Psalms 37:16-38

¹⁶Me malaulau en me pun amen, me mau jan dipijou toto en me japun kan.

¹⁷Pwe pa en me japun kan pan tip pajan, a Ieowa pan kotin kolekol me pun kan.

¹⁸Ieowa kotin manier ran en me lelapok kan, o ar dipijou pan duedueta.

¹⁹Re jota pan namenokala ni anjau apwal, o ni anjaun lek a pan itar on ir.

²⁰Pwe me japun kan pan lokidokila, o imwintiti en Ieowa, ma re rajon jap kajelel eu, re pil pan mokonaidi dueta atiniai.

²¹Me japun kan kin pwaipwand ap jota kapunala, a me pun o kin kadek o kin kijakija wei.

²²Pwe me paie kin i, pan jojoki jap o, a me a kotin karialar akan pan kokoka jan.

²³Ieowa kin kotin katenetene jon en aramaj due met ar kakakewei, o a kotin peren kida a wiawia kan.

²⁴Ma a pan pupedi, a jota pan lokidokila; pwe Ieowa kotin kolekidi i lim a.

²⁵Nai pulepul ap malar, a i jaikenta kilaner me pun amen likidmalielar, de na kan poekipoeki prot.

²⁶A kin kadek anjau karoj o kin men kijakij wei, o na kan pan paida.

²⁷Muei jan me jued ap wia me mau, koe ap pan mimieta nan jap o.

²⁸Pwe Ieowa kotin peren kida me pun, o a jota pan kotin likidmaliela japwilim a jaraui kan; re pan nekinek kokolata, a kadaudok en me japun kan pan kokoka jan.

²⁹Me pun kan pan jojoki jap o, ap mimieta kokolata.

³⁰Au en me pun amen kin kida me lolekon, o lo a kaparokki me pun.

³¹Majan en a Kot mi nan monion i, a jota pan krijedi.

³²Me japun kin majamajan me pun, pwen kamela i.

³³A Ieowa jota pan kotin mueid on, en mi nan pa a kan, o a jota pan kotin kajela i, a lao pan pakadeikada.

³⁴Auiaui Ieowa o weweid nan a al akan, a ap pan kotin kajapwil uk ada, pwe koe en jojoki jap o; koe pan kilan, me japun kan pan kokoka jan.

³⁵I kilaner me doo jan Kot amen, me katiwo o pwaida o maurada dueta tuka mau pot.

³⁶A ni at dauli waja o, kilan, a joer mia; i idok duen i, a a jolar kak diarokada.

³⁷Dadaurata om lelapok, o wiawia me pun; pwe jon due met pan pwaida mau ni imwi.

³⁸A me katiwo kan pan wiaki eu lokidokila, o me japun kan pan koka jan ni imwi.