1Tsa mloo thib seny thoz lobee, lee thib ngot kuu nabix wiz taxal thib bestid, ne lee mbee nax xann nii ngot, ne lee yek ngot ndob thib koron kuu nke tsiibchop mbel kuu nzib lobee choy.
2Lee ngota ndo nak zhiinn, ne mbetsyath ngot mbez ngot nlaaz leettsoo ngot, tak mera gal zhiinn ngot.
3Ne mloo tedib seny thoz lobee, lee thib mbeldoo kuu nane na kuu ndob gaz yek ne ndob tsii kach, ne thibga koron ndob kadta yek maa.
4Ne kon kol maa mdobyu maa thib part lo tson part re mbel kuu nzib lobee, ne mlobi maa re mbel lo yezlyu. Lee mbeldooʼa mndo lo ngot kuu mer gal zhiinn, tsa kuth mbeldoo zhiinn ngot, or kuu gal zhiinn ngot.
5Ne lee ngot ngop thib mbet bi, kuu gak zha kuu nabee lo re men kuu nzi dita lo yezlyu kon thib bar yiib. Ne mbyiib xgann ngot lo ngot ne ndano zha xgann ngot mndob lo Diox ta ndob Diox nabee Diox;
6ne lee ngot mzhonn nda par net yubiz, ta mdexkwaa Diox yo ngot, ne tya taa Diox kuu wu ngot thib mil chop gayoo tson gal wiz.
7Tsaraa ngoo thib zhoo yibaa, tsa lee mandad Miguel kon tedib net mandad mbyo kon mbeldoo ne kon re mandad mbeldoo,
8per mtsowt mbeldoo gan lo zhoo; ne mndaat raa zha diiz gabet mbeldoo kon re mandad mbeldoo yibaa.
9Ne mloo zha mbeldoo yibaa, mbeldoo kuu nak mbeel gol ndala kuu le Mahotsa ne Maxuuy, kuu nkedi reta men kuu nzi lo yezlyu. Ne mlobi zha Mahotsa kon re mandad Mahotsa lo yezlyu.
10Tsa mbin na thib bos kuu kwathoz nex kuu mroo yibaa, kuu nzhab: Lee nal mzina yalnaban kuu thitanax, yalney ne tyemp kuu lee Diox nabee, ne yalnabee chaan Crist, tak mlooʼa zha mbeldoo, kuu tse ne yaal nkeki re wetsaa ne re btanaa lo Diox.
11Ne mtsow re zha gan lo mbeldoo kon ren Mbak zhiil, ne kon xkiiz Diox kuu ndaa re zha kwent; tak mzebt re zha gagath zha, sinke thib mloo zha yek zha gath zha.
12Yibaa ne reta goo kuu nzo leen yibaa, naley bloo goo leettsoo goo. ¡Per kwathoz nalatt rid re goo kuu nzi lo yezlyu ne nzo leen nitdoo! Tak lee Maxuuy mlaʼa lo goo lo yezlyu, kon dib yalnayii chaan Maxuuy, tak neʼa Maxuuy telutta tyemp nap Maxuuy.
13Ne leettsa mne mbeldoo lee mbeldoo mla lo yu, tsa mreke mbeldoo dits ngot kuu ngop mbet biʼa.
14Per lee ngota mkayaa chop xiil mti kuu kwathoz naro, tsa tak lazbi ngot ya ngot yubiz, tith lo mbeldoo, ne tya taa zha kuu wu ngot tson liin narol.
15Tsa lee mbeldoo mloo nit roo, tsa gake thib yoo kuu gwe ngot;
16per lee yezlyu mtsow ayud ngot, ne mzhaal yezlyu ne mdab yezlyu nit kuu mroo roo mbeldoo.
17Ne kona lee mbeldoo masraa mnayii mne ngot, tsa ngwa mbeldoo mbyo mbeldoo kon reta zha kuu nak zha raz ngot, re zha kuu nzhon diiz lo xkiiz Diox, ne nali ndo ndaa kwent chaan Jesucrist.
18Ne lee mbeldoo mndeli lo gux roo nitdoo.
