Gôliŋwaga 2

2

4

5

6

7

8

9

13

14

15

16

¹Apômtaunê aŋela gêwi Gilgal siŋ gêja Bokim ma kêsôm gêdêŋ lau Israel gebe “Aê kakôc amac aŋga Aiguptu ma gawê amac mêŋaô lasê gamêŋ, taŋ katôc lemoc gebe jakêŋ êndêŋ tamemi naŋ. Aê kasôm gebe ‘Aê janac poac, taŋ kamoatiŋ gêdêŋ amac naŋ, popoc atomanô.

²Ma amac amoatiŋ poac teŋ êndêŋ lau, taŋ sêŋgôŋ gamêŋ tonec naŋ atom. Atuc êsêacnêŋ altar popoc.’ Mago amac taŋem wamu aêŋoc jatu tonaŋ atom. Amac agôm asageŋ.

³Amboac tonaŋ aê jasôm êndêŋ amac gebe Aê jajanda lau tomôkê-tomôkê jamuŋ amac atom. Êsêac oc têtu nêm ŋacjo ma nêŋ anôtôi jaba têtu amacnêm lakô.”

⁴Apômtaunê aŋela kêsôm biŋ tonaŋ gêdêŋ lau Israel samob su, go lau tau sêpuc taŋiboa sa ma têtaŋ.

⁵Ma sê gamêŋ tonaŋ ŋaê gebe Bokim ma sêkêŋ da gêdêŋ Apômtau aŋga tônê.

⁶Josua kêlêwaŋ lau Israel sêmu dêdêŋ nêŋ nomlênsêm gêdêŋ-gêdêŋgeŋ sêja, gebe sêŋgôŋ têtu wakac.

⁷Ma lau Israel sêjam sakiŋ Apômtau kêtôm têm Josua gêmoa nomŋa. Josua gêmac êndu su, go êsêac sêjam sakiŋ Apômtau sêmoa kêtôm têm, taŋ laumata, taŋ sêjala gêŋ samob, taŋ Apômtau gêgôm gêdêŋ lau Israel naŋ, sêmoa mateŋ jali naŋ.

⁸Ma Nun latu Josua, taŋ Apômtaunê sakiŋwaga naŋ, nê jala kêtu 110 ma gêmac êndu.

⁹Êsêac sêsuŋ eŋ aŋga tau nê nomlênsêm ŋamalac Tinat-Heres, taŋ gêc lôc Gas ŋagamêŋ gêmu kêpiŋa aŋga Epraim ŋagamêŋ lôcŋa.

¹⁰Lau taŋ sêmoa sêwiŋ Josua naŋ, sêmac êndu amboac tonaŋ, ma lau wakuc mêŋsêsa, naŋ êsêac sêjam kauc Apômtau to nê kôm, taŋ gêjam kêtu lau Israelŋa naŋ.

¹¹Go lau Israel sêgôm gêŋ, taŋ Apômtau gêlic sec naŋ, gebe sêjam sakiŋ Bal.

¹²Êsêac sêwi Apômtau, tameŋinêŋ Anôtô, taŋ kêkôc êsêac su aŋga Aiguptu naŋ, siŋ ma sêsap lau, taŋ sêgi êsêac auc naŋ, nêŋ anôtôi jaba tôŋ. Êsêac sêpôŋ eŋduc gêdêŋ anôtôi tonaŋ ma sêgôm Apômtau têtac ŋandaŋ kêsa.

¹³Êsêac sêwi Apômtau siŋ ma sêjam sakiŋ Bal agêc Astarte.

¹⁴Apômtau têtac ŋandaŋ ŋanô gêdêŋ lau Israel, tec kêkêŋ êsêac sêsêp kêjaŋgowaga lemeŋ, gebe sêjaŋgo êsêacnêŋ gêŋ su. Eŋ kêkêŋ nêŋ ŋacjo, taŋ sêgi êsêac auc naŋ, gebe sêkôniŋ êsêac e lau Israel têtôm gebe sênam tauŋ sa êtiam atom.

¹⁵Kêtôm têm samob, taŋ êsêac dêdi sebe sênac siŋ naŋ, Apômtau gêjam dêmôê êsêac kêtôm eŋ kêsôm ma kêtôc lêma gebe êŋgôm naŋ. Ma êsêac sêpô lêna tauŋ ŋanôgeŋ.

¹⁶Go Apômtau kêkêŋ gôliŋwaga, taŋ sêjam lau Israel sa aŋga kêjaŋgowaga lemeŋ.

¹⁷Mago êsêac sêkêŋ taŋeŋ nêŋ gôliŋwaga atom. Êsêac sêkêŋ tauŋ dêdêŋ anôtôi jaba to sêpôŋ aeŋduc gêdêŋ êsêac. Êsêac tameŋi taŋeŋ wamu Apômtaunê biŋsu, mago êsêac tauŋ sêwi tameŋinêŋ lêŋ tonaŋ siŋ sebeŋ ma sêsa kêtiam atom.

¹⁸Kêtôm têm samob, taŋ Apômtau kêkêŋ gôliŋwaga gêdêŋ êsêac naŋ, eŋ gêmoa gêwiŋ gôliŋwaga tau ma eŋ gêjam lau tau sa aŋga nêŋ ŋacjo lemeŋ kêtôm têm samob, taŋ gôliŋwaga gêmoa gêwiŋ êsêac naŋ. Apômtau taê walô êsêac kêtu nêŋ taŋiboa, taŋ têtaŋ kêtu nêŋ ŋacjo sêlêsu to sêkôniŋ êsêac naŋŋa.

¹⁹Mago gêdêŋ taŋ gôliŋwaga gêmac êndu naŋ, lau sêmu sêja nêŋ intêna laŋgwa kêtiam e sêgôm sec kêlêlêc lau gêmuŋŋa su. Êsêac têdaguc anôtôi jaba ma sêjam sakiŋ êsêac to sêpôŋ aeŋduc gêdêŋ êsêac ma sêwi nêŋ lêŋ tonaŋ siŋ atom, sêsa togêsuŋtêkwa ŋatoŋgeŋ sêmoa.

²⁰Apômtau têtac ŋandaŋ sec gêdêŋ lau Israel ma kêsôm gebe “Lau tonec seseŋ poac, taŋ kajatu gêdêŋ êsêac tameŋi gebe sêsap tôŋ naŋ, su ma taŋeŋ wamu aê atom,

²¹tec aê jajanda lau tomôkê-tomôkê, taŋ Josua kêku tulu atom ma gêmac êndu naŋ, nêŋ teŋ êtiam atom.

²²Aê jaŋgôm gêŋ tonec gebe jansaê lau Israel e jajala êsêac sêsa ŋoc lêŋ têtôm tameŋi sêsa nêŋ me masi.”

²³Amboac tonaŋ Apômtau gêlôc gebe lau tomôkê-tomôkê, taŋ sêsô Josua lêma ŋalabu atom naŋ, sêŋgôŋgeŋ. Eŋ kêjanda êsêac sebeŋ atom.