YƐSÃÃ 37:16-38

¹⁶Dɛsɑ́m̀pɔ́rɛ̀ wèè wetí ò mɔ̀kɛ dɛ̀ wenni kɛ pɛ̃ɛ̃tɛ́mu bɛyɛibɛ pɛ́u kó tikpɑ̀tì,

¹⁷Kɛ yɛ̃́ Kuyie nyóó pɔntɛmɛ̀ bɛyɛibɛ wɛ̃rímú, kɛ́ntɔ bɛsɑ̀ɑ̀bɛ̀.

¹⁸Kuyie nyɛ̃́mu bɛ̀ɛ̀ yié nku kuɔ́ bɛ we mɑ̀mɛ̀, kù yóó bɛ̀ duɔ́ ndɛ̀ yó ntú bɛ kpɛrɛ ndɛ sɑ̃́ɑ̃̀.

¹⁹Kɛ̀ dimɔ̀nnì yɛiri tùɔ̀kɛní ifɛi bɑ́ɑ́ bɛ̀ pĩ, bɑ́ kɛ̀ dikònnì bo bɛ̀ nyo nkɛ sɑ̀nnɛ̀.

²⁰Bɛyɛibɛ yóó kúmu, kɛ̀ Kuyie ndootitɔbɛ̀ɛ pɛ̃ɛ̃tɛ́ mutepóó nkɔ̃mɛ kɛ́nɑɑ́ nkuyukú.

²¹Oyɛiwe ɔ̃ɔ̃ pentɛ kɛ bɑ́ɑ́ tɛ̃́nnɛ́, kòo sɑ̀ɑ̀wè yie mɔkɛ mɛsémmɛ̀ kɛ pɑ̃ɑ̃.

²²Kuyie ndɔ̀ɔ̀ bɛ̀ mɛsɑ̀ɑ̀ mbɛɛ̀ yóó tiekɛ dihɛì, kɛ̀ kùu bɛti kù cɔ̃ɔ̃ bɛ̀.

²³Kɛ̀ Kuyie mpɛ́nsìrì onìtì borimɛ, kuù ɔ̃ɔ̃ duɔ́ nkòò nkérí kɛ í yĩɛ̃̀kù.

²⁴Kòò do ò bɑ́ nduɔ́, Kuyie nkuù ɔ̃ɔ̃ pĩ́ nho nɔ̀ùtɛ̀ kɛ́yíi.

²⁵Nɛ̀ m bɛmmɛ̀ kɛ yɑ̀ɑ kótɛ́nɛ̀, n yí yɑ̀ Kuyie mbɔntóo dɛ̀ osɑ̀ù, yoo ò yɑɑ̀bí mmúɔ́tɛ dɛ̀ mudiì.

²⁶Osɑ̀ù mɔ̀kɛ mɛsémmɛ̀ mmɛ sɑ̃́ɑ̃̀, kɛ penni o kpɛrɛ bɛtɔbɛ̀, kòo yɑɑ̀bí pɛ́ú dɛ kó mɛsɑ̀ɑ̀.

²⁷Yóu mɛyɛi nkɛ́ndɔɔri mɛsɑ̀ɑ̀, ɑ yɑɑ̀bí bo ḿbo sɑ̃́ɑ̃̀ dihɛì.

²⁸Kuyie ndɔ́ timɔ́mmɔnti nti, kù í buɔnko bɛ̀ɛ̀ kù tũ. Kù bɛ̀ bɑ̀ɑ̀mu sɑ̃́ɑ̃̀, kù yóó dɛitɛ bɛnitiyɛibɛ yɑɑ̀bí nyi.

²⁹Kɛ̀ bɛsɑ̀ɑ̀bɛ̀ɛ tiekɛ dihɛì, kɛ́ ndì bo sɑ̃́ɑ̃̀.

³⁰Osɑ̀ù nɑ̀ɑ́ mmɛciì nkó tinɑ́ɑǹtì nti, tìì yìɛ̀ní o nùù kɛ̀ tì wenni.

³¹Ò dɔ́ Kuyie nkuɔ́ nyi, kɛ yennínɛ̀ omɑ́ɑ̀ mɛyɛi.

³²Oyɛiwe ɔ̃ ndíímu osɑ̀ù, kɛ dɔ́ kóò kùɔ.

³³Ti Yiɛ̀ nKuyie nhɔ̃ɔ̃ í nyóu kòo sɑ̀ù tɑ oyɛiwe nɔu miɛkɛ, kɛ̀ bɛ̀ ò bekùnɛ̀ kù bɑ́ɑ́ yóu kɛ̀ bɛ̀ɛ ò kpetínnɛ́.

³⁴Mbúɔ́ Kuyie nkɛ tũ nku kó kucɛ, kù bo dɑ dɛ́úkùnnɛ kɑ̀ɑ tiekɛ dihɛì, kɛ́yɑ̀ kù dɛ̀itɛmɛ̀ bɛnitiyɛibɛ.

³⁵N yɑ̀mu onitiyɛiwe mɔ̀ɔ̀tɛ dɛ̀ muwɛ̃rímú, kɛ sɛ̀ntɛ̀ mutie sũ̀ũ̀mù kɔ̃mɛ,

³⁶kɛ́pɛ̃ɛ̃tóo ò tɛ̃́nkɛ í ndɛ̀ kpɑɑ́, kɛ̀ nh ò wɑmmú n yí ò yɑ̀.

³⁷Nwúó nwèè tũ̀ Kuyie nkuɔ́ nɛ̀ osɑ̀ù, dɛ kóo nìtì botí ɔ̃ɔ̃ dentɛnɛ̀ mɛsɑ̀ɑ̀ mmɛ.

³⁸Ti Yiɛ̀ nKuyie nyóó kuɔ̀mu bɛnitiyɛibɛ, bɛ wuɔ nyí yó nkpɑɑ́.