HECHOS 8:3-34

³Chaykamanka Sauloka Jesukristuta kreyik runakunata chiknishpa sukaman sufrichirkansapa. Wasin wasinpi yaykushpa ullkukunata warmikunata apirkansapa pushanankunapa karselpi wichkachik.

⁴Chashna Jesukristuta kreyik runakuna Jerusalenmanta nitikushpankuna maypicha chayashpankuna yachachikuksapa Jesukristu salvakuk kananta.

⁵Felipi nitikushpa Samaria partipi ashwan atun llaktapi chayarkan. Chaypi chayashpa Jesukristu yachakushkanta kallarirkan yachachikuyta.

⁶Chay llaktapi kawsak runakuna sukaman kushikushpankuna aypa milagrukunata ruraptin kawashpankuna Felipita allita uyarirkansapa.

⁷Felipika aypa supayadu runakunatapish alliyachirkansapa. Chay supaykuna unkuchishkan runakunamanta kaparikushpa llukshirkansapa. Chaymanta aypa mana kuyuy atipak aypa mana puriy atipak runakunata alliyachirkansapa.

⁸Chashna aypa unkudukunata sanuyachiptinkuna chay llaktapi kawsakkuna sukaman kushikurkansapa.

⁹Chay llaktapi kawsarkan suk runa Simon. Ñawpa chay Simonka ñakakushpa kawsak. Ñakakushpa aypa runakunata llullachishpa kreyichirkan sumak yachayuk kananta.

¹⁰Tukuy chay llaktapi kawsakkuna taksha atun paytaka sukaman allita uyarishpa willaksapa: “Tata Dios yanapaptin kay runaka sukaman yachaysapami.”

¹¹Aypa watakunata chay Simonka ñakakushpa chay runakunata llullachirkansapa. Chayrayku willashkankunata sukaman manchashpankuna kasuksapa.

¹²Chay llaktapi Felipika yachachikurkan Tata Dios kamachikuk kananta Jesukristu salvakuk kananta. Chaypina aypa ullkukuna warmikuna yachachikunanta kreyishpankuna bawtisakurkansapa.

¹³Chay Simonpish Jesukristuta kreyishpa bawtisakurkan. Chashna bawtisakushpa Felipiwan tantalla purirkan. Sukaman almirarkan Felipi almirana milagrukunata ruraptin.

¹⁴Chaypina Jerusalenpi chay yachachikuk runakunaka yacharkansapa Samariapi aypa runakuna Tata Diospa rimananta kreyinankunata. Chayta yachashpankuna Pedruwan Juanta kacharkansapa ashwan allita yachachikunankunapa.

¹⁵Pedruwan Juanka Samariapi chayashpankuna Tata Diosta roygarkansapa chay mushuk kreyikukkunapish Espiritunta chaskinankunapa.

¹⁶Chay runakuna Jesuspa shutinllapira bawtisakurkansapa. Tata Diospa Espiritunka manara paykunaman shamurkanrachu.

¹⁷Chaypina Pedruwan Juan chay runakunapa umankunapi makinkunata churaptinkuna Tata Diospa Espiritunta chaskirkansapa.

¹⁸Chayta kawashpa chay Simonka Pedruta Juanta kullkita pagaranayarkan.

¹⁹Willarkansapa: —Ñukatapish yachachiwaychi atipanaynipa runakunapi makinikunata churaptini Tata Diospa Espiritunta chaskinankunapa.

²⁰Chashna willaptinna Pedruka willarkan: —Kanka yuyanki ñukata kullkita pagarawaptiki Tata Dios yanapashunaykita. Chashna yuyaykuptiki Tata Dios sukaman kastigashunka.

²¹Tata Diospa ñawpakninpi mana alli yuyayuk runa kanki. Chashna yuyaykuptiki payka mana yanapashunkichu.

²²Chay mana alli yuyanaykimanta wanashpa Tata Diosta roygay perdonashunaykipa.

²³Ñukaka kawayki uchaykillapira kaptiki. Kunankaman ñakakushkaykita mana wanankichu.

²⁴Chashna Pedru willaptin Simonka aynirkan: —Kankunaka Tata Diosta roygapaychi ama rimashkaykichitashina kastigawananpa.

²⁵Chay llaktapi Juanwan Pedruka Tata Diospa rimananta allita yachachikurkansapa. Chaymanta Samaria partipi aypa llaktillukunapi Jesus yachachishkankunata yachachikuyllapi rirkansapa Jerusalenpi chayanankunakaman.

²⁶Chaymanta Pedruwan Juan kutishkankunawasha Tata Diospa angelnin Felipita willarkan: —Rillay Jerusalenmanta Gasa rina ñanta. Chay ñanka chunlla chakidu partita rin.

²⁷Chashna chay angel willaptinna Felipika rirkan. Chay ñanpi suk Etiopiyamanta runawan tinkunakurkan. Chay runaka Etiopiya llaktapi kamachikuk warmipa kullkinta kuydak karkan. Payka Tata Diosta kuyak rishkanwasha Jerusalenmanta llaktanman kutiykarkan.

²⁸Kaballu aysaptin karrunpi tiyaridu riykarkan. Chashna karrunpi riykashpa ñawpa yachachikuk Isaiyaspa killkadunta leyiykarkan.

²⁹Chaypina Tata Diospa Espiritunka Felipitaka willarkan: —Mash chay karruta ladunchay.

³⁰Chaypina Felipi ladunchashpa uyarirkan chay ñawpa Isaiyaspa killkadunta leyiykaptin. Chaypina chay runataka tapurkan: —¿Ariya entiendinkichu kay killkadu leyiykanaykita?

³¹Chashna tapuptinna chay runaka aynirkan: —Mana ni pi yachachiwaptinka ¿imashnatí atipasha entiendiyta? Chaypina Felipita roygarkan karrunpi yaykushpa ladunpi tiyarinanpa.

³²Chay runa Tata Diospa rimanan leyishkanka kashna riman: “Tata Diosmanta shamudu runata suk ovejatashina pusharkansapa wañuchik. Suk oveja mana nima kaparinchu millwanta tipipuptinkuna. Chashnashina Tata Diosmanta shamudu runata sufrichiptinkuna mana nima kaparirkanchu.

³³Paytaka asichishpankuna pinkachirkansapa. Mana nima uchayuk kaptinpish kastigarkansapa. Wañuchishkankunarayku payta kreyikkuna mana yupaypa layata aypayankasapa.”

³⁴Chayta leyishkanwasha chay Etiopiyamanta runaka Felipita tapurkan: —May willaway. Chay ñawpa yachachikuk runaka ¿kikinpachu killkarkan chikan runapachu?