Apocalipsis 12

1

2

3

4

5

6

7

8

9

10

11

12

13

14

15

16

17

18

19

20

21

22

¹Jare uyecuaa ara re chepɨacañɨ ete jese vae. Jae co penti cuña. Jemimonde guarasɨ co, jare uyemboɨ oĩ yasɨ iárambo, jare icorona doce yasɨtata reta co.

²Ipurúa jare imembɨ oata ma oĩ. Jãse imembɨrasɨ ramo.

³Jare uyecuaa ye ara re ĩru chepɨacañɨ ete jese vae. Jae co penti maemɨmba guasu pɨ̃ta vae. Siete co iñãca reta jare diez jãti reta. Jare penti penti iñãca re güɨnoi corona.

⁴Jare juguai uipɨsɨ mbɨte seri yasɨtata reta omombo ɨvɨ cotɨ. Jare jocua maemɨmba guasu uyemboɨ cuña imembɨta vae jovai, opa vaerã tẽi jou imembɨ, oa ma yave.

⁵Jare cuña imembɨ cuimbae co. Jocua imembɨ cuimbae oyocuita opaete ɨvɨ pegua reta ipopoca fierro pegua pe. Jare cuña imembɨ uyereraaca Tumpa pe Tumpa iguapɨa oĩ vae pe.

⁶Jare jocua cuña osi ñana cotɨ. Echa'ã joco pe Tumpa umɨcuatɨ̃ro chupe jendarã. Jare amocue vae umɨngaru jocua cuña mil doscientos sesenta ara.

⁷Jare uyeyapo penti ñerãro ara pe. Miguel jare ángel chupe uyeyocui vae reta uñerãro jocua maemɨmba guasu ndive. Jare maemɨmba guasu jare ángel chupe uyeyocui vae reta uñerãro jae reta ndive.

⁸Ẽrei jae reta ipuere'ã umɨamɨri Miguel jare ángel chupe uyeyocui vae reta. Jare maemɨmba guasu uyemomboca ara güi. Mbaetɨ ye ma jendarã ara pe. Jocua maemɨmba guasu jocua mboi aracae Eva umɨngueta vae co. Jae co aña guasu. Jae co Satanás. Jae umbɨtavɨ opaete ɨvɨ pegua reta. Ẽrei jae uyemomboca ma ara güi ɨvɨ pe, jare ángel chupe uyeyocui vae reta vi uyemomboca ara güi jae ndive.

¹⁰Jare ayandu ñee ara pe. Iñeeãta reve jei: —Ou ma uvãe Tumpa upurumbɨasa vaerã. Echa'ã jae güɨnoi opaete mbaepuere. Ou ma uvãe Tumpa oporoyocui vaerã Cristo imbaepuere rupi. Echa'ã Satanás umbɨjecose yanderɨvɨ reta Tumpa jovai ara rupi jare pɨ̃tu rupi. Ẽrei añave uyemomboca ara güi —jei—.

¹¹Jare yanderɨvɨ reta umɨamɨri Satanás Ovecha-raɨ jugüɨ rupi jare Tumpa iñee ĩru vae reta pe umɨmbeu vae rupi. Uicuaa reta umanota co, ẽrei uquɨye'ã umano vaerã —jei—.

¹²Jáeramo piyerovia pe reta ara pe pico vae. Ẽrei ɨvɨ pe pico vae reta jare ɨ guasu pe pico vae reta piporara eteta co. Echa'ã aña guasu ugüeyɨ ma pepɨte pe. Jare jae pochɨ ete. Echa'ã jae uicuaa michi peguaño ma ipuere uparavɨquɨ —jei.

¹³Jare jocua maemɨmba guasu uicuaa yave uyemomboca ma co ɨvɨ pe, uaɨcuemoña jocua cuña imembɨ cuimbae vae.

¹⁴Ẽrei uñemee cuña pe mocui güɨraquee tuicha vae ipepo, ipuere vaerã uveve ñana pe uñemi vaerã jocua mboi güi. Jare joco pe amocue vae umɨngaru mbapɨ año y medio.

¹⁵Jare jocua mboi omombo jeta ɨ iyuru güi. Uipota tẽi jocua ɨporu uepitɨ vaerã cuña jare güɨraa vaerã uyuca.

¹⁶Ẽrei ɨvɨ etei omborɨ cuña. Echa'ã ɨvɨ uyepea, yande yaipea yandeyuru vae rami, jare ɨporu jocua maemɨmba guasu iyuru güi oẽ vae opa ucañɨ ɨvɨ uyepea vae pe.

¹⁷Jayave maemɨmba guasu pochɨ cuña pe, jare oo uñerãro cuña imembɨ ndeiño umano vae reta ndive. Echa'ã jae reta uyapo Tumpa iporoyocui reta jare umɨmbeu Jesús regua.