Judges 2

1

2

3

4

5

6

7

8

9

10

11

12

13

14

15

16

17

18

19

20

21

¹Fare engel rok SOMOL e yan u Gilgal nga Bokim, me ga’ar ngak piyu Israel, “I gag e gu fekmed nga wuru’ yu Egypt mug fekmed i yib ko fare nam ni gu micheg ngak pi chitamangimed kakrom. I lungug, ‘Ridab gu th’ab e m’ag ni kug ngongliy u thildad.

²Ma thingar dab mu ngongliyed e m’ag u thilmed e girdi’ ni yad be par u daken e re nam ney. Thingar mu buthuged e pi altar rorad. Machane dawor mu rin’ed e tin gog ngomed. Ka mu rin’ed e tin ba togopluw ngay!

³Ere ngog ngomed e chiney ndab kug tuluf e pi girdi’ ney u nap’an ni gimed be yib i yib nga m’on. Bay ra manged to’ogor romed, ma bayi thabey nagmed e liyor ko pi got rorad.”

⁴Nap’an ni yog fare engel e re bugithin ney ngorad, me tabab urngin e girdi’ nu Israel ko meyor.

⁵Aram fan min tunguy yu Bokim ko gin’em. Miyad pi’ e maligach ngak SOMOL u rom.

⁶Me l’oeg Joshua piyu Israel ngranod, ni nge be’ me yan i guy e gin ba’adag e binaw ko fare nam ni nge par riy nike tafnay ni aram e birok e f’oth ko fare nam.

⁷I par piyu Israel ni yad be pigpig ngak SOMOL u n’umngin nap’an ni bfos Joshua, ma nap’an ni yim’ Joshua mu ur pired ni yad be pigpig ngak SOMOL u n’umngin nap’an ni bfos e pi’in yad be yog e thin rorad ni yad e ka’arugyed urngin e tin ni i rin’ SOMOL ni fan ngak piyu Israel.

⁸I Joshua ni fak Nun, ni ir e tapigpig rok SOMOL e yim’ nike gaman 110 e duw yangren.

⁹Ni chibgiliy u Timnath Serah, ni aram e girok’ e binaw ni bay u Efraim ni go’ burey, ni bay nga lel’och ko burey ni Gaash.

¹⁰Miki yim’ ga’ngin e binem e mfen, me bin migid e mfen e ra paged talin SOMOL nge pin’en ni i rin’ ni fan ngak piyu Israel.

¹¹Ma aram me denen e girdi’ nu Israel nib togopluw ngak SOMOL miyad cheal ngu’ur pigpiggad ngak Baal.

¹²Miyad tal ko liyor ni yad ma tay ngak SOMOL, ni fare Got rok e pi chitamangirad kakrom, ni aram e re Got ni fekrad nga wuru’ yu Egypt, miyad tabab ngu’ur tedfan yug boch e got, pi got ko pi girdi’ u to’obrad i yan. U ra siro’gad ko pi got nem, ma aram mri damumuw SOMOL ngorad.

¹³Miyad tal ko liyor ngak SOMOL nge mang fapi liyos ni ya’an Baal nge i Astarte e ur ted fan.

¹⁴Mri damumuw SOMOL ngak piyu Israel me pag ngan giliw nagrad ngan fek e tirorad ban’en. Me pag e to’ogor rok piyu Israel u to’obrad i yan ngar gelgad ngorad, ma dakiyag rok piyu Israel ni ngar ayuweged yad.

¹⁵Gubin yay ni yad ra mael, ma ba togopluw SOMOL ngak piyu Israel, ni bod rogon ni yog nra rin’. Miyad par ni kari gel e gafgow rorad.

¹⁶Ma aram me pi’ SOMOL ngak piyu Israel boch e tayugang’ ni ngar ayuwegedrad u pa’ e pi’in yad be giliw nagrad.

¹⁷Machane da ur folgad rok fapi tayugang’ rorad. Yu Israel e da ur yul’yul’gad ngak SOMOL, ma yugu boch e got e ur tedfan. Ma pi chitamangirad e ur folgad ko tin keyog SOMOL ni ngan rin’, machane biney e mfen nib be’ech e de n’uw nap’an ma da kur folgad.

¹⁸Nap’an nra pi’ SOMOL be’ ngorad ni ir e ngi i gafaliyrad, me ayuweg SOMOL fa’anem, nge ayweg piyu Israel u pa’ e pi to’ogor rorad u n’umngin nap’an nra par fa’anem nib fos. I runguyrad SOMOL, ya ur gilgel’gad u fithik’ e gafgow nge togopluw ni i tay e pi to’ogor rorad ngorad.

¹⁹Ma yug nap’an nra yim’ e en i gafaliyrad, me sul fa pi girdi’ nga panginrad ngar ngongolgad nib gel e kireb riy ko bin ke thumur e mfen. Miyad pigpig ma yad be tayfan yug boch e got, miyad pi’ nga daken ngu’ur rin’ed e kireb.

²⁰Mri damumuw SOMOL ngak piyu Israel, me ga’ar, “Re nam ney e kar th’abed fare m’ag ni gu ta’chiylen ngak e pi chitamangirad kakrom ni ngu’ur ted u gil’. Bochan e darir folgad rog,

²¹ere dab kug tuluf girdi’en e pi nam ni rmagaygad u roy u nap’an ni yim’ Joshua.

²²Ere nggu maruwel ngorad nggu nang ko ra folwok yu Israel rog ni bod e pi chitamangirad kakrom fa dangay.”

²³Ma aram me pag SOMOL girdi’en fapi nam ngar pired u rom; de pag Joshua nge gel ngorad, ma ku de tulufrad ni papey u tomuren nike yim Joshua.