1Ka cagꞌagꞌa laa, jaꞌa kèdhi tadha èci dhu kapai titu kèna cèu ètu dedha-liru, dhu dhèu dhae rèdhi mèka ca tèka sa. Tadha ne, nuka sèmi: bhèni ca dhèu dhu ngiꞌu na pahutu dènge madha lodꞌo. Hèru jꞌajꞌi mi era pacapa haga na. Nèngu pake solo dhèu aae, dhu dènge hua-hètu canguru dua bua.
2Bhèni ne dènge babia, ka dhu tangi, te abhu le tadha ho nara iisi.
3Kacaꞌa laa, jaꞌa kèdhi hari tadha èci dhu kapai aae, dhu cèu ètu dedha-liru kahèi. Tadha ne, nuka mege naga mea ciꞌu dhu kapai. Kètu na pidhu, aa tadhu na canguru bua. Ètu kètu na sèra, dhu pake solo dhèu aae.
4Na pake rèu lai na, ho saku eele hua-hètu ca kaboko nèti tèlu kaboko ètu dedha-liru. Hèia na core hua-hètu se asa rai-haha. Ka laꞌe titu ètu madha bhèni ne, na tatae toke bhèni ne nara iisi. Te na neo dhèle dènge ka ana nèti bhèni ne.
5Hèia bhèni ne nara iisi Ana Mone ca dhèu. Te ngaa ana pajuu Ama Lamatua ca dhèu nèti sorga, mai parame nare Ana ne, ka rai nèti asa Lamatua, sèna ka nèdꞌu paredha sama-sama dènge Ama Lamatua ètu sorga. Te bèli-camèdꞌa Ana ne paredha suku aaꞌi-aaꞌi ètu rai-haha dènge koasa dhu kapai risi eele.
6Te ngaa bhèni ne rai laꞌe asa dꞌara mamoo èci dhu Lamatua tao tèke hia ne. Pe ra ladhe-leru ne, toke tèlu tèu dènge ca èta, (nuka, 1.260 ca riho dua ngasu èna nguru lodꞌo).
7Èle èèna ka, jꞌajꞌi pamusu aae ètu sorga. Ana pajuu Ama Lamatua nèti sorga, dènge kapala musu ra Mikael, labꞌa mege naga dènge ana pajuu na.
8Ka Mikael si segi mege naga ne dènge ana pajuu na sèra. Èle ka, ra kai mege naga ne dènge ana pajuu na sèra, ho pea ia ka ètu sorga.
9Nèti èèna ka, ra bhabhoo eele si nèti sorga, hèia core si asa rai-haha. Mege naga ne, nuka dhèu aae nidhu, dhu ngara na ‘Lamatua nidhu’. Karèi nèti uru ka, nèngu neꞌe ka dhu leko-monya dhèu ho adꞌu-ue sasala.
10Hèia jaꞌa tadèngi hari lii dhu mèdhu èci nèti dedha-liru, peka na, “Uru èèna, mege naga neꞌe ka dhu titu dhii-dhii ètu madha Ama Lamatua. Sasabꞌa nèngu, nuka pèci sasala asa aꞌari èdhi, dhèu parcaya sèra. Na loe boe galaa si mèu-mèda. Te ngaa limuri ne, ra bhabhoo eele ne nèti sorga. De limuri ne aaꞌi-aaꞌi tesa le. Te dꞌai lodꞌo na kèna, sèna ka Lamatua hia mamuri mi dhèu rai-haha. Limuri ne Lamatua nèdꞌu le paredha dènge koasa Na dhu kapai. Aa Na dedꞌe le Kristus, Dhèu dhu hagꞌe nare ho jꞌajꞌi Dhèu Aae dhu paredha suku aaꞌi-aaꞌi ra.
11Aꞌari èdhi sèra ka dhu segi mege naga èèna, dhu uru èèna pèci sasala mi rèngu, lula raa Ana Kalèbho dhu suti sèna ka saku eele sasala-sasigo ra. Aꞌari èdhi segi ne kahèi, lula rèngu bani lole Lii Holo-Nori Lamatua. Masi ka dhèu nasa ho neo pamadhe si, te ngaa ra bege boe.
12De aaꞌi-aaꞌi dhu mamuri ètu sorga hudꞌi karejꞌe-karae ku! Te ngaa aaꞌi-aaꞌi dhu mamuri ètu rai-haha hudꞌi bori paꞌèra ku, lula mamadhe-mamopo oe bèbhe mai lèke miu. Dhèu aae nidhu puru mai le ètu talora aae miu. Nèngu nasa titu kèna, lula neꞌa, na, lodꞌo ho nèngu tao bhabhelu, oe èle kèna!”
13Ropa mege naga neꞌa, na, nèngu dhu ra core le asa rai-haha, ka laꞌe dènge tenge bhèni dhu nara iisi Ana èèna, ho neo pajꞌèra ne.
14Te ngaa ra hia bhèni ne èla dua, nuka sèmi èla manea luji, sèna ka na lela laꞌe luꞌu asa dꞌara mamoo dhu pakajꞌèu nèti mege naga. Ètu era nèi, ra ladhe-leru ne, toke tèlu tèu dènge ca èta.
15Ropa nèdhi nare sèmi èèna, hèia mege naga ne sabhuu èi, nuka sèmi èi aae lala, ho neo hae nèti bhèni ne.
16Te ngaa rai-haha bara bhèni ne, dènge jꞌara pacangange rai, ho dhèla aaꞌi mèu-mèu èi ne, dhu kalua nèti dꞌara hèbꞌa mege naga, sèna ka baku dꞌai bhèni ne.
17Ka mege naga ne nasa titu kèna dènge bhèni ne. Hèia laꞌe pamusu dènge ana-ana leo nèti bhèni ne, nuka dhèu-dhèu dhu madhutu lii paredha Ama Lamatua, aa dhu loe boe nèti peka-padhai Lii Lolo Beꞌa lula-nèti Yesus.
18Èle èèna ka, mege naga ne laꞌe titu ka ètu sebhe dhasi, dènge kadhi ngutu kèru-kèru.
