Kon na Krin 12

1

2

3

4

5

6

7

8

9

10

11

12

13

14

15

16

17

18

19

20

21

22

¹Dan wan bigi marki ben de fu si na heimel. A ben de wan uma di ben weri a son leki krosi, èn a munkenki ben de ondro en futu. Tapu en ede a ben abi wan kownu-ati san ben meki fu twarfu stari.

²A uma ben abi bere, èn a ten ben kisi fu meki a pikin. A ben e bari fu a pen san a ben abi fu meki a pikin.

³Dan wan tra marki ben de fu si na heimel. A ben de wan bun bigi kaiman san ben redi leki faya. A ben abi seibi ede nanga tin tutu. Tapu iniwan fu den seibi ede a ben weri wan kownu-ati.

⁴Nanga a tere fu en a hari wan fu ala dri stari san de na heimel puru, dan a fringi den go na grontapu. Dan a bigi kaiman go tnapu fesi a frow fu a kan nyan a pikin te a gebore.

⁵A frow meki wan manpikin. A manpikin disi o tiri ala sma di no sabi Gado nanga wan isri tiki. Ma a srefi momenti dati den puru a pikin disi na a frow, tyari en go na a kownusturu fu Gado.

⁶Dan a frow lon go ini a dreisabana na wan presi san Gado ben meki klari gi en. Drape den bo sorgu gi en twarfu hondro nanga siksitenti (1.260) dei langa.

⁷Dan feti broko na ini heimel. Mikael nanga den engel fu en ben feti nanga a bigi kaiman. A bigi kaiman nanga den takruyeye fu en ben feti baka nanga en.

⁸Ma a bigi kaiman no ben man wini a feti. Dan en nanga den takruyeye fu en no ben abi primisi moro fu tan na heimel.

⁹Den fringi a bun bigi kaiman puru na heimel go na grontapu. Na en na a sneki di ben de sensi fosten. Na en den e kari didibri nanga Satan. Na en e kori ala den sma na grontapu.

¹⁰Dan mi yere wan tranga sten na ini heimel taki: Now wi Gado o ferlusu den sma fu En. A o teki En makti èn rigeri leki kownu. Now a Wan di A poti fu tron Kownu, o sori tak' A abi makti. Bika den fringi a wan go na grontapu di ben go dei nanga neti fu krutu den brada nanga sisa fu unu na fesi wi Gado.

¹¹Den brada nanga sisa fu unu wini en, fu di a Lam ben gi En brudu fu den ede, èn fu di den ferteri trawan a wortu fu Gado. Den no ben frede fu lasi den libi fu dati.

¹²Dat' meki heimel nanga ala sma di e libi na ini mus prisiri. Ma grontapu nanga a se de fu sari. Bika didibri kon na grontapu nanga bigi atibron, fu di a sabi tak' a no abi furu ten moro.

¹³Di a bigi kaiman si tak' den fringi en go na grontapu, a bigin fu lon baka a frow di ben meki a manpikin.

¹⁴Ma den gi a frow den tu frei fu a bigi gonini, fu a frei go na ini a dreisabana na a presi pe a sneki no ben man fasi en. Drape den bo sorgu gi en dri nanga afu yari langa.

¹⁵Dan a sneki spiti watra puru ini en mofo leki wan liba fu srepi a frow gwe.

¹⁶Ma a drei gron kon yepi a frow. A priti opo, swari a liba san a bigi kaiman ben puru ini en mofo.

¹⁷Ne a bigi kaiman ati bron srefsrefi tapu a frow. A drai go feti nanga den tra pikin fu en, di e du san Gado taki èn di e tan hori na den sani san Yesus ben leri.

¹⁸Dan a bigi kaiman go tnapu na a syoro fu a se.