SAN LUCAS 23:18-53

¹⁸Tunga tu jngu kitsaꞌen jndare xutankjiun nga kiskiꞌndaya, ꞌba kitsu: —¡Ngatjanikꞌen xutabiu! ¡Tikꞌejñandainii̱ Barrabás!

¹⁹Barrabás kisꞌeya nduya, ngatꞌa ngajin naxinanda Jerusalén kiskjanko nchja xi tseꞌe Roma, ꞌba kitsikꞌen jngu xuta.

²⁰ꞌBa Pilato mejénre nga sikꞌejñandai Jesús, kui kjua jako ngani xutankjiun.

²¹Tunga xutankjiun ngisa ꞌñu kiskiꞌndaya, ꞌba kitsu: —¡Tjatꞌai kru xutabiu! ¡Tjatꞌai kru xutabiu!

²²ꞌBa xi majánni ndiya Pilato jako ngani, ꞌba kitsure: —Ngu, ¿mé= kjua xi chꞌotjin kitsaꞌen xutabi? Nimé tisakuna̱ xi ꞌbakore nga kueya. ꞌBamani, kꞌuexaa̱ nga sꞌe̱re ꞌba saꞌe suntjia̱n.

²³Tunga xutankjiun ngisa ꞌñu si kitsaꞌen nga tsiꞌare Pilato nga kꞌuetꞌa kru Jesús, kaꞌnda nga kjinisinre.

²⁴Kui kjua Pilato kitsjani enre nga kꞌuetjusunre mé= xi inyamiꞌa.

²⁵ꞌBa meni kitsikꞌejñandai xuta xi xutankjiun jaꞌajin, xuta xi kjiya nduya ngatꞌa kiskjanko nchja xi tseꞌe Roma ꞌba kitsikꞌen jngu xuta. ꞌBa kitsingantsja Jesús, tuxi sikoni jotsaꞌen mejénre xutankjiun.

²⁶ꞌBa kionga Jesús inyafikatꞌa kru, kitsuba jngu xuta xi tseꞌe nangi Cirene, xi Simón ꞌmi, xi ngijña tjindibani. Kui xi kitsikaꞌanijin kru, ꞌba kitjenngi Jesús.

²⁷ꞌBa nde nkjin xuta tjenngire ko yanchjin xi inyakjiꞌndantjai Jesús ngatꞌa kjimaꞌonre.

²⁸Tunga kitsikuꞌbe Jesús ꞌba kiskutsejenꞌa yanchjinbiu, ꞌba kitsure: —Jun yanchjin Jerusalén, bi an chiꞌndantjainuu̱. Tusa chiꞌndo ngatꞌa tsojon ꞌba ngatꞌa tseꞌe kiꞌndinu.

²⁹Ngatꞌa kjuaꞌe= nixtjin nga ꞌbi kuetsu xuta: “Ndaxure yanchjin xi ꞌndi, xi niñajanni kisꞌeyaꞌmore ninga bi kitsikaki kiꞌndi.”

³⁰ꞌBa kio kuetsure nindu: “Tixuneni.” ꞌBa kuetsure tjengiu: “Tꞌeꞌmoni.”

³¹Ngatꞌa tsa ꞌbi mataꞌen ya xkjuen, ngisa= tu ku̱ataꞌen kionga je kixi —kitsu Jesús.

³²ꞌBa tjenko nchjabiu jó nchja chꞌokun xi ꞌba nde kꞌuetꞌako kru Jesús.

³³ꞌBa kionga je echu ngaꞌnde xi Nindaku Mikꞌen ꞌmi, kio yatꞌa kru Jesús ko ngojó nchja chꞌokunbiu. Jngu ngate kixire ꞌba jngu ngate skjunre.

³⁴ꞌBa Jesús kitsu: —Naꞌen, tichatꞌa_ri, ngatꞌa bi be mé= xi inyatsaꞌen. ꞌBa chasoldadu kitsiskaya najñure Jesús, tuxi xianire ꞌyá= xi kꞌuakore ꞌba sikaꞌbire xinkjin.

³⁵ꞌBa kio inya xutankjiun nga inyakutsejenꞌa. ꞌBa kaꞌnda xutaxa inyatsisubare Jesús, ꞌba kitsu: —Kui xutabi kitsikꞌangi xuta xi kjaꞌere. Ngatatsikꞌangi tajngu yojore ngandaꞌe tsa kjuakixi nga kui xi Cristo xi Naꞌenchana jaꞌajin.

³⁶ꞌBa chasoldadu ꞌba nde inyatsisubare Jesús ngayeje. Kitsitiñatꞌare ꞌba kitsjare binu san.

³⁷ꞌBa inyatsure: —Tsa ji xi reyre xuta judío, tikꞌangi tajngui yojori.

³⁸ꞌBa nde kisꞌetꞌa ngasun nkꞌa ku Jesús jngu yate xi tsu: “Kui=bi xi reyre xuta judío.”

³⁹ꞌBa jngu xuta chꞌokun xi ñatjen kjitꞌako kru Jesús, ꞌbitsaꞌen chꞌo kitsure: —Tsa ji xi Cristo, tikꞌangi tajngui yojori ꞌba ꞌba nde tikꞌanginii̱ ji̱n.

⁴⁰Tunga xi ngijngu jatiko xutabiu, ꞌba kitsure: —¿A bi kunye Naꞌenchana, ninga ndekuini kjuanima temitjaꞌaxtiuni?

⁴¹ꞌBa tjin= ndiyare nga temitjaꞌaxtia kjuanima ña, ngatꞌa ꞌba fa ni tsaꞌen teꞌbechja jo kjiñaꞌan. Tunga kui xutabi tumé xi chꞌotjin kitsaꞌen.

⁴²ꞌBa saꞌe jako Jesús, ꞌba kitsure: —Jesús, tikjaꞌetsjen ngatꞌa tsaꞌan kionga je kuatexumai.

⁴³ꞌBa Jesús kitsure: —Kjuakixi= xi xinra̱, nga ngandaꞌe kuenikonaa̱ ngankꞌaa, ngaꞌnde ña nda chun.

⁴⁴ꞌBa kionga je mején nyusen nixtjinbiu, kuajñu ngayéje ngasunꞌndio kaꞌnda nga̱ chuba ján nga kuangixun.

⁴⁵ꞌBa tsuꞌbiu bi nde kjiꞌyanire. ꞌBa masen kitijndajen najñu xi kitjenchja ngaꞌnde xi ꞌñu tsje tseꞌe ningu.

⁴⁶ꞌBa Jesús ꞌñu kiskiꞌndaya, ꞌba kitsu: —Naꞌen, ngaya ndsai teꞌbejñaa̱ inimana̱. ꞌBa nga je ꞌba kitsu, kꞌen.

⁴⁷ꞌBa kionga xi ngakure chasoldadu Romano tsabe mé= xi kuán, kitsichjire Naꞌenchana, ꞌba kitsu: —Kjuakixi= nini nga kui xutabi jngu xuta xi kixi.

⁴⁸ꞌBa kionga ngatsiꞌi xutankjiun xi kio kuañajan nga inyakutsejenꞌa, tsabe mé= xi kuán, ꞌñu kjimabare nga kiji ngani ndaba.

⁴⁹Tunga ngatsiꞌi xuta xi bexkun Jesús kjin inya nga inyakutsejen mé= xi tjima. ꞌBa ꞌba nde kio inyajinre yanchjin xi jendetjenngi ꞌnda nga ꞌetju nangi Galilea.

⁵⁰ꞌBa kio tijña jngu xutaxa xi Kuse ꞌmi xi Arimatea tseꞌe, naxinanda xi tijña ngajinre nangi Judea. Xi nda xuta ꞌba kixi fiko yojore ngixkun Naꞌenchana.

⁵¹Xi ꞌba nde tikuyare nixtjin nga kuatexuma Naꞌenchana ꞌba xi bi tijngu kakun jo tsaꞌen joyare xutaxa xi yakꞌa ꞌba nga jo kitsaꞌen.

⁵²ꞌBa kui kikun Pilato ꞌba tsiꞌare yojore Jesús.

⁵³ꞌBa kionga je tsꞌajentꞌa kru, yaxtejun jngu najñu tjibe ꞌba yajñaya jngu tsju xi kitjuꞌngi jngu naxi, ña nisaꞌyajín sꞌeyanijin.