Lukas 23:18-53

¹⁸Iwe, ewe mwichen aramas a köpökütä, “Kopwe amäloi ewe aramas, nge kopwe amusa ngenikem Parapas.”

¹⁹(Parapas a fen nom lon imwen fötek pokiten an afisätä eu fitikoko lon ewe telinimw, pwal fän iten an niela aramas.)

²⁰Pilatus a fokun mochen angasala Jesus, iei mine a kapassefäl ngeni ewe mwichen aramas.

²¹Nge ir ra chök kökkö ngeni, “Kopwe iräpengesi, kopwe iräpengesi!”

²²Iwe, Pilatus a kapas ngeniir fän aülüngatin, “Pwota? Meni sokun tipis a föri? Üsap küna ren ei aramas och tipis an epwe ina popun pwe epwe mäla. Iei mine üpwe chök wichi o amusala.”

²³Nge ekewe aramas ra chök sopwela le kökkö fän leüömong o tüngormau pwe epwe iräpenges. Feilfeil a pwönüetä mine ra eäni kökkö.

²⁴Iei mine Pilatus a apwüngala, pwe epwe fis ngeni Jesus mine ra tüngor.

²⁵A amusala ewe mwän mi nom lon imwen fötek pokiten an afisätä fitikoko me niela aramas, i ätewe ra tüngor an epwe musala. Nge a mwüt ngeniir Jesus pwe repwe föri ngeni mine ra mochen.

²⁶Iwe, lupwen än ekewe sounfiu etekinala Jesus won ewe al, ra churi eman mwän seni Kirene, itan Simon, a feito seni lemäl, pwe epwe tolong lon ewe telinimw. Ekewe sounfiu ra turufi Simon o ekietä ewe iräpenges won afaran pwe epwe mwärela mürin Jesus.

²⁷Eu mwichen aramas mi chomong ra tapwela mürin. Iwe, a wor ekoch fefin me leir mi ngüngüres o kechüeiti Jesus.

²⁸Nge Jesus a sap ngeniir o üreniir, “Ämi fin Jerusalem! Ousap kechüeitiei, nge oupwe püsin kechüeitikemi me nöümi kana.

²⁹Pun repwe war ekewe rän, lupwen aramas repwe apasa, ‘Feiöchün ekewe fefin mi rit, ekewe fefin resap nöünöü, pwal ekewe resap oupwu semirit.’

³⁰Mürin repwe kapas ngeni ekewe chuk, ‘Oupwe turutiu wom,’ repwe pwal kapas ngeni ekewe chukutekison, ‘Oupwe pwölükeemila.’

³¹Pun are ekei sokun mettoch repwe fis lupwen ewe irä a manau, met epwe fis lupwen a pwasala?”

³²Ra pwal etekinala ruoman mwän mi föföringau pwe repwe ninnila fiti Jesus.

³³Iwe, lupwen ar tori ewe leni a iteni Poisökün Mökür, ra iräpengesi Jesus ikenan fiti ekewe ruoman chon föföringau, eman a nom lepelifichin, nge eman a nom lepelimöngun.

³⁴Iwe, Jesus a apasa, “Semei, kopwe amuserela, pun resap silei mine ra föri.” Ra üttüt won üfan kana o ra ngeni eman me eman met üttian.

³⁵Iwe, ekewe aramas ra ütä ikenan o kakatol, nge ekewe sounemenemen chon Juta ra turunufasei Jesus o apasa, “A amanaua ekoch, epwe püsin amanaua are i Kraist, ewe Kot a filätä.”

³⁶Ekewe sounfiu ra pwal turunufasei Jesus. Ra feito ren o ekiekin aünü ngeni wain mi mwäl.

³⁷Ra apasa, “Are en nöün ekewe chon Juta king, kopwe püsin amanauok!”

³⁸Asen möküren Jesus a mak ekei kapas, “Iei i ewe kingen chon Juta.”

³⁹Iwe, eman lein ekewe chon föföringau mi iräpenges ikenan a turunufasei Jesus o üreni, “Ifa usun, sap en Kraist? Kopwe püsin amanauok o pwal amanauakem!”

⁴⁰Nge pwal ewe eman chon föföringau a apwüngü o üreni, “Ifa usun, kosap niuokusiti Kot? A pwüngüla om kopwe mäli ei sokun mäla usun chök i.

⁴¹A fokun pwüng mine ra apwüngükich ren, pun kich sia angei liwinin ach kewe föför. Nge ei mwän esap föri och föför mi mwäl.”

⁴²Mürin a üra, “Jesus, kose mochen chechemeniei lupwen om kopwe tolong lon mwumw.”

⁴³Iwe, Jesus a pölüeni, “Enlet, üpwe ürenuk, ikenai kopwe etiei lon Paratis.”

⁴⁴Ina epwe kulok engol me ruu akkar esap chüen tin nge a rochopwak unusen ewe fanü tori kulok ülüngat.

⁴⁵Iwe, ewe chechen mangaku lon imwenfel a kam seni won tori fan pwe a wor ruu kinikin.

⁴⁶Mürin Jesus a kökkö fan mwelian mi leüömong, “Semei, üa atolonga ngüni lepoumw.” Wesin an apasa ei a mäla.

⁴⁷Iwe, lupwen ewe meilapen sounfiu a küna mine a fis, a mwareiti Kot o apasa, “Enlet, ei mwän i eman mwän mi pwüng.”

⁴⁸Lupwen ewe mwichen aramas mi chufengen ikenan pwe repwe katol mwökütükütün met a fis ra küna ei, ra pisiri fän mwäriir lon ar letipeta o liwiniti lenier.

⁴⁹Nge chokewe meinisin mi sisile Jesus me ekewe fefin mi tapwela mürin Jesus seni Kalilea ra ütä ekis toau ar repwe küna mine a fis.

⁵⁰Iwe, a wor eman mwän itan Josef seni Arimatea eu telinimw lon Jutea. Ätei eman seni ewe mwichen souapwüng, eman mwän mi pwüng o wenechar.

⁵¹Esap tipeeu ngeni mine ra pwüngüpwüng won pwal ar föför. Iwe, a ösüküsükü ewe Mwün Kot.

⁵²Iwe, Josef a feila ren Pilatus o tüngor somän Jesus.

⁵³Mürin a angeatiu somän Jesus me won ewe iräpenges, a finiti ngeni eu mangaku mi pwechepwech o peiaseni lon eu peias mi tuw lon achau, esap wor mwo eman somä a nom lon me mwan.