San Lucas 23:18-53

¹⁸Pero nochteh otsajtsikeh chikawak: —¡Xikmikti non tlakatl! ¡Xikkajkawa n Barrabás!

¹⁹Nin Barrabás otsaktoka porke otemikti iwa okimpajsolojka miakeh tlakah para makixnamikikah n gobierno.

²⁰Pilato oksepa okintlapowi n tlakah porke okinekia kikajkawas n Jesús.

²¹Pero yejwah oksepa otsajtsikeh: —¡Xikkrusifikaro! ¡Xikkrusifikaro!

²²Ipan eyi welta Pilato okinmili: —¿Tleka nonkinekih mamikki?, ¿tlan amo kuali okichi? Ne mach nikita satlawel tlajtlakole, kemi para makimotlanili imikilis. Nitlanawatis makitsonwitekikah iwa satepa nikkajkawas.

²³Pero yejwah okachi otsajtsiah chikawak iwa okitlajtlaniliayah makikrusifikaro n Jesús; iwa kemi yejwah satlawel otsajtsiah, okinekiltijkeh n Pilato makinchiwili tlan okitlajtlanilijtokah.

²⁴Ijkuakó Pilato okichi tlan yejwah okitlajtlanilijkeh,

²⁵iwa okikajka n Barrabás, non otsaktoka por okimpajsolojka n tlakah iwa por otemikti, otlanki okinnawati isoldadojwah makikrusifikarokah n Jesús kemi yejwah okinekiah.

²⁶Ijkuak yokiwikayah kikrusifikarotiweh n Jesús, okiyakanamikeh se tlakatl de Cirene non itoka Simón. Ye owalewaya de itlala iwa okitoktijkeh makimama n krus, iwa makikuitlapantoka n Jesús.

²⁷Miakeh tlakah de Jerusalén okwaltokayah n Jesús. Noiwa miakeh siwameh okichokilijtiayah iwa omoyolkokojtiayah.

²⁸Pero Jesús okimitak iwa okinmili: —Siwameh de Jerusalén, amo techchokilikah, yej ximochokilikah iwa xikinchokilikah nomopilwah.

²⁹¡Xikakikah!, witseh tonatijmeh ijkuak kijtoskeh: “Miak yolpakílistli para akimeh amo okimpixkeh impilwah, nion okonewajtikeh nion otlachichitijkeh.”

³⁰Ijkuakó n tlakah pewas kinmiliskeh n tepemeh: “Xiwetsikah topah”; iwa kinmiliskeh n tepeyomeh: “Techtlaatikah.”

³¹Pero tla ijkó kichiwah iwa n kuawitl xoxobik tlan kichiwaskeh ika non yowaki?

³²Noiwa okinwikayah ome ichtekeh iwa temiktijkeh para kinkrusifikaroskeh inajnakastla n Jesús.

³³Ijkuak okalakitoh kan tepetl non kiliah Miketsontekomatl, okikrusifikarojkeh n Jesús. Noiwa ompa okinkrusifikarojkeh ome tlachtekeh, se ik iyekma iwa n ok se ik iopochma.

³⁴Iwa ijkuak yokikrusifikarojtokah, Jesús okijto: —Notajtsi, xikintlapojpolwi, porke mach kimatih tlan kichiwah. Iwa n soldadojteh okinmotlatlanilijkeh itlakenwah n Jesús.

³⁵N tlakah de non altepetl okimawisojtokah, iwa asta n tekiwajkeh okipijpinawiayah n Jesús iwa okijtoayah: —Oksikimeh okinmakixti, axa, tla de milajka Ye n Cristo itlapejpenil Dios, mamomakixti inewia.

³⁶N soldadojteh noiwa okipijpinawiayah n Jesús, omopachoayah inawak iwa okitiayah vinagre,

³⁷iwa okiliayah: —Tla Te tirey de judíojtih, ximomakixti monewia.

³⁸Noiwa ik ikuatsontla okijkuililijkeh non okijtoaya: “Ye ni inrey n judiojteh.”

³⁹Seme de nonteh ichtekeh non okikrusifikarojkeh inakastla n Jesús, ijkí fiero okiliaya: —Tla te ti Cristo, monewia ximomakixti, iwa tejwah noiwa.

⁴⁰Pero non ok se ichtek okajwak iwa okili: —¿Amo tikmawilia Dios, maya ya tikmati san sika timikiskeh?

⁴¹Tejwah tikijyowijtokeh nin tlaijyowílistli porke otikmotlanilijkeh, pero nin tlakatl mach itla okichi.

⁴²Ijkuakó okili n Jesús: —Techilnamiki ijkuak pewas titlanawatis.

⁴³Jesús okinankili: —De milajka axa nimitsilia: tiyetos nowa kan moitstika Notajtsi.

⁴⁴Kemi tlajko tonati owaltleyuak itech neká tlali, iwa asta kemi las tres de tiotlak opanok n tleyuálistli.

⁴⁵N tonati okualok, iwa n kortina de n Weyi Tiopa, otlajkotsáyanki.

⁴⁶Ijkuakó Jesús ika chikawak tlájtoli okijto: —Notajtsi Dios, momak niktlalia noespíritu. Ijkuak ijkó okijto, omikki.

⁴⁷Ijkuak n soldado tlanawati romano okitak tlan otlamochijka, okiweyijkachi Dios iwa okijto: —Nin tlakatl milák yekmilajka.

⁴⁸Nochteh non ompa otlamawisojtokah, ijkuak okitakeh nochi tlan otlamochijka owalyayajkeh incha iwa omoelpanwitektiayah.

⁴⁹Pero nochteh akimeh okixmatiah n Jesús, iwa n siwameh non owalayah iwan Jesús desde Galilea, san wejka okoniitokah tlan otlamochijtoka.

⁵⁰Okatka se kualitlakatl non omonotsaya José, owalewatoka de se altepetl non itoka Arimatea. Ye noiwa tewa otekiwajtitoka kan Sanedrín.

⁵¹Nin José noiwa okichiaya ijkuak Dios pewas tlanawatis, yika mach okipakti tlan okichijkeh non de Sanedrín.

⁵²Ijkuakó n José okitato n Pilato iwa okitlajtlanili ikuerpo n Jesús.

⁵³Satepa okitemowito de kan krus iwa okikemelo ika se tlakemitl, otlanki okikalakito kan se miketékochtli non oichkuatoka itech tetl kan ayamaka okitlalpachoayah.