Lampah 13:1-24

¹BOEIPA loh Moses te a voek tih,

²“Namah kah hlang rhoek te tueih lamtah Kanaan kho te yaam uh saeh. Te te Israel ca rhoek taengah ka paek coeng. A napa rhoek koca lamloh hlang pakhat, hlang pakhat tah amamih kah lamkah khoboei la boeih tueih,” a ti nah.

³Te dongah BOEIPA kah olka bangla Moses loh amih te Paran khosoek lamloh a tueih. Amih tah Israel ca rhoek kah a lu hlang boeih ni.

⁴Te rhoek khuiah a ming la Reuben koca lamloh kah Zakkuur capa Shammua,

⁵Simeon koca lamloh Khori capa Shaphat,

⁶Judah koca lamloh Jephunneh capa Kaleb,

⁷Issakhar koca lamloh Joseph capa Igal,

⁸Ephraim koca lamloh Nun capa Hosea,

⁹Benjamin koca lamloh Raphu capa Palti,

¹⁰Zebulun koca lamloh Sodi capa Gaddi,

¹¹Joseph koca lamloh Manasseh koca, Susi capa Gaddiel,

¹²Dan koca lamloh Gemalli capa Ammiel,

¹³Asher koca lamloh Michael capa Sethur,

¹⁴Naphtali koca lamloh Vophsi capa Nahbi,

¹⁵Gad koca lamloh Makhi capa Geuel,

¹⁶Te kah hlang rhoek te Moses loh khohmuen yaam ham a tueih. Te vaengah Moses loh Nun capa Hosea te Joshua la a khue.

¹⁷Moses loh amih te Kanaan khohmuen yaam ham a tueih. Te vaengah amih te tuithim lamloh pahoi cet uh lamtah tlang la yoeng uh.

¹⁸Khohmuen neh a khuikah khosa pilnam te so uh. Aka tlungluen nim, aka kha nim, yol nim, yet nim?

¹⁹A khuiah kho a sak te mebang khohmuen nim? Then nim, thae nim? A khuiah kho a sak khopuei rhoek te rhaehhmuen nen nim, hmuencak nen nim?

²⁰Diklai te ul nim, caep nim? A khuiah thing om nim, om pawt nim? Moem uh thae lamtah khohmuen thaihtae te hang khuen uh. A tue khaw misur thaihcuek tue coeng ni,” a ti nah.

²¹Te dongah cet uh tih khohmuen te Zin khosoek lamloh Lebo Khamath Rehob duela a yaam uh.

²²Te dongah tuithim longah cet uh tih Hebron la pawk uh. Te vaengah Anakim cahlah Sheshai Ahiman neh Talmai ana om coeng. Hebron he Egypt Zoan mikhmuh ah kum rhih khuiah a thoh.

²³Eshkol soklong la a pawk uh vaengah thingluei te a saih uh tih misur a su pakhat te panit loh cunghloeng dongah a koh. Te vaengah tale thaih neh thaibu thaih te a khuen uh.

²⁴Israel ca rhoek loh te lamkah thaihsu te a haih uh kawng dongah te hmuen te Eshkol soklong a sui.