Soukapwüng 2

1

2

3

4

5

6

7

8

9

10

11

12

13

14

15

16

17

18

19

20

21

¹Iwe, nöün ewe Samol mi Lapalap chon läng a feitä seni Kilkal tori Pokim o üreni ekewe chon Israel, “Üa emwenikemiila seni Isip o emwenikemiilong lon ewe fanü üa pwon fän akapel pwe üpwe ngeni ämi kewe lewo. Üa apasa, ‘Üsap fokun atai ai pwon ngenikemi.

²Nge ämi ousap pwonfengen me chon ei fanü. Oupwe atai ar kewe rongen asor.’ Nge ämi ousap aleasochis ngeni ai allük. Pwota oua föri ei?

³Iei mine üa apasa pwe üsap asüela chon ei fanü me mwemi. Ir repwe ariaföüükemi, nge ar kewe kot repwe eu lenien likatup ngenikemi.”

⁴Lupwen nöün ewe Samol mi Lapalap we chon läng a üreni ekewe aramasen Israel meinisin ekei kapas, ekewe aramas ra leüömong le kechü.

⁵Iwe, ra aita ngeni ewe leni Pokim . Ikenan ra asor ngeni ewe Samol mi Lapalap.

⁶Mürin än Josua tinala ekewe aramasen Israel, ra feila eman me eman ngeni fanüan pwe repwe fanüeni.

⁷Iwe, ekewe aramas ra angang ngeni ewe Samol mi Lapalap lon fansoun manauen Josua meinisin, pwal lon fansoun manauen ekewe souakom mi manauatam seni Josua, ir mi küna ekewe föför mi manaman meinisin ewe Samol mi Lapalap a föri fän iten ekewe chon Israel.

⁸Iwe, Josua nöün Nun we mwän, nöün ewe Samol mi Lapalap we chon angang, a mäla, lupwen a ierini ipükü engol.

⁹Mürin, ekewe aramas ra peiaseni lon fanüan me lon Timnat-sera mi nom won chukuchukutän ewe fanü Efraim peliefengin ewe chuk Kaas.

¹⁰Nge lupwen ewe pilon aramas meinisin ra pwal tapwela mürin semer kewe le mäla, a märitä eu pilon me mürir resap silei ewe Samol mi Lapalap, resap pwal silei ekewe föför a föri fän iten chon Israel.

¹¹Mürin, ekewe aramasen Israel ra föri mine a ngau me fän mesen ewe Samol mi Lapalap o angang ngeni ekewe anü Paal.

¹²Ra likitala ewe Samol mi Lapalap än ar kewe lewo we Kot mi emwenirewu seni ewe fanü Isip. Ra pwal popuetä le fel ngeni pwal ekoch kot än ekewe aramas mi nom ünükür. Ren ei ra asonga ewe Samol mi Lapalap.

¹³Iwe, ra likitala ewe Samol mi Lapalap o angang ngeni ekewe anü Paal me Astarot.

¹⁴Iei mine ewe Samol mi Lapalap a song ngeni chon Israel o mwüt ngeni ekoch aramas pwe repwe soläni pisekir fän pöchökül, a pwal asechirela ngeni chon oputer mi nom ünükür, pwe repwe nom fän nemenier, nge resap chüen tongeni pwora ngeniir.

¹⁵Iteiten fansoun, lupwen chon Israel ra feila maun, ewe Samol mi Lapalap a ü ngeniir o akufuur, usun a fen pwon fän akapel ngeniir. Iwe, ra fokun riaföü.

¹⁶Mürin, ewe Samol mi Lapalap a filätä soukapwüng, repwe amanaua chon Israel seni fän nemenemen chokewe mi soläni pisekir fän pöchökül.

¹⁷Nge ir resap aleasochis ngeni nöür kewe soukapwüng. Ra kirikiringau ngeni ewe Samol mi Lapalap o fel ngeni pwal ekoch kot. Iwe, ra müttir tokola seni än semelaper kewe föför. Pun semelaper kewe ra aleasochis ngeni än ewe Samol mi Lapalap allük, nge ir resap föri iei usun.

¹⁸Iwe, iteiten fansoun, lupwen ewe Samol mi Lapalap a filätä soukapwüng fän iter, a eti ewe soukapwüng o amanaua ekewe aramas seni chon oputeer lon ükükün ränin manauen ewe soukapwüng. Pun ewe Samol mi Lapalap a tongeäsiniir pokiten ar riaföü ren chokewe mi ariaföüür o aweiresiir.

¹⁹Nge iteiten fansoun, lupwen eman soukapwüng a mäla, ekewe aramas ra kulsefäl o föföringau lap seni semelaper kewe. Ra angang ngeni pwal ekoch kot o fel ngeniir. Iwe, resap fokun mochen likitala ar föför mi ngau ika ükütiu le tipeförea.

²⁰Iei mine ewe Samol mi Lapalap a fokun song ngeni chon Israel o apasa, “Pokiten ekei aramas ra atai ai pwon üa pwon ngeni ar kewe lewo, nge resap aleasochisi aloi,

²¹seni ikenai üsap chüen asüela me mwer chon ekewe mwü Josua a likitiir, lupwen a mäla.

²²Üpwe nöünöü ir le sotuni chon Israel ika repwe föri mine ngang ewe Samol mi Lapalap üa üreniir, usun ar kewe lewo ra föri, ika resap.”

²³Iei usun ewe Samol mi Lapalap a mwüt ngeni chon ekewe mwü pwe repwe nonometiu, nge esap müttir asürela, ir chokewe resap tolong fän nemenien Josua.