Yosuwe 15:6-32

⁶Kələŋcər kəŋan kəpɛrnɛ kəca ka Bɛt-Hokəla, kəcepər ntende kəca kəmeriya haŋ Bɛt-Araba mɔ, kɔ kəpɛrnɛ haŋ nde Tasar ta Bohan wan ka Ruben.

⁷Kəyɛfɛ di kələŋcər kəŋkɔ Debir kəcepər ta mɔrɔ dacɔ nde aranta ŋa Akɔr, kəkafələr kəca kəmeriya ntende Kilkal, nde pəntɛfərɛnɛ kɔ Kəpɛ ka Adumim kəca kətɔt ka kəŋgbɔkɔ. Kəc-cepər domun da En-Sɛmɛs kəsək, kəkɔ kəfutər nde En-Rokɛl.

⁸Kələŋcər kənapɛrnɛ kəyɛfɛ ka nde aranta ŋa Bɛn-Hinɔm haŋ pətəmbələr pa aka Yebus kəca kətɔt, nde pəyɔnɛ Yerusalɛm mɔ, kəpɛrnɛ haŋ nde telempan pa tɔrɔ mpɛ peyi aranta ŋa Hinɔm kəca nkɛ dec dɛŋkalɛ mɔ, kɔ dəkələpsər da aranta ŋa aka Refay nde mɔrɔ dacɔ ntende kəca kəmeriya.

⁹Kəyɛfɛ ka nde dətelempan, kɔ kələŋcər kənder kəkafələr nde domun dɛŋc-pɛ mɔ nde Nɛftowa, kɔ kəsolnɛ sədare sa tɔrɔ ta Efrɔŋ, kɔ kəŋkafələr sɔ Bala nde pəyɔnɛ Kiriyat-Yeyarim mɔ.

¹⁰Ntɛ kəŋkafələr Bala ntende dec dɛŋkalɛ mɔ, kəca ka nde tɔrɔ ta Seyir, kɔ kəŋcepər pətəmbələr pa Tɔrɔ ta Yeyarim ntende kəca kəmeriya, it' ɔyɔnɛ Kɛsalɔŋ, kətor Bɛt-Sɛmɛs, kɔ kəcepərɛnɛ Timna.

¹¹Kənarnɛ pətəmbələr pa Ekəron kəca kəmeriya, kəkafələr ntende dec dɛŋkalɛ mɔ nde Sikərɔŋ, kəcepərɛnɛ nde Tɔrɔ ta Bala, kəkɔ kənarnɛ Yabanel, kɔ kəcɔŋnɛ kəfutər nde dəkəba.

¹²Cələŋcər ca ntende dec dɛŋkalɛ mɔ cənayɔnɛ Kəba Kəpɔŋ kɔ agbɛp ŋa ki. Tantɛ tɔ aka kusuŋka ka Yuda ŋanayɔ cələŋcər ca antɔf ŋaŋan dəcor cor.

¹³K'asɔŋ Kalebi wan ka Yefune dare da Kiriyat Arba aka kusuŋka ka Yuda dacɔ, pəmɔ tɔkɔ Kanu Kəpɔŋ kənaloku ti Yosuwe mɔ. Kiriyat-Arba kəyɔnɛ Hebərɔŋ. Arba ɛnayɔnɛ papa wəka aka Anak.

¹⁴Kɔ Kalebi ɛmbaŋər atɔf ŋa aka Anak aŋɛ maas dəndo: Sesay, Ahiman, kɔ Talmay, ŋa ŋanayɔnɛ afum a Anak.

¹⁵Kɛyɛfɛ dəndo kɔ Kalebi ɛmpɛrnɛ kəkɔ-wɛkərnɛ afum a dare da Debir. Debir dɔ aŋc-we cɔkɔ-cɔkɔ Kiriyat-Sefer.

¹⁶Kɔ Kalebi oloku: «Məna nwɛ məŋsut aka Kiriyat-Sefer məbaŋər ŋa di mɔ, isɔŋ' əm Aksa wan kem wəran mənɛŋcɛ.»

¹⁷Otniyel wan ka Kenas wɛŋc ka Kalebi ɛmbaŋər ŋa di. Kɔ Kalebi ɔsɔŋ kɔ wan kɔn wəran Aksa kənɛŋcɛ.

¹⁸Ntɛ Aksa ender mɔ, k'ɛmpɛnɛ wos abəkəc kəkɔ-wer ka kas Kalebi abɔf. Aksa ɔŋkɔtor sɔfale kəroŋ, kɔ kas Kalebi eyif kɔ: «Ake məfaŋ-ɛ?»

¹⁹Kɔ wan wəran nwɛ oloku kas fɔ: «Mətolan' em, bawo məsɔŋ' im antɔf nde kəca kətɔt, məpoc' em sɔ antɔf nde domun dɛŋc-pɛ mɔ. Kɔ Kalebi ɔsɔŋ kɔ antɔf ŋɔtɔt nŋɛ domun dɛŋc-pɛ dəntɔf nde dətɔrɔ kɔ nde daranta mɔ.

²⁰Ntɔf yayɔkɔ yɔ kusuŋka ka aka Yuda ŋanasɔtɔ kəyer ka kɛ disrɛ dəcor dəcor.

²¹Sədare nsɛ səyi dəkələpsər da antɔf ŋa kusuŋka ka Yuda mɔ ntende kələŋcər ka Edɔm nde Nɛkɛf kəca kətɔt ntende dec dɛmpɛ mɔ. Si sənayɔnɛ: Kabəcel, Eder, Yakur,

²²Kina, Dimona, Adada,

²³Kɛdɛs, Hacɔr, Yitnan,

²⁴Sif, Telem, Beyalɔt,

²⁵Hacɔr-Hadata, Keriyɔt-Hɛcəron nkɛ kəyɔnɛ Hacɔr mɔ,

²⁶Amam, Sema, Molada,

²⁷Hasar-Kada, Hesbon, Bɛt-Palet,

²⁸Hasar-Suhal, Berseba, Bisiyoteya,

²⁹Bala, Hiyim, Hɛsɛm,

³⁰Ɛltoladu, Kesil, Horma,

³¹Cikəlak, Madamana, Saŋsana,

³²Lebayot, Silhim, Ayin kɔ Rimon. Kəbɛrɛnɛ ka sədare sasɔkɔ fəp səkɔ sədare wəco mɛrəŋ kɔ camət-maŋkəlɛ (29) kɔ sədare səfɛt sa si.