1Iribi tahe ròhònyre warasina‑ki aõbo. Aõhebo bede ritỹỹnykremy, biuwetyy‑ribi hãwyyõmy rabire. Txuu wese tahe itykyra. Tii lamamy rỹire ahãdu tyre. Tarati tyre‑ki tahe tainahakỹ rataana idi rỹire, waòinatxi taina wahe.
2Tii heka bòtòmy ihỹmyhỹ. Ryrymy heka txubrere riijemy tabededỹỹnana‑ò resera uladu reakremy.
3Iribi tahe aõna aõna biu‑ki rexisỹnymy, aõni hemylalasò nihikỹ wese wahe. Irati tahe debò inatxi reurò sõwe iratimy. Debòwiò sõwe heka iòmy. Irataana heka iratimyna myna rỹimyhỹre.
4Tii tahe tõhewòru‑di taina ributunymy ridyre. Bede tyre‑ki idi rehure, taina juràõ. Tii hãwyyko‑txi rỹire. Uladu reakreule tahe uladu riròkremy.
5Tahe tohouã reare, hãbumy heka reare. Tii iòlòmy heka ronykre, ibutu bede bede iòlòteremy wahe. Ihãre tahe Deuxu ridyre. Raòwònyre heka Deuxu rynana‑ò.
6Hãwyy tahe rahenyre bederahy‑ò. Tii 1260 txumy heka tii bederahy‑ki bede riekremy. Deuxule heka tii riywinyre.
7Biu‑ki heka aõbina nihikỹ rỹire. Mieli, ỹju dinodu heka, taijoi‑wana raaõbinanyre aõni‑wana taijoi‑wana.
8Aõni tahe resera taijoi‑wana. Ròtara. Biu‑ribi ròhònykemy tahe idi ratxireri.
9Riteònyre biu‑ribi, aõni nihikỹ heka ròhònyra. Tii heka hemylala nihikỹ wese rare. Satanasi inire, Diabo wahe. Itxenadỹỹdu heka rare ibutumy iny. Suki resera, taijoi‑wana.
10Raholare tahe biu‑ribi rybeõ‑ò: —Deuxu tarasana heka rehemynyre. Tii taruru riteòsinyre iòlòtyhy raremy. Kristu taruru riteòsinyre. Aõbina bina rybedu tahe Deuxu‑ò rarybehyymy ratxireri, txu‑wana, ruwana. Tii tahe ròhònyra biu‑ribi.
11Waityhydỹỹdu seriòre mahãdu heka ròtara Budoeni hãlubu‑di, inatyhyna hãletena‑wana. Rurukemy ratxireri tiiboho tamydeewikeki.
12Beysabenyke biu mahãdu. Koityhyxe tahe ahohokỹ, bede‑wana. Diabo dori adee rehemynyre. Tii reburere, ibededỹỹnana dori iòhòmy reare.
13Iu hemylala aõni heka bedekile ratxirerimy rieryreu, tahe hãwyy tohouã‑wana kia‑ò aõhõkỹmy rotỹỹnykemy risỹnykemy idi ratxireri.
14Tahe hãwyy heka nawiihikỹ‑ribi idei rihuòtera, tahe idi ruòra bederahy‑ò, tasỹ‑ò.
15Hemylala aõni tahe bee sõwemy tary‑ribi rarybexinyre hãwyy ribòròbòròdỹỹkemy.
16Tahe aõkõre. Suu tary riraynyre tahe ibutumy bee riõre.
17Hemylala aõni tahe reburemy reare hãwyy dee. Ibutumy hãwyy ijoi mahãdu rirubunykemy idi ratxireri. Kia mahãdu tahe Deuxu bede ywina rityhynyre, iwese Jesuisi tuu ritỹnynyre wese.
18Tai hemylala aõni ỹnyrakile rỹire.
