Text copied!
CopyCompare
Uhohug na Namaratu gafu te Hesus Kristu - Nagmatakar

Nagmatakar 12

Help us?
Click on verse(s) to share them!
1A ta kabalinan na kumanen a nakipaita hapa teyak ya pakaitan ta langit. Itta ya babbay nga pake makatulang ya barawasi na ta kuman na bilag, a kuman na imatayuk ta hulan. A ta ulu na en a itta ya sangngat na nga sebitwan ta mafulu duwa na bitwan,
2ammi tanagay na maganak, a “Agi, agi,” kunna ta takit na paganak na.
3A sangaw takwan ha ya nakipaita ta langit, te itta ya pake dappug na lamag nga darag, ammi pitu ya ulu na ikid na mafulu ya tarkud na, a itta hapa ya kuman na sangngat na ari ta tagtakday ulu na.
4Nesi-bat na ya iffut na en a netapal na ya pagkatallu na bitwan kiden ta langit, a nagkahunnak kid ta lutak. A sangaw nagtayuk ya lamagen ta atubang na babbayen maganak, te kanan na mina ya anak na en am imuhet.
5A naganak ya babbayen ta lalaki nga mekari magturay ta ngamin kiden nasyon ikid na tolay ta lutakin ta masikan na turay. Ammi nelogot ya lamagen, te napatullu ya anak na babbayen ta Namaratu ta agyan na agtuttudan na en.
6A nakabilag hapa ya babbayen addet ta lugar nga kawanan na totolay, te magtagu ta lugaren nga dana neparan na Namaratu tentu, petta mataronan addet ta maribu dwagatut annamafulu araw.
7A sangaw nagbattak hapa ya gubat ta langit, te sa nagtatapil ig Migel ikid na sakā anghel na kiden ta lamagen. Tumubbat hapa nagtapil ya lamagen ikid na anitu na kiden teg Migel,
8ammi naabak kid hala, a awan na ta lugar da ta langit,
9a yen ta naazi kid, a nehunnak kid ta lutak. Ya nagngagan ta lamag a intu hala ya ulagen ta palungu araw nga nagngagan hapa ta Dyablo ikid na Satanas, te intu ya mangayayyaw ta ngamin tolay ta paglelehutin. A yen ta sa nehunnak kid ta lutak, sa ikid na anitu na kiden.
10A sangaw nadangag ku hapa ya masikan maguhohug ta langit: “Nangabak na ya pakapangwa na Namaratu ewan, a magturay naman na ya pinili na en Hesus Kristu, te naabak na ya nangidardarum ta kabagis tam kiden, a nehunnak na ta lutak, te kanayun nedardarum na kid ta atubang na Namaratu ta araw pase hiklam.
11Ammi ikid ya nangabak tentu gafu ta daga na Kalneru en ikid na pangibosag da ta uhohug na en. A aweda kinenga ya angat da ta pangibosag da tentu, te nesagapil da la tentu maski addet ta pasi da.
12“Magayayat kanan mantu, ikamuy nga magyan ta langit. Ammi kakallak kanan nga magyan ta lutak ikid na bebay, te dumagut na tekamuy ya Dyablo Satanas, a mefulot ya poray na, te amu na ta assang na ya araw na,” kunna.
13A gafu ta nehunnak ya lamagen ta lutak a dinagdag na ya babbayen naganak ta lalaki, a nangipurdad hapa ya lamagen ta danum ta kuman na karayan, petta mealud mina malimat ya babbayen ta danumen. Ammi inuffunan na lutak ya babbayen, te nagbangrak, a lumitap ya danumen ta umag na lutak. A inatadan na Namaratu ya babbayen ta payak na ta kuman na dappug na hukkaw, petta makaubar addet ta takday lugar nga kawanan na totolay nga neparan na Namaratu tentu, petta awena masi-ged na lamagen, a yen ya nangtaronan na Namaratu tentu abat ta tallu darun a gadwa.
17A gafu ta pake nagporay ya lamagen ta babbayen, a nangunungan na ya kadwan kiden anak na petta makitapil tekid, te ikid ya mangurug ta ibar na Namaratu ikid na mangipasikkal ta damag ni Hesus.
18A nagtayuk ya lamagen ta pingit na bebay.