Samu 37:16-38

¹⁶Akali keyange pingi dokona bange kuki serara dupwame akali koo pingi dupwana bange malu seraraminyi dupwa isa palyuo sera ingilyamo.

¹⁷Kamongome koo pingi dupwana porai renge doko pyao bembai lanyi nembapala yulu keyange pingi dupwa yapo kame pyuo minyakamira.

¹⁸Banya letamuli pyuo warombo soo pii minyingi dupwa baame mondo lao rapu pyuo kararamopa yuu doko nakamana ingyalu ingyuo ingyara.

¹⁹Nakama randa eparamo dokopa moŋo nyii narami. Lopo seramo dokopa nakama nenge kapa seramopa koo keta pali narami.

²⁰Koo pyuo karenge dupwa kumarami ingilyamo. Kamongo nyisu petenge wambu dupwa mee isa jingi rele lao kalya pipala mee ingyuo pao yangama yangama kopana mendeke ingyuo meeingyuo parami ingilyamo.

²¹Wambu kopetame pingi dupwana yulu doko bange saka napala mee yari ingyuo kee lao nyepala dee range maiyakami nange. Dopa piramopape akali keyange dokome bange mee mairamo doko ketae reto maiyuo maiyuo karara.

²²Kamongo baame rae maiyuo elyape keta petenge wambu dupwa yuu dokona kapa palirami. Dopa piramopape Kamongome rae mai nara wambu dupwa yuu dokona ralinyi nembara ingilyamo.

²³Kamongome akali baa apa pyuo karara kata dokona lanyuo penge. Dopa pyuo baa rae mainyi pyambuo pingi wambu dupwa kyawa minyuo karenge.

²⁴Isa penge ramo dokopa Kamongome nyisilyasa isa puu pao paa nange.

²⁵Namba yuu gii malu nembo kareyo doko dakepa emo kaelyo. Dopa pipunupape akali keyange mende Kamongome kyawa yaki nyiyamo kanda nayo. Dopako pyuo banya wane wanakepeme nenge jinya lao kongo pyuo kareyaminyi kanda nayo.

²⁶Yuu peparae baame pakiki maiyuo dee yano reto maiyuoko pingi. Dopa pilyamopa banya wane wanakepe dupwa baa rae mainyi pyambungi.

²⁷Yulu koo dupwa yaki nyuo kaepala keyange pyuo karape. Dopa pyuo karapala dokopa embena para pyarinyi dupwa yuu dokona mondo lao nao palyuo kararami.

²⁸Kamongome yulu rolae dupwa mona nyingi. Wambu banya yulu mondo mondo lao pingi dupwa yaki nyuo kaeyara ingya nalyamo. Kamongo baame nakama kyawa minyuo karenge. Dopa pilyamopape kopetame pinginya para pyao nyerami dupwa neta nembara.

²⁹Rolae pilyaminyi dupwa yuu range dokona mee mondo lao nao palu palirami.

³⁰Wambu mona palengena pii doko keyange ingyuo penge. Baame laramo dupwa angi kapa dokonako lara.

³¹Baame banya Anatunya lowapii dupwa mona anda dokona reto minyingi. Yuu mendepe reto yaki nyuo kaeya nange.

³²Akali koo dokome akali keyange doko pyalana leeminyuo karenge.

³³Dopa pilyamopape Kamongo baame yanda pimwainyapawa dokona baa anamasi minyinya lao kyawa yaki nyii nara. Kote minyaramo dokopa koo pingi dokome kote pii lao wini lapala karapusi nembena lao panda mai nara.

³⁴Kamongome keyange mende pira lao suu pilini dokona baa keta pyamalyuo karapala banya mawa pii dupwa rape rape lao minyuo karape. Dokopa yuu dokona nao karalapa lao baame porai renge jeramo karo kandare dokopa koo pingi dupwa ralinyi neta nembara ingilyamo.

³⁵Akali koo sungwa sungwa pyuo kareya doko namba kandeyo. Baa iki londapala doloma nyuo isa palyuo karenge doko kandeyo.

³⁶Enakana pao karo kandeyo dokopa baa dokona kara nayamo kandeyo. Koto kareyo dokopa kando nyii nayo.

³⁷Pii dake angi mende letamo lao selapape. Wambu rolae pingi dupwana kandapala mana nyelapape. Wambu mona sinya lao piso karo pingi dokona para pyaramo dupwa nakama pisirami ingyara.

³⁸Koo pingi dupwa koo keta palirami dokopa nakamana para pyao nyisi dupwa opetae pyao nembarami.