Salmo 27:4-14

⁴Esa anggoy di kinkindaw ko en Apo, es-esa di panggep ko isnan biyag ko: manteeak koma ay kanayon isnan Timplo na ta mailak koma di am-in ay kinasiged na ya ta manpaitdoak abe en sisya.

⁵Tan sin timpon di ligat ko somalin sisya, itabonas sak-en sin oneg di Timplo na. Salaknibanas sak-en sin nakayang ay bato, tan sidi, adi makaabot din kaibaw ko.

⁶Awni et abakek din lomilikob ay kagobat ko, et peteg di ragsak ko ay man-idaton si animal sin Timplo yan ipigsak din kantak ay mangidaydayaw en Apo.

⁷Dengngem koma mo mankararagak en sik-a, Apo. Maseg-ang ka koma ta songbatam nan adawag ko.

⁸Kanam en, “Omali kayo ay mandayaw en sak-en.” Kanak abe, “Aw Apo, sik-a di enak daydayawen.”

⁹Sak-en di baam, adi ka koma tomaytaynan, adi ka omibonget ya omipakaan, tan sik-a din kanayon ay en namadbadang, sik-a, Apo, di Diyos ay mangisalakan.

¹⁰Olay mo omiwasit da ama en ina, sik-a pay ay Diyos di omil-ila.

¹¹Itdom ay Diyos di pandanak ay kosto ta say nalinteg di kabibiyag ko, tan nay ad-ado di kaibaw ko.

¹²Adim ipalobos ay matongpal di panggep da, tan pag etek di ipabpabasol da, palalo di pangeg-egyat da.

¹³Ngem ammok ay lak-amek to kasin san kinasiged mo, olay ed wani ay kawadak ay matmatago.

¹⁴Mantalek kayo en Diyos ay Apo, mamati kayo ya papigsaen yo san nemnem yo. Siya tet-ewa, mantalek kayo isnan Apo.