Senesis 2:7-22

⁷Evus, Iahova kur hati atan tai ka mumon meatin eni. Mumoni evus, museh en eang onen ten moulien va en vulingasin, ka meatin moul mea.

⁸En out koa ist, Iahova mumon mari ah tai en out koa avise en ‘Iden.’ Ka en out enek, kei ling meatin koa mumoni mul ien.

⁹Ka en ah koanek, Iahova sakin mormore vatiai tateisav vasi keil amoul ason heite tahos imok. Ka luhu en ah enek, vatiai elu lumul ien: tai koa heite teni kilea vasan moulien ten lisenges, ka tamun koa heite teni kilea vasan ileilien ten asa koa tahos ka asa koa tisa.

¹⁵Evus, Iahova ling meatin en Ah Iden, voum en atan ka valosil kati.

¹⁶Ka viteni mini vit, “Keik kokilea kovaan heiai vasi keil koa amul en ah ekok.

¹⁷Ka vatiai tas koa kilea vasan ileilien ten asa koa tahos ka asa koa tisa navong kokan heite teni, vatiai enek konaantei varei heite. Veni en hati avong koa kiani, kimat.”

¹⁸Evus, Iahova viteni vit, “Rotahostei keke meatin vato sasen. Numon meatin tamun hekatauni, ka keilu luheto out hetas.”

¹⁹Sakini, tirendan vasi keil ka aman keil koa Iahova mumon keil tuai en atan, lah ruain keil umai ven meatin enek keke valesi ka valing ise. En sise enek, keil akur ise.

²⁰Mukonek, meatin enek ling isen aman vasi keil ka en tirendan keil emun. Ka rovotin etai koa vavinvin vato vatal mini ka vakatauni.

²¹Sakini, Iahova mumon meatin meten mulong ka matil ravobong. Ka navong kei matil, kulat sin tai ten koun, ka mum revi aven eris.

²²En sin enek, mumon ahin eni, ka kuri va min meahos.