YƐSÃÃ 27:4-14

⁴N dɔ́ dɛ̀mɑrɛ̀ mɑ́ɑ̀ ndi mɛdiɛ̀ nkɛ dɛ̀ mɔ̀ú ti Yiɛ̀ nKuyie: M bo mbomɛ̀ ku cĩ́ɛ̃̀tɛ̀ miɛkɛ sɑ̃́ɑ̃̀, kɛ wúó nku sɑ̀ɑ̀, kɛ dɑkɛ ku cĩ́ɛ̃̀tɛ̀ kpɛ́í.

⁵Dɛǹdɛ kù yóó nni nkɑ̃nkɛ́mɛ̀ mɛyɛi ndiyiè yɛiri yiè, kɛ̀ nní nsɔri ku cĩ́ɛ̃̀tɛ̀, kɛ̀ kù n dee nku pèrì ĩ́nkɛ̀, mɛyɛi nyí yó n nintɛ dɛ̀.

⁶N sĩ́ĩ́mmu n dootitɔbɛ̀ bɛ̀ɛ̀ n fitɛ́, n yóó fíému yɛsɑ̃ɑ̃ nkó iwũɔ̃ ku cĩ́ɛ̃̀tɛ̀ kɛ́ndiè, kɛ́dɛ́úkùnko ku yètìrì.

⁷Áú n Yiɛ̀ nKuyie! N kuɔ́ mmɛsémmɛ̀ kɛ́ n teennɛ̀, n kuɔ̀nnɛ̀ fɔ̃́ nwe, n kéntɛ́.

⁸N dèntɛní ɑ bɛ́i ntì nti kɛ tú: N wɑmmúnɛ̀! N Yiɛ̀ nKuyie, n dɑ wɑɑ̀mmu.

⁹Bɑ́ m bútínnɛ́, ɑ miɛkɛ bɑ́ m pɛikɛ, fɔ̃́ nwèè n dɛɛrí bɑ́ m bɔntóo. Bɑ́ n yóu fɔ̃́ n Yiɛ̀ nKuyie, fɔ̃́ɔ̃̀ n dɛɛrí.

¹⁰N cicɛ nɛ̀ n yɔ̃ kɛ̀ bɛ̀ n dootóo, fɔ̃́ nyó n cɔutɛ́mu.

¹¹N Yiɛ̀ nKuyie, m bɛnkɛ ɑ cɛ, n dootitɔbɛ̀ bɛɛ̀ bo, n niitɛ́ kucɛ sɑ̀ɑ̀kù.

¹²Bɑ́ɑ́ yóu kɛ̀ n dootitɔbɛ̀ n dɔ̀ɔ̀ bɛ̀ dɔ́mɛ̀, bɛ̀ sɔ̃̀ńtɛ́ kɛ n wɑ́tìrìmu, bɛ̀ dɔ́ mɛyɛi ndɔɔ̀rìmù mmu sɑ̃́ɑ̃̀.

¹³Dɛ̀ nɑ nni ndòmmɛ kɛ̀ n do í yɛ̃́ kɛ dò m bo yɑ̀ ɑ kó mɛsɑ̀ɑ̀ kɛtenkɛ̀ kiɛ ĩ́nkɛ̀?

¹⁴A mbúɔ́ Kuyie, kpénkùnnɛ ɑmɑ́ɑ̀, yɑ́úkùnnɛ ɑ kɔ̃̀ntì, mbúɔ́ Kuyie.