SAN LUCAS 23:18-53

¹⁸Te ñayuu cuehē ún, ɨnuú‑ni ni cacana jee i: Na cúū tēe jíñá, te siáá ní Barrabás, achí i.

¹⁹Te Barrabás íne de vecāa sɨquɨ̄ jeē ni stónda de ñayuu sɨquɨ̄ tohō ini ñuu ún, te ni jehni de ndɨ̄yɨ.

²⁰Te Pilato cuní de siáá de Jesús, te ni cahān tucu de jíín ñáyuu.

²¹Te máá i víhyá gā ni cacana jee i: Cata caa ní de jicā cruz, na cúū de, áchí i.

²²Te ni cahān tucu de jíín i vuelta unī: ¿Na cuēchi ni sáha de núu súcuan? Tu ní níhín cuɨtɨ rī ni ɨɨn cuēchi sɨquɨ̄ de jeē cúū de. Núu súcuan te na cuáha ri castigo de, te siáá rī de quihīn de, áchí Pilato.

²³Te víhyá gā ni cacana jee ñayuu un, ní cacahān nīhin i jeē na cúū yā jicā cruz. Te máá i jíín táca sútū cácujéhnu, ni cacana jee ndasɨ́ i. Te ni cacundeyɨ́ i ni cascáhān i Pilato jeē na cúū yā.

²⁴Yūcuán na te ni ndacu Pilato jniñu jeē na cóo nájnūhun cácuni i.

²⁵Te ni siaá de tēe jeē ní cajicān i, tēe jeē íne vecāa jeē ni stónda de ñayuu sɨquɨ̄ tohō te ni jehni de ndɨ̄yɨ. Te ni jēhe de jnūhun jeē na cúū Jesús nájnūhun cácuni i.

²⁶Te cuangoo tācá soldado jiín yá jeē cahni de ya jicā cruz. Te ni canihīn de ɨɨn tēe ñuu Cirene, nání de Simón, vendiji de jeē ni jéhēn de rancho. Te ni catejníñu de tēe un jéē cóndiso de cruz yā quihīn de yatā yā.

²⁷Te cuehē ndasɨ́ ñáyuu ndíquín i yatā yā cuangoo i. Te suni cuehē ñahan cuangoo ña, te cándahyū cohó ña jeē cácucuíhyá ni ña jehē yā.

²⁸Te ni ndió cóto Jesús nuū ña, te ni cahān yā: Róhó ñahan Jerusalén jijnáhan ró, ma ndahyú rō jehē rī, chi sa suhva ndahyū rō jehē maá ró jiín jéhē sēhe ró jíjnáhan i.

²⁹Chi quee quɨvɨ̄ jeē coo jnūndóho xeēn sɨquɨ̄ rō, te cahān rō: Yōhyo ndetū tācá ñahan númá, jíín jéē tu ní scácu sēhe, jíín jéē tu ní cóndeca yɨquɨ́n, chi tú sēhe ña jeē jnahuhū ni ña jeē ndóho i, achi rō jijnáhan ró.

³⁰Quɨvɨ̄ ún te quejéé ñáyuu cahān i jíín táca yucu: Cotúú sɨ́quɨ̄ rī jijnáhan ri návāha cuu rī. Te suni jíín táca loma: Casɨ sɨquɨ̄ rī jijnáhan ri, achi i.

³¹Chi núu cásáha xeēn i jíín rúhū jeē tú na cuēchi ri, te nagā ni cuu jeē ma cóo xeēn sɨquɨ̄ ndɨhɨ ñayuu chi íyó cuéchi i. Achí yá.

³²Te suni cuangoo de jíín úū tēe ni casáha cuēchi xeēn, jeē suni cuu de jíín yá.

³³Te ni jinūcoo de lugar nuū naní Yɨquɨ Xíní, te yūcuan ní cacata caa de ya jicā cruz. Te suni ni cacata caa de ndɨndúú tée ni casáha cuēchi xeēn un núū uū gā cruz, ɨɨn de lado váha ya, te ɨnga de lado jecó yá.

³⁴Te níní jéē súcuan cúu, te ni cahān Jesús: Tátā, cone cáhnu ni ni núū de jíjnáhan de, chi tu cájini de na vé casáha de, áchí yá. Te soldado un ní casáha de sorteo jeē sɨquɨ́ ndese nihīn ɨɨn ɨɨn de sahma ya.

³⁵Te cáhīin ñayuu yūcuan, cájito i nuū yā. Te suni nde tēe cándiso jníñu, cácahān catá de cájito de ya: Núu ɨnga ñayuu ni jnama de, te na jnáma de máá de vijna, te núu ndaā jeē Cristo jeē ní nacāji Yaā Dios cúu de, áchí.

³⁶Te tācá soldado suni ni casácatā de nuū yā, chi ni quecoo de nde nuū yā, te ni cajēhe de vinagre iyá coho ya.

³⁷Te cácahān de jíín yá: Núu máá ró cúu Rey ñayuu hebreo, te na jnáma ró máá ró, achí de.

³⁸Te suni ni īyo jnūhun jeē ndeé xinī cruz yā jeē cahán na sɨquɨ̄ ni jíhī yā, te suhva yósó jíín yuhu griego jiín latín jiín hebreo: Yāha cúu Rey ñayuu hebreo, achí.

³⁹Te ɨɨn jeē ndɨndúú tée ni casáha cuēchi xeēn, jeē cándita caa, ni cahān neé de nuū yā: Núu máá ró cúu Cristo, te na jnáma ró máá ró te suni jnama ró ndɨndúú rí, achí de.

⁴⁰Te ɨnga de ni cahān de nuū jnáhan de: ¿A tu yúhú ró Yaā Dios naún? Chi ɨnuú cándoho yó jíín Yaā yáha.

⁴¹Te máá yó chi vetū‑ni cándoho yó, chi yāha cánihīn yō castigo sɨquɨ̄ jniñu néé ní casáha yó. Te Yaā yáha chi tú ni ɨɨn cuēchi ní sáha ya, achí de.

⁴²Te ni cahān de jíín yá: Jesús, nucūhun ni ni sáña jéē quéjéé ní ndacu ní jniñu, áchí de.

⁴³Yūcuán na te ni cahān Jesús jiín de: Jendaá cahán rī jiín ró jeē víjna te condee rō jiín rí nuū jardín andɨvɨ́, áchí yá.

⁴⁴Te nuū ní cuu nájnūhun cahuxī uū, te ni cunee nɨɨ́ cáhnu nde cahunī.

⁴⁵Te ni cujnúú níāndii. Te sahma ndíta caa jeē ndihyú cuarto iī ini templo cáhnu, ni ndatā‑ni sava sava.

⁴⁶Yūcuán na te ni cana jee Jesús: Tátā, naquihin ní ánuá na, áchí yá. Te súcuan ni cahān yā, te ni jihī‑ni ya.

⁴⁷Te tēe nación Roma jeē cúu capitán ni jito de jeē súcuan ni cuu, te ni cahān de jeē yóhyo cújéhnu Yaā Dios, te áchí de: Jendaá ndije jeē tée tú na cuēchi cúu tēe yáha, áchí de.

⁴⁸Te ndɨvii ñayuu cáhīin yūcuan ní cajito i tāca jéē ní cuu, te cácani i yɨ̄quɨ jícā i jeē cájnahuhū ni i, te ni nandió cóo i cuanungoo i.

⁴⁹Te tāca ñáyuu cájini jnáhan jíín yá, jiín táca ñahan Galilea jeē ní cajica ña jíín yá, cáhīin jícá ña cájito ña tāca jéē ní cuu.

⁵⁰Te ni īyo ɨɨn tēe vāha tēe ndaā, nání de José. Te tēe ñuu Arimatea ndañúū Judea cúu de. Te cúu de jnáhan tāca tée hebreo cácujéhnu ga jeē casáha junta.

⁵¹Te ñúhun ni de jeē quiji quɨvɨ̄ jeē ndacu Yaā Dios jniñu, te suni tu ní nújnahan ni de jeē ní casándaā junta un jéē cúū Jesús.

⁵²Te tēe un ní jehēn de nuū Pilato, ni jicān de yɨquɨ cúñu Jesús.

⁵³Te ni snúu de ya jicā cruz, te ni chusúcún de ya ɨɨn sahma cuitá. Te ni chindūji de ya ini ɨɨn yaū jeē ní caan jicā ɨɨn cava, nuū ná tu quindūji ndɨ̄yɨ.