŋte hae mâreŋ irec ʒâŋe Esikola wâneŋ mumbiŋ.