A Niluluk 13:1-24

¹Ma ra Luluai i ga tata pire Moses, dari:

²Una tulue ta umana tutana, upi diat a matoto lua ta ra gunan Kanaan, nina iau ga tul tar ia pire ra tarai Israel; avat a tulue tikai ta ra lavur vuna tarai tikatikai, da pilak pa ka nina dia lualua pire ra tarai.

³Ma Moses i ga tulue diat maro ra bil Paran da ra vartuluai kai ra Luluai; ma diat par a umana lualua pire ra tarai Israel.

⁴Ma go ia ra iang i diat: Samua natu i Sakur ta ra vuna tarai Ruben,

⁵Sapat natu i Kori ta ra vuna tarai Simeon,

⁶Kaleb natu i Iepune ta ra vuna tarai Iuda,

⁷Igal natu i Iosep ta ra vuna tarai Isakar,

⁸Osea natu i Nun ta ra vuna tarai Epraim,

⁹Palti natu i Rapu ta ra vuna tarai Beniamin,

¹⁰Gadiel natu i Sodi ta ra vuna tarai Sebulun,

¹¹Gadi natu i Susi ta ra vuna tarai Iosep (a vuna tarai Manase nam),

¹²Amiel natu i Gemali ta ra vuna tarai Dan,

¹³Setur natu i Mikael ta ra vuna tarai Aser,

¹⁴Nakbi natu i Vopsi ta ra vuna tarai Naptali,

¹⁵Geuel natu i Maki ta ra vuna tarai Gad.

¹⁶Go ia ra iang i diat nina Moses i tulue diat upi diat a matoto lua ta ra gunan. Ma Moses i ga vaiang Osea natu i Nun ba Iosua.

¹⁷Ma Moses i ga tulue diat upi diat a matoto lua ta ra gunan Kanaan ma i ga biti ta diat: Avat a vana ta ra nga urama Negeb, ma avat a tutua ta ra lualuana;

¹⁸ma avat a gire ra gunan, ba i dave; ma ra tarai bula, ba dia dekdek ba pa dia dekdek, ba dia paupau ka ba dia mangoro;

¹⁹ma ra gunan nina dia ki tana, ba i boina ba i kaina, ma kadia lavur pia na pal ba dia tur vakuku ka ba di ga liplip bat diat;

²⁰ma ra pia, ba i boina ba i kaina, ba ta davai tana ba pata. Ma avat a tur padikat ma avat a kap ta umana vuai ra gunan. Nam ra e, a turpai ra minatuka ure ra vuai na vain.

²¹Damana dia ga vana urama, ma dia ga matoto ta ra gunan papa ra bil Sin ma tuk uro Rekob, ta ra langun Kamat.

²²Ma dia ga vana urama Negeb ma dia ga bolo vanavana Kebron ma Akiman, Sesai ma Talmai nina ra tarai Anak dia ki tana. (Di ga vatut Kebron lavurua na kilala lua ta ra pia na pal Soan ta ra gunan Aigipto.)

²³Ma dia ga tadav ra male Eskol, ma dia ga mut vue ra ingar i ra davai na vain nina ra kopono kurene tana, ma a urua dir ga kip ia; ma dia ga kap ra vuai na goava ma ra vuai na lovo bula.

²⁴Di ga vatang nam ra pakana ba ra male Eskol (“Kurene”), ure ra kura vain nina ra tarai Israel dia ga mut vue abara.