SKUTKI 8:3-34

³Ale o Saul musarelas o zboros. Džalas andro khera, lelas le muršen the le džuvľen a thovelas len andro berteni.

⁴Ola, save pes rozdenašle, džanas than thanestar a vakerenas o evaňjelium.

⁵O Filip geľa andro foros Samarija a kazinelas lenge le Kristus.

⁶O manuša jekhetane igen šunenas oda, so vakerelas o Filip, a dikhenas o zazraki, so kerelas.

⁷Bo andral o but manuša, saven sas nalačhe duchi, gele ola duchi avri bara vikaha a but kaľiki the bange sasťile avri.

⁸Andre oda foros avľa baro radišagos.

⁹Mek angloda sas andre oda foros jekh murš, savo pes vičinelas Šimon. Ov vražinelas a o nipi andre Samarija ča denas avri o jakha. Ov phenelas pal peste, hoj hino vareko baro.

¹⁰Savore, bare the cikne, les igen šunenas a phenenas: “Ov hino odi Bari zor le Devleskeri.”

¹¹Igen mištes les šunenas, bo imar but kerelas maškar lende o čari.

¹²Ale sar pačanďile le Filiposke, savo lenge vakerelas pal o Devleskero kraľišagos the pal o nav Ježiš Kristus, denas pes te bolel o murša the o džuvľa.

¹³The oda Šimon pačanďiľa, diňa pes te bolel a ľikerelas pes paš o Filip. A sar dikhľa, hoj pes keren bare ďivi the zazraki, čudaľinelas pes.

¹⁴Sar pes o apoštola andro Jeruzalem došunde, hoj e Samarija priiľa o lav le Devleskero, bičhade ke lende le Peter the le Jan.

¹⁵Sar ode doavle, modľinenas pes vaš lenge, hoj te chuden le Sentne Duchos,

¹⁶bo mek na avľa tele pre ňikaste lendar a sas ča bolde andro nav le Rajeskero le Ježišoskero.

¹⁷Akor pre lende thovenas o vasta a on prilenas le Sentne Duchos.

¹⁸Sar dikhľa o Šimon, hoj o Sentno Duchos pes del aleha, hoj o apoštola pre lende thoven o vasta, anďa lenge love

¹⁹a phenďa: “Den the man odi zor, hoj oda, pre kaste thovava o vasta, te chudel le Sentne Duchos.”

²⁰O Peter leske phenďa: “Mi kirňon tire love the tuha, bo gondoľinďal tuke, hoj le Devleskero daros peske šaj te cinel vaš o love!

²¹Tu na sal jekh amendar andre kadi buči, bo tiro jilo nane žužo anglo Del.

²²Vašoda ker pokaňje andral kada binos a mang le Rajes, či tuke na odmukela oda, so tuke gondoľinehas andro jilo.

²³Bo dikhav, hoj sal andre kirko hamišagos a phandlo andro binos!”

²⁴O Šimon odphenďa: “Mangen le Rajes vaš ma, hoj te na avel pre ma ňič olestar, so phenďan.”

²⁵Sar imar o apoštola dine avri o sveďectvo a vakerde le Rajeskero lav, avenas pale andro Jeruzalem. Pal o drom vakerenas avri o evaňjelium andro but Samaritanska gavora.

²⁶O aňjelos le Rajeskero prevakerďa ko Filip a phenďa leske: “Ušťi a dža pro juhos, pro drom, so džal andral o Jeruzalem tele andre Gaza.” Pal oda drom pes imar akana igen na phirel.

²⁷O Filip ušťiľa a geľa. Dikhľa muršes Etiopanos, savo sas baro manuš, eunuchos la Kandakakero, la kraľovnakero andral e Etiopija. Ov sas upral savoro lakero barvaľipen a sas andro Jeruzalem te lašarel le Devles.

²⁸Džalas pale khere, bešelas pre peskero verdan a genelas le prorokos Izaiaš.

²⁹O Duchos phenďa le Filiposke: “Dža pašeder a dochude o verdan.”

³⁰Sar doavľa o Filip šunďa les te genel le prorokos Izaiaš a phenďa: “Či achaľos oda, so genes?”

³¹Ov odphenďa: “Sar šaj achaľuvav, te mange ňiko na sikavel?” A mangľa le Filip, hoj te bešel paš leste a te džal leha.

³²Oda, so genelas le Devleskere Lavestar, sas kada: “Ľidžanas les sar ovečka te murdarel a avke sar o bakroro na del avri o hangos anglal oda, ko les strihinel, avke aňi ov na phundraďa peskero muj.

³³Ov sas tele dikhlo a na sudzinde les avke, sar kampľa. A ko šaj vakerela pal leskero potomstvos, te leskero dživipen pes lel pal e phuv?”

³⁴O eunuchos odphenďa le Filiposke: “Mangav tut, pal kaste vakerel o prorokos? Pal peste, či pal avreste?”