MUKÉTÍMÙ 13:1-24

¹Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀:

²Á dɛitɛ Isidɑyɛɛribɛ botí miɛkɛ bɛkotibɑɑbɛ̀, bɑ́ kùù botí miɛkɛ onìtì òmɑ́ɑ̀ òmɑ́ɑ̀ kɛ́ bɛ̀ tɔ̃ nkɛ̀ bɛ̀ɛ pɑɑtɛ́ Kɑnnɑhɑ̃ɑ̃ kó dihɛì n yɛ̃ n yóó di duɔ́ ndì.

³Kɛ̀ Mɔyiisii tũnnɛ ti Yiɛ̀ nKuyie nhò nɑ̀kɛ́ tì dɛndɛ Pɑdɑnni kó dikpɑ́ɑ̀ miɛkɛ, kɛ́dɛi Isidɑyɛɛribɛ miɛkɛ bɛkotibɑɑbɛ̀ kɛ́tɔ̃.

⁴Ntɛ ò do tɔ̃ mbɛ̀ kó yɛyètɛ̀: Dubɛnni kó kubotí kou do tú Sɑkuu birɛ Sɑmmuɑ.

⁵Kɛ̀ Simmɛɔ̃ɔ̃ kó kubotí kou ntú Ɔɔri birɛ Sɑfɑti.

⁶Kɛ̀ Sudɑɑ kó kubotí kou ntú Yefundee birɛ Kɑdɛbu.

⁷Kɛ̀ Isɑkɑɑ kó kubotí kou ntú Sosɛfu birɛ Ikɑdi.

⁸Kɛ̀ Efɑdɑimmu kó kubotí kou ntú Nunni birɛ Oseɑ.

⁹Kɛ̀ Bɛnsɑmɛɛ kó kubotí kou ntú Dɑfuu birɛ Pɑditi.

¹⁰Kɛ̀ Sɑbunɔɔ kó kubotí kou ntú Sodi birɛ Kɑdiyɛɛdi.

¹¹Kɛ̀ Sosɛfu kó kubotí nɛ̀ Mɑnɑnsee kɔku kɛ̀ bɛ kou ntú Susi birɛ Kɑdi.

¹²Kɛ̀ Dɑnni kó kubotí kou ntú Kemɑdi birɛ Amiyɛɛdi.

¹³Kɛ̀ Asɛɛ kó kubotí kou ntú Mikɑyɛɛri birɛ Sefudi.

¹⁴Kɛ̀ Nɛfutɑdii kó kubotí kou ntú Fofisi birɛ Nɑbi.

¹⁵Kɛ̀ Kɑdi kó kubotí kou ntú Mɑkii birɛ Ketuyɛɛdi.

¹⁶Bɛnìtìbɛ̀ Mɔyiisi do tɔ̃ mbɛ̀ kɛ̀ bɛ̀ bo pɑɑtɛ́ dihɛì bɛ yètɛ̀ nyɛ mɛmmɛ. Kɛ̀ Mɔyiisii yú Nunni birɛ Oseɑ kɛ dɔ̀ Sosuwee.

¹⁷Kɛ̀ Mɔyiisii bɛ̀ tɔ̃ nkɛ́ bɛ̀ nɑ̀kɛ́ kɛ dɔ̀: Di kétɛ́ kɛ́tɑ Kɑnnɑhɑ̃ɑ̃ tenkɛ̀ kubɑkù cɑ̃̀nku bíɛ́kɛ̀, kɛ́pɛ̃ɛ̃tɛ́ kɛ́dekɛ yɛtɑ̃rɛ̀ ĩ́nkɛ̀ kó yɛhɛkɛ̀,

¹⁸kɛ́pɑɑtɛ́ dihɛì mɛsɑ̀ɑ̀ nkɛ́yɑ̀ dì dòmmɛ̀ nɛ̀ bɛnìtìbɛ̀ bɛ̀ɛ̀ bo di miɛkɛ bɛ̀ dòmmɛ̀, kɛ̀ bɛ̀ kpeńnì yoo bɛ̀ cĩ̀ĩnnì kɛ̀ bɛ̀ sũ yoo bɛ̀ í sũ.

¹⁹Dí pɑɑtɛ́ bɛ tenkɛ̀ dòmmɛ̀, kɛ̀ kɛ̀ wenni yoo kɛ̀ sĩ̀, nɛ̀ bɛ̀ bo yɛ̀ɛ̀ ɛkɛ̀ dòmmɛ̀, kɛ̀ iduotí yɛ̀ fitɛ́ yoo yɛ̀ feío,

²⁰kɛ́yɑ̀ kɛ̀ kɛtenkɛ̀ nɑɑti yoo kɛ̀ sɛɛ, kɛ̀ titieti bo yoo ti kpɑ, yɑ́úkùnnɛnɛ̀ di kɔ̃̀ntì. Dí ntɔní bɛ tenkɛ̀ kó yɛtebɛ. Dɛ̀ do sɔ̃́ ndɛtie mbɛ̀ tu dɛ̀ fínyĩ̀ dɛ bɛ ketiyɛ̀ biì dìì mɔ̀nnì ndi.

²¹Kɛ̀ bɛ̀ɛ kɔtɛ kɛ́pɑɑtɛ́ Kɑnnɑhɑ̃ɑ̃ tenkɛ̀, kɛ́túótɛ́ Sinni kpɑ́ɑ̀ kɛ́ntɔ kɛ́tuɔkɛnɛ̀ Deɔbu Amɑti tenkɛ̀ mɑ̀nku,

²²kɛ́kɔtɛ kɛ́tɑ dihɛì kubɑkù cɑ̃̀nku bíɛ́kɛ̀ Ebunɔɔ kó diberímberi, Anɑkii yɑɑ̀bí tidɑdiɛtì, Aimɑnni nɛ̀ Sesɑii nɛ̀ Tɑdimɑii bɛ kó dikɑrì. Ebunɔɔ kó dihɛì mɑɑ́ kɛ̀ dɛ̀ mmɔkɛ yɛbie nyɛ̀yiekɛ̀ ndi kɛ̀ bɛ̀ nɛ́ nɑ kɛ́mɑɑ́ Esibiti kpɛri bɛ̀ tu dì Tɑniisi.

²³Kɛ̀ bɛ̀ɛ tuɔkɛ Ɛsikɔɔdi biriku kɛ́kɔ̃ṹ fínyĩ̀ kó yɛbɛ tɛyùtɛ̀ kɛ́sɛu nkudɔú kɛ́buutɛ́ bɛnìtìbɛ̀ bɛ̀dɛ́bɛ̀, nɛ̀ yɛtebɛ tɛyɛ̀ bɛ̀ tu yɛ̀ kèdènɑ́tì nɛ̀ fìkíè kó yɛbɛ.

²⁴Kɛ̀ bɛ̀ɛ yú dɛborɛ̀ kɛ dɔ̀ Ɛsikɔɔdi biriku, dɛ̀ɛ̀ tu siyuu biriku, bɛ̀ dɛ̀ kɔ̃ũ mɛ̀ɛ̀ kpɛ́í yɛtebɛ kó siyuu.