7Diyosuwa ena waibada sauginemo, Islael lavedi Maimaituwa aubaina ai taupaula, bi ena peki mulinemo edi babada kamaina te ai taupaulawata, banina tedi matedimo Bada anisove kauwidi i voiyedi Islael lavedi lisidimo.
8Nan natuna Diyosuwa, Bada ena taupaula, ena kwalabu 110 bi i peki.
9Bi Ifleim damna edi dobumo malagai isana Timnat-ḡelesmo a dobo. Timnat-ḡeles ba oya Gaas diyanemo aibadabada yawaninemo.
10Kamaina bi mba tubulelesidi a peki kovi mulinemo, tubulelesa valivaliudi dobunemo a duga saḡa. Niga tubulelesidi Bada anisove kauwidi Islael lavedi lisidimo i voivoiyedina mote a sibedi.
11Tedi Bada matanemo gebogebo a voivoiyedi bi Bal koikoitaudi a laulauduneyedi.
12Tedi Bada edi magumagula edi Maimaituwa a lau lauduneyena a miyatautauliye, tana taunana wala Idipmo i ka potiyovodi. Bi kota tedi lava diyedimo taumiya edi maimaituwa a kaiwatedi bi a laulauduneyedi. Taunana aubaina Bada lisidimo i medi.
13Niga lavedi Bada lauduneyena a kaisako bi Bal bi Astolet koikoitaudi a laulauduneyedi.
14Bada Islael lavedi i kitekitedi ba lisidimo i medi gulata bi i kita kamaḡedi te edi ḡaviya nimedimo i sivudi te sa kaloleloledi bi edi ḡonaḡona sa kwaya vaidi. Tana i voiyedi te mote ḡemoḡemotina bai simai tubu.
15Laḡannemo bi waiḡaviya aubaina a potiyovona ba Bada Islael kedi ḡaviya mulidimo i moito bi Islael i laulauyovoḡedi, wala ena giu i sakosakona luvanemo. Ḡome Islael lavedi ai nuwaboya gulata.
16Kamaina bi Bada taulaididimana i vinedi te tedi kaka kedi ḡaviya nimedimo sai yawasanidi.
17Bi kota Islael lavedi taulaididimana kalinedi mote a vaiye, bi kamaina te koikoitau a lau lauduneyedi. Tedi edi magumagula Bada kalinana a kaikaiwatana etana a pale, bi noi taunana te a miya vitaledi te koikoitau ḡesaudi a laulauduneyedi.
18Laḡannemo bi Bada taulaididimana lavana i vinena, ba tana ena waibada sauginemo Islael ya sagudi te kedi ḡaviya nimedimo yai yawasanidi. Banina edi lau aiyoi bi edi wainuwatoi i kitedi te i launuwatoiyedi.
19Laḡannemo taulaididimana lavana i pekina, ba kota lavedi a munaḡa kauwa waimatawalawala otidi a voivoiyedi, mote mainana wala edi magumagula. Tedi maimaituwa ḡesaudi a laulauduneyedi bi a kaikaiwatedi. Bi a laukasaḡaiḡai bi edi yawasana gebogebodi mote a gosedi.
