Psalm 37:16-38

¹⁶Me malaulau en me pung amen, me mau sang dipisou toto en me sapung kan.

¹⁷Pwe pa en me sapung kan pan tip pasang, a Ieowa pan kotin kolekol me pung kan.

¹⁸Ieowa kotin mangier ran en me lelapok kan, o ar dipisou pan duedueta.

¹⁹Re sota pan namenokala ni ansau apwal, o ni ansaun lek a pan itar ong ir.

²⁰Pwe me sapung kan pan lokidokila, o imwintiti en Ieowa, ma re rasong sap kaselel eu, re pil pan mokonaidi dueta atiniai.

²¹Me sapung kan kin pwaipwand ap sota kapungala, a me pung o kin kadek o kin kisakisa wei.

²²Pwe me paie kin i, pan sosoki sap o, a me a kotin karialar akan pan kokoka sang.

²³Ieowa kin kotin katengetenge song en aramas due met ar kakakewei, o a kotin peren kida a wiawia kan.

²⁴Ma a pan pupedi, a sota pan lokidokila; pwe Ieowa kotin kolekidi i lim a.

²⁵Ngai pulepul ap malar, a i saikenta kilanger me pung amen likidmalielar, de na kan poekipoeki prot.

²⁶A kin kadek ansau karos o kin men kisakis wei, o na kan pan paida.

²⁷Muei sang me sued ap wia me mau, koe ap pan mimieta nan sap o.

²⁸Pwe Ieowa kotin peren kida me pung, o a sota pan kotin likidmaliela sapwilim a saraui kan; re pan nekinek kokolata, a kadaudok en me sapung kan pan kokoka sang.

²⁹Me pung kan pan sosoki sap o, ap mimieta kokolata.

³⁰Au en me pung amen kin kida me lolekong, o lo a kaparokki me pung.

³¹Masan en a Kot mi nan mongiong i, a sota pan krisedi.

³²Me sapung kin masamasan me pung, pwen kamela i.

³³A Ieowa sota pan kotin mueid ong, en mi nan pa a kan, o a sota pan kotin kasela i, a lao pan pakadeikada.

³⁴Auiaui Ieowa o weweid nan a al akan, a ap pan kotin kasapwil uk ada, pwe koe en sosoki sap o; koe pan kilang, me sapung kan pan kokoka sang.

³⁵I kilanger me doo sang Kot amen, me katiwo o pwaida o maurada dueta tuka mau pot.

³⁶A ni at dauli wasa o, kilang, a soer mia; i idok duen i, a a solar kak diarokada.

³⁷Dadaurata om lelapok, o wiawia me pung; pwe song due met pan pwaida mau ni imwi.

³⁸A me katiwo kan pan wiaki eu lokidokila, o me sapung kan pan koka sang ni imwi.