Yogikoneatimogetunkanirira Joan 12

1

2

3

4

5

6

7

8

9

10

11

12

13

14

15

16

17

18

19

20

21

22

¹Impogini nonei okoneatanake enoku paniro tsinane ponataka poreatsiriku. Yogari kashiri agatikakeri, aikiro amatsaitakari 12 impokiro.

²Irorori ariomonkimataketyo gatamonkiamatakatyo, nerotyo okaemavavagetaketyo kara okatsimonkitakera.

³Impogini nonei ikoneatanake aikiro enoku paniro kempanaroniro inkiraavageteratyo kara imaranerikatyo. Otimake 7 igito, ogari itsei onake 10. Patiropage igito matsaitavagetaka.

⁴Ariotsantsarikatyo irishi kara impo ipotegishitanakerotyo yogivarigantagetakarira 1/3 impokiropage iparigagetakera kipatsiku. Irirori ipokapaake yaratinkagutapaakero tsinane panikyarira omechotakotake irogavakemparira otyomiani.

⁵Impo omechotake inti otomi. Impogini nonei inoshikunkani yamanunkanira enoku ipirinitapaake inampinaku Tasorintsi, irirotari pegankichanerira igoveenkariegitesanorira maganiro matsigenkaegi garatyo itimumati pugatsatakemparineririra.

⁶Ogari tsinane oshiganaka oatakera osarigagitetapaakera yovetsikakenerorira Tasorintsi ontimantakemparira ompakenkanira osekatakempara kigonkero agavagetanakempa 1,260 kutagiteri.

⁷Impogini noneiri Migeri intiegiri isaankariite yomanatavakagaigaka itentaigakarira kempanaroniro intiegiri igamagarinite.

⁸Yogari kempanaroniro intiegiri igamagarinite tera iragaveaige impugatantaiganakempara, nerotyo yoneagantaigunkanirira

⁹iokaigunkanira kipatsiku. Yoga kempanaroniro irirotari maranke pairaninirira kantakanirira yamatavinaigiri maganiro matsigenkaegi. Onti ipaita Kamagarini aikiro Satanashi.

¹⁰Impogini nokemi onianunkani enoku omaraenkarika kara okantagani: “Maika mataka yogavisaakotantake Tasorintsi. Maika oneinkani yagaveasanotanakera irirori ipegasanotakara Igoveenkariegitesanorira maganiro. Ario ikañota yoga Kirishito, irirotari ikogakagake okyasanokyara impegakempara Koveenkarisanorira, maika itentakari ipegasanotakara Igoveenkariegite maganiro, yoneagunkanitari parikoti yoga kantakanirira yaratinkimotakeri Tasorintsi ikamantakotapiniigirira apigematsaegine ikogavetakatari inkañotagantaigakerimera.

¹¹Kantankicha iriroegi onti yagaveantaigakari iriraa Ovisha kamaventaigakeririra. Aikiro onti yagaveantaigakari Iriniane Tasorintsi ikenkitsaigirira, tera impinkaigeronika inkamaigakera, ontityo ipimantaiganakaro igamane.

¹²¡Maikari maika shineiganakempakario viroegi timaigatsirira enoku! Kantankicha viroegi timaigatsirira kipatsiku ontiri omaraaniku nia ¡maikanirorotyo pantsipereavageigake!, iatashiigakempitari kamagarini. Tera maani inkisavagetempa kara ineaketari gara samani yatsipereakagaigimpi, panikyatari inkisashitakenkani irirori.”

¹³Yogari kempanaroniro ineakera yoneagunkanira enoku iokunkanira kipatsiku ipatimamatanakerotyo tsinane mechotakotankitsirira.

¹⁴Kantankicha irorori opunkani piteti oshivanki omarapagerika kañotavagetaka ishivanki imarane pakitsa kameti aranakera oshigapitsatanakerira anta ontimakera osarigagitetapaakera, onakera kara 42 kashiri. Omirinka ompakenkani oseka.

¹⁵Yogari kempanaroniro ogatyo ikenake yogikonteamatanaketyo ivaganteku omaraarikatyo nia amanakeromera tsinane,

¹⁶kantankicha okirankanake kipatsi oniagaatavakero ganiri amiro.

¹⁷Ogatyo ikenake ikisashitasanotanakaro tsinane iatashitantaigakaririra iromanaigakemparira oyashikiiganakerira kematsaigiririra Tasorintsi, aikiro kenkitsatakoigiririra Jeso tsatagasanoigirorira yogotagantagetirira.