SALAMO 27:4-14

⁴Gau tamona sibona Lohiabada dekena amo do lau noinoi, unai gau sibona do lau tahua. Lau ura Lohiabada ena Dubu lalonai do lau noho, egu mauri dinadia ibounai. Vadaeni Lohiabada ena namo do lau laloa, bona iena aonega do lau tahua.

⁵Nega dika be lau dekenai ia ginidae neganai, Lohiabada ese lau do ia durua. Iena Dubu Helaga lalonai lau do ia hunia. Ataiai nadi badana latanai ia ese lau do ia atoa.

⁶Unai dainai lau idia dagedage henia taudia, be do lau halusidia. Vadaeni Lohiabada ena Dubu Helaga lalonai, boubou do lau henia, mai moale danu, bona ane do lau abia, Lohiabada hanamoa anedia.

⁷Lohiabada e, oi dekenai lau boiboi neganai, mani do oi kamonai! Lau dekenai do oi bogahisihisi, lau dekenai do oi haere!

⁸Oi ese lau oi hamaoroa, oi gwau, “Lau dekenai do oi tomadiho.” Vadaeni lau haere, lau gwau, “Lohiabada e, lau mai inai,

⁹oiemu vairana lau dekena amo mani oi hunia lasi.” Lau dekenai do oi badu lasi. Lau, oiemu hesiai tauna, do oi lulua lao lasi. Guna oi ese lau oi durua vadaeni. Lauegu hamauria Diravana e, lau do oi negea lasi, lau do oi rakatania lasi.

¹⁰Badina be egu tamana bona sinana, ese lau idia rakatania, to Lohiabada ese lau do ia abia dae.

¹¹Lohiabada e, oiemu kara be lau dekenai do oi hadibaia. Dala maoromaoro dekenai lau do oi hakaua, badina lau idia dagedage henia taudia be momo.

¹²Lau idia dagedage henia taudia edia siahu henunai, lau do oi rakatania lasi. Idia ese lau hagaria bona hadikaia totona, hereva koikoi idia gwauraia noho.

¹³Lau diba momokani, lau ese inai mauri lalonai, Lohiabada ena kara namo do lau itaia.

¹⁴Lohiabada dekenai do umui abidadama henia. Do umui laloa goada, daradara lasi. Lohiabada dekenai do umui abidadama henia.