Yosuwe 22:16-30

¹⁶«Ntɛ tɔ kəloŋkanɛ ka afum a Kanu Kəpɔŋ fəp ŋaloku: Ake dɛtaŋi ləŋəs dɔ nəyɔ Kanu ka aka Yisrayel tantɛ-ɛ? Nəŋyeŋk kəlukus dim da Kanu Kəpɔŋ darəŋ, nəŋcəmbər aŋgbip ntɛ tɔŋsɔŋɛ nəyeŋkər Kanu Kəpɔŋ domp mɔkɔ mɔ!

¹⁷Kiciya nkɛ sənayɔ nde Peyɔr mɔ kənayɔnɛ mes mɛlɛc. Haŋ mɔkɔ antasɔkəsnɛ fɛ. Kiciya kosu kənasɔŋɛ kəloŋkanɛ ka afum ɔn arom ŋɛlɛc.

¹⁸Kɔ nəna nəŋyeŋk mɔkɔ kəlukus dim da Kanu Kəpɔŋ darəŋ! Kɔ nəyeŋkər mɔkɔ Kanu Kəpɔŋ domp-ɛ, alna aka Yisrayel fəp ŋɔ endewurər mɛtɛlɛ mamɔkɔ.

¹⁹Kɔ nəŋcɛm-cɛmnɛ a antɔf ŋonu ŋɔsɔk fɛ-ɛ, nəcepər oŋ antɔf nŋɛ ŋɔyɔnɛ ŋa Kanu Kəpɔŋ mɔ, nde Kanu Kəpɔŋ kəyi mɔ, tɛm tatɔkɔ nəndɛ su dacɔ, mba ta nəyeŋkər Kanu Kəpɔŋ domp, ta nəyeŋkər su səbomp kəcərɛ fɔ nəcəmbər aŋgbip ŋɔlɔma nŋɛ ŋɔntɔyɔnɛ ŋa Kanu Kəpɔŋ Kanu kosu mɔ.

²⁰Ntɛ Akaŋ wan ka Sera ɛnalukus kəcəmɛ Kanu darəŋ teta ca cəkɔ Kanu Kəpɔŋ kənamɔnɛ kəlɛk mɔ, aka Yisrayel fəp ŋɔ Kanu Kəpɔŋ kənawurər mɛtɛlɛ mɔn. Nəŋcərɛ ti bel-bel a bafɔ Akaŋ sona ɛnafinɛ kiciya kaŋkɔ.»

²¹Kɔ afum a Ruben, Kadu, kɔ aka kusuŋka dacɔ ka Manase ŋaloku abɛ akiriŋ aka cor ca Yisrayel:

²²«Kanu ka canu, Kanu Kəpɔŋ! Kanu ka canu, Kanu Kəpɔŋ, Ki kəŋcərɛ ti! Aka Yisrayel ŋandecərɛ ti! Kɔ pəyɔnɛ fɔ kətɔ-cəŋkəl kɔ kəyeŋkər domp kɔ-ɛ, ta pədeyac su dɔsɔk dadɔkɔ!

²³Kɔ pəyɔnɛ fɔ səŋcəmbər aŋgbip ŋosu kədegbɛkəl Kanu Kəpɔŋ səde səc-loŋnɛ di yoloŋnɛ yɔcɔf-ɛ, kɔ pəyɔnɛ fɛ ti yoloŋnɛ ya mɛgbɛn, kɔ pəyɔnɛ fɔ səlompəs aŋgbip ŋaŋɛ səde səc-loŋnɛ di yoloŋnɛ ya pəforu Kanu Kəpɔŋ-ɛ, awa, Kanu Kəpɔŋ kəndegbɛkərɛ ti!

²⁴Bafɔ itɔ teyi! Səlompəs aŋgbip ŋaŋɛ bawo sənesɛ ta alna awut anu ŋade ŋac-yif akosu fɔ: ‹Ak' eyi nu dacɔ kɔ Kanu Kəpɔŋ, Kanu ka Yisrayel-ɛ?

²⁵Kanu Kəpɔŋ kəmboc kələŋcər Yurdɛn nəna kɔ səna dacɔ, aRuben, kɔ aKadu, ali tes teyi f' on sɔ dacɔ kɔ Kanu Kəpɔŋ!› Teta awut anu tendesɔŋɛ ta awut asu ŋaŋnesɛ sɔ Kanu Kəpɔŋ-ɛ.

²⁶Itɔ səŋcɛm-cɛmnɛ fɔ: Səmarɛnɛ səcəmbər aŋgbip, bafɔ səde səc-loŋnɛ di de,

²⁷mba ŋeyi su dacɔ kɔ nəna pəmɔ sede. Ŋeyi sɔ awut asu dacɔ kɔ awut anu ŋac-loŋnɛ yoloŋnɛ ya yɔcɔf kɔ yoloŋnɛ ya pəforu Kanu Kəpɔŋ fɔr yɔn kiriŋ, ntɛ tɔŋsɔŋɛ ta ŋade ŋac-loku dɔsɔk dɔlɔma a tɔlɔm o tɔlɔm teyi fɛ awut asu dacɔ kɔ Kanu Kəpɔŋ!

²⁸Kɔ səloku: ‹Kɔ ŋande ŋaloku su tantɛ, kɔ pəyɔ fɛ ti ŋaloku awut asu ti-ɛ, moloku mamɛ mɔ səndeluksɛ ŋa: «Nəgbətnɛ teyi ta aŋgbip ŋa Kanu Kəpɔŋ nŋɛ atem asu ŋanacəmbər mɔ, bafɔ teta yoloŋnɛ yɔcɔf kɔ yoloŋnɛ yɔlɔma tɔ anacəmbərɛ ŋi de, mba ŋɔyɔnɛ sede su dacɔ kɔ nəna ŋɛc-cɛm-cɛməs su.»›

²⁹Səmbɔlɛnɛ kəyeŋkər Kanu Kəpɔŋ domp, kɔ kəyi ta səŋcəmɛ ki darəŋ mɔkɔ-ɛ, kəcəmbər kosu aŋgbip ŋa kəloŋnɛ yoloŋnɛ yɔcɔf, yoloŋnɛ ya mɛgbɛn, kɔ yoloŋnɛ ya pəforu, səfɔloŋnɛ kəfo kəcuru Kanu Kəpɔŋ Kanu kosu, ta pəyɔnɛ fɔ nde aŋgbaŋcan ŋa Kanu Kəpɔŋ-ɛ!»

³⁰Ntɛ wəloŋnɛ Pinahas, kɔ abɛ akiriŋ a kəloŋkanɛ kɔ abeki a cor ca Yisrayel aŋɛ ŋanayi di ŋane moloku mamɔkɔ afum a Ruben, Kadu, kɔ kusuŋka dacɔ ka Manase ŋanaloku mɔ, kɔ moloku mamɔkɔ mɔmbɔt ŋa.