Repelesin 12

1

2

3

4

5

6

7

8

9

10

11

12

13

14

15

16

17

18

19

20

21

22

¹Kupill al djep kermanke ta mal pai kanill. Ana ta molo olpa i konkunom mal embe woro, takene ge yene kake al menameto paika, ngambale al pai ge kam kandjip 12 pela yene ngambale al woinambo dje paika, king kon pula kakinj mal embe pai.

²Une womba moglo kuyo dje pille, ngembill golo yau to moi.

³Alla kupill al wal djep ta wo pai, kanill. Nomaga bage kerman ta moi. Ngambale 7 pela pai al ge, une king kon pula 7 pela kake, ngambale al kom 10 pela paika yei.

⁴Kam kandjip merke kupill al pai ge epil sokara mal embe moi. Epil taimanta nomaga djage pall brim dje kal makimb al wori. Nomaga ge ana gume al aglo molo ana womba kuya poke, to nano dje pille kui yemoi.

⁵Yemoika ana ge wariye ta kui. Womba ge God dji une bulo ain ta amblo una porapora kantau dongall yenda. Ana ge womba kuika ola dje i pla God sia king yei al ge wormaka moi.

⁶Moika ana ge seke er po dumo wapra yei al pi. Ana wo moya dje God dumo ge ye wopake yewori yei, ana ge kantau ye pineke ege 1,260 erwo punda.

⁷Kune ge kupill al kunda kerman pai. Maikel yene tau agelo kambono boll i yem djimaka nomaga yene agelo kambono boll i yem djimaka kunda boi.

⁸Bolmaka nomaga ge kunda yei man pai. Kupill al dumo moi ge to wormaka er orko pi.

⁹Nomaga kerman moi ge, kamasa moi nomaga. Une kandjiye ge Satan, kandjiye ta ge, ye God tonda mal mor we djindo iwa. Una porapora makimb al moi ge une kende dje aundo iwa. Ga wo une yene ageloye kambono boll amblo i kal makimb al wori.

¹⁰Kune ge na pill, kupill al una nubke ta yau kerman to embe dji, Satan ege ege God nale al nono agane ambane kambono mor al ye God tonda mal mor we dji iwa ge, kambono wo i kal makimb al woro keri. Ge pille, ipon nono Godne nono i yem wori pora dji, God yembe dongall paro ge ne, yene dumoye wopake kantau yenda ge wo pai pora dji. Krais dje wori wo yene unakiye i yem wori iwa ge yene yembe dongall para wo pai pora dji.

¹¹Una wo ga togoi ge, ga kand nagolo goi. Ge pille ga Jisas pille kane yei mal dje pene wori al ge ne, Kogsipsip Wombe meyam toi al ge ga embe pai pille Satan kamblo kal woro keri.

¹²Ge pille, kupill al yero ge ne, ye porapora kupill al mor ge, ye wopille molme! Ba makimb al mor ge ne, solwara mor ge ye wandill mal moye. Satan elle kumbso, ye mor al er kal woi. Yene egeye ge kanan naparo dje kando pille, ye tarowamo yemoye.

¹³To kal makimb al wormaka nomaga kane po ana wariye kui ana ge sika to are pi.

¹⁴Ba ka kerman kekdim purbiye soka iwo aumaka ana ge ipir dje er God dumoye wapra yewori yei al ge po seke moyaka nomaga kur kane nainda. Ga kwa awo kantau yemoyeke kognumb sokara ne, ta tuge yem wo punda.

¹⁵Nomaga are po ana ge nu tonda dje pille, yene djillake al nu kerman mek to orko wori.

¹⁶Ba makimb ge ana amblo pille dje awi. Nu kerman nomaga djillake al wori woi ge makimb yene djillake yapro worika nu erwo gulo pi.

¹⁷Ge pille, nomaga ana ge pille minj i, ana wombaye kambono pende moi ge kunda yeno dje pille are pi. Ga God lo dji karkar yei una ne, Jisas kandjiye dje karkar ye wani una.

¹⁸Nomaga po solwara djeke al aglo moi.