MII GUN MIINU MO 8:3-34

³Hila Shawuul mii’da nyor ka daran du kagahara mo mmoshi/a ḵaniisa is mo dhali mmocic̱a a’di gu’bi ’baar ki ’beles mo tani a’di ki dir ’kwaniŋ gwas mo dhali ’kwani up̱ si’da/ ’ko’da ’cesh mo mmodhu uniya sijin mo.

⁴Uni si’da/ kun c̱ekerki bwa mo tani uni iikin mo mmoṯor gwo ki lala’th mo be.

⁵Dhala P̱ilibbus ya’d ka luŋgu’b mo e Pan Saamira mo be dhali c̱i uni gwo mo goma Ḵrisṯẖos yan mo.

⁶Dhala waambuhany ’kwani c̱ina dum buni ki bwan ṯal ’de/ ki gwo kun ṯorkin ma P̱ilibbus mo me’d jin ciḵa uni gwo mo dhali momer misha uni kun miikina a’di mo be.

⁷’Peni uni ka ris kun bu’th ma rum thus kun nyo/on mo tani arum thus pikin mo mmocuuna uni ki dhan ’twa/ kun caaca mo dhali uni tana ris kun muṯṯa/ is mo dhali kun ta ŋwol mo tani uni wac̱kunu mo be.

⁸Dhali mom’bor bwa caaca di’di pa c̱aan mo be.

⁹Wathiŋ kamu/ di’d jin yuḵu gway ka Simaan mo. Nṯwa/a/ mo tani a’di mii’da ruma tiya e pa c̱aan mo dhali ’Kwani gi Pan Saamira meren gom gwo jin ona a’di uni ki a’di ki is piti ta a’di jin ca’d ki tiya mo.

¹⁰Dhali uni ’baar c̱i is buni ki gwom piti ’peni a’di jin gwa’da’d ntagi a’di jin ca’d mo mmo/o gwo mo ki: Wathi/ yan ta ji gi mom’bi’th ma Arumgimis jin yuḵu ki A’di jin Ca’d mo be.

¹¹Dhali uni c̱i is buni ki gwom piti mo gom a’di mer uni is ki mii ma rum piti isa gush mo.

¹²Hili ki uni gam gwo ma P̱ilibbus is jin ṯorkina a’di gom gwom ’borga/ gom Bampa/ ma Arumgimis mo dhali gway ma Yesus Ḵrisṯẖos mo tani uni miikunu ki yi’de/ mo ki gwasi lu/ mo dhali ki up̱i lu/ si’da/ mo be.

¹³Dhala Simaan ki is piti si’da/ a’di gam gwo is mo dhali miikunu ki yi’de/ mo. A’di nyaḵ c̱a’b ka P̱ilibbus mo mmohil momer mo dhali dhan miimer kun caaca kun miikunu mo tani a’di merki’d mo be.

¹⁴Hili ki imandhunu ki she/ mo kun ’koni Pa Urushaliim, ki uni ciḵki ki ’Kwani gi Pan Saamira bu’thki gwo ma Arumgimis mo tani uni ki ṯuca Buṯerus uni ka Yohaan ki iiku/ i uni mo.

¹⁵Ki uni thulkin ka luŋgu’b mo tani uni ’thon gom uni ki uni mini ’taki bu’th Shi/in Dheleladhelel mo

¹⁶haali/ a’di diki ya ap̱o/ jamu/ i bwam uni naskina/ mo. Uni miikunu ki yi’de/ jasi ki gway gi Tap̱a Yesus ’te/ mo.

¹⁷Ŋ’ko’d mo tani uni dhu uni me’di ’kup̱ mo dhali uni bu’thki Shi/in Dheleladhelel mo be.

¹⁸Dhali ka Simaan p̱arki uni e mo mmodhuna imandhunu ki she/ uni me’di ’kup̱ mo tani Shi/in Dheleladhelel c̱ikunu mo a’di ki ṯor uni aguurush i e mo,

¹⁹mmo/o gwo mo ki: C̱iyaa/ mom’bi’th yan si’da/ mo ma, ki wathiŋ kamu/ jin miga/ ’taki kar me’d pemi ’kup mo tani ki a’di si’da/ midi ’taki bu’th Shi/in Dheleladhelel mo.

²⁰Hila Buṯerus ki thoḵ a’di gwo mo ki: Aguurush pini dhalki a’di nyaḵ sho’k ’ce’d ki /e mo haali/ /e ṯoshki gam to jin c̱in ma Arumgimis ki me’d ka guurush ’te/ mo.

²¹/E dar gi to walla mii e gwo yan mo haali/ adum pini diki ’bor ibwambor ma Arumgimis mo be.

²²Rici adu is mo gom miinthus pini yan mo dhali ’thoyi Tap̱a mo ma, ki gwo jin kuluma /e ibwa wakan mo minu ’taki gwam /e mo.

²³Haali/ mishga/ ki /e din e mo ma c̱i/ jin ḵa/aḵa/ mo dhali mondeḵu gi miinthus mo.

²⁴Dhala Simaan thoḵ a’di gwo mo dhali o gwo mo ki: ’Thoyi Tap̱a gom aha/ mo ma ki to gwansan kun ona um mini ’koki ’taki p̱u’du/ ap̱o/ aha/ mo.

²⁵Dhali ki uni c̱i gwonṯor buni mo dhali ṯor gwon Tap̱a mo tani uni doḵkin ka nyaŋ’ko’d mo mPa Urushaliim mo dhali ṯor gwom ’borga/ eya ris pa gi ’Kwani gi Pan Saamira mo be.

²⁶Hila man’doyu gwo gi Tap̱a ki owa P̱ilibbus gwo mo ki: Cuyi mis mo ma dhali yayi ’kup̱ ki ’ko’d gwar ka biny cam ki bway jin ya’d ka luŋgu’b ’peni Pa Urushaliim mo ntagi Paŋ Ghassa jin ta mombwaasho mo.

²⁷Dhali a’di ki cu mis mo dhali ya mo. Dhali hili Wathi/ gi Paŋ Gale/ di’d jin ta mantil mo dhali jin ta tap̱a jin ca’d ’pena Kandaaka, a’bom jin ta’da maliḵ gi ’Kwaniŋ Gale/ mo. A’di ta’da mandhuwa guurush piti ’baar mo. A’di si’da/ yayi’di Pa Urushaliim mmoluŋ mo be.

²⁸Dhali a’di di’d mmodoḵ ka nyaŋ’ko’d mo dhali a’di c̱a’bki’d i bwaman ma arabiya jin dira shumarum mo dhali di’d mmodeŋ gwo jin ’kwarkin ma manc̱i gwo ma Arumgimis kadhamo/ e mo jin yuḵu ka Ishaya mo be.

²⁹Dhali Shi/in Dheleladhelel ki owa P̱ilibbus gwo mo ki: Shori is pini mo ma dhali ’dishi a/arabiya yan is mo.

³⁰Dhala P̱ilibbus guski’di a’di mo dhali ciḵ gwo jin deŋa a’di gwo e mo jin ’kwarkin ma manc̱i gwo ma Arumgimis kadhamo/ mo jin yuḵu ka Ishaya mo tani dhali o a’di gwo mo ki: Gwo jin deŋa /e e mo tani misha /e ’ban mo ’taa?

³¹Dhali a’di ki o gwo mo ki: Miga/ mish ’peni mana ki dar gi wathi/ mmothuḵ aha/ gwo isi ciki/ mo. Dhali a’di yuḵki’da P̱ilibbus mo mmoseyu/ a/arabiya mo dhali nyaḵ c̱a’b ki a’di mo.

³²Dhali gwo ’peni Gwo ma Arumgimis jin ’kwaru jin deŋa a’di e mo tani wa cikise/ mo be, jin o’d ki: A’di susu me’d ḵa’bal mmo’ciṯẖ ’kus mo dhali me’d ari ḵa’bal jin mol ’twa/ wal ibwambor ma man’ciṯẖ a’di amur piti mo tani wakan si’da/ a’di diki c̱ee ’twam piti mo.

³³Dhali mmokara a’di is piti ki gwa’d mo tani mondwall gwom piti ḵwa/u mo ’peni a’di mo. ’Kwani kun tana anyaḵum yil ki a’di mo tani kaja a’di jin midi c̱i gwo ki lala’th mo? Haali/ mondiki/em piti gunu ’peni mony’cesh yansan mo.

³⁴Dhali a’di jin ta mantil oki’da P̱ilibbus gwo mo ki: Ṯor aha/ gwo mo ma, amanc̱i gwo ma Arumgimis kadhamo/ yin mo tani a’di ṯori gwo goma ja sa/? A’di ṯorki gwo gom is piti mo ’taa? walla gom wathiŋ kamu/ mo.