Luka 23:18-53

¹⁸Ma esega se eogayogalau, si ene, “Ina tau ta au abiyawa, na Baraba au eairigabaeyama arimai eai.”

¹⁹(Tau ta eanua i heasibuibuidi, eo i aiaiunu, arinai ia se tore numa masigiri eai.)

²⁰Pilato, bena Iesu i eairigabaeuioi, arinai i riba uio aridi eai.

²¹Na isi abo se eogayoga, si ene, “Ia au hesatauroeawa, ia au hesatauroeawa!”

²²Ma haiona hinage i ribalau aridi eai, i ene, “Ie saha, baaea esana ie abi? Ena mate paana nige ea lobai: abo ea lubilubini, eo ea eairigabaei.”

²³Se samadudui ma arina lailaidi si ene ia bena se hesatauro. Isi arinadi eo kohena lailai arinadi abo se hebigawatai.

²⁴Pilato abo i heribadi isibom edi nuatu abo se abiyawa.

²⁵Tau wa se tore numa masigiri eai paana tatao i heasibuibuidi eo i aiunu wa i eairigabaei, isi edi gadosisi wa i lauwatai: Iesu i moselaei edi samadudu eai wa.

²⁶Isi Iesu se woealaei, Kurene tauna esau esana Simona se toai, ealeba eai i laolaoma, satauro se toresae ia dabaearona eai, bena i bahei Iesu murina eai i laulauwatai.

²⁷Tatao peledi lailai ia se lauwatai, eo sisine, isi hinage ia se doudoui, eo se laulaukaporei.

²⁸Na Iesu i torobui aridi eai, i ene, “Ierusalema nanatunayao sisine e, tabu au doudouigu, omibom au doudouuioimiu, eo nanatumiuyao au doudouidi.

²⁹Na asubenadi abo se lagema aridi eai abo si ene, ‘Isi sisine se agaagari, eo nige se haihaisu, eo susudi nige se hemahemadoedi, se lolo ede.’

³⁰Isi abo se ribahetubu oea tupidi aridi eai, si ene, ‘Au buima potamai eai’; eo oea tupi gagiridi aridi eai abo si ene, ‘Au bubulitawaimai.’

³¹Paana ena teina ginauridi ta se ginauridi oeagi idaidaina eai, saha abo se abi oeagi kokoiagina eai?”

³²Tatao baaea labui hinage ia maenayao se woeaesegaidi se laedi bena se unuidi.

³³Isi se lage dimo wa arinai, ia ede esana se tore Moiyaru, metai ia abo se hesatauro tatao baaea labui wa maenayao, esau ia nima tutuna eai, eo esau ia nima seuseurina eai.

³⁴Iesu abo i ene, “Tamagu e, edi baaea ta u nuatugabaei; edi abiabi ta nige abina se ata.” Ana lulu se soi: kelero eai se ginauri.

³⁵Tatao wa se totoro se itaitalau. Tanuagayao hinage maedi ia se liuliuaei, si ene, “Hari tatao mo i hemauridi: ena ia Keriso, Eaubada i hineri, taba iabom mo i hemauriuioi.”

³⁶Iala tataodi ia hinage se liuliuaei, se laoma ia arinai vinega se helelesae arinai.

³⁷Eo si ene, “Ena oa Iudea edi wasawasa oabom u hemauriuioim.”

³⁸Uriuri esau hinage se urisae ia potana eai, Heleni, eo Roma, eo Heberu arinadi, si ene, “IA EDE TEINA TA IUDEA EDI WASAWASA.”

³⁹Tau baaea esau wa, se heabasi wa, Iesu i riba baaeaei, i ene, “Ena oa Keriso u hemauriuioim, eo ai taumai labui hinage u hemaurimai.”

⁴⁰Ana sagu wa arinana i heuio i ribasuui, i ene, “Eaubada nige u matausiei, eda mate esega ta hearo ta?

⁴¹Ita ta mate i lolo; eda laulau maisana ia ede: teina tau ta nige ena baaea.”

⁴²I ribalau Iesu arinai, i ene, “Guiau e, oa u laoma em basileia u abi abo u nuatuigu.”

⁴³Iesu i ribalau ia arinai, i ene, “Mamohoi, ea ribalaowa arim eai, wau ta oa abo maegu paradaiso eai.”

⁴⁴Huia wa doha mahana haligigi‐esegana, eo tanoubu i masigirigudui ie lau e mahana haligigi‐hasina eai.

⁴⁵Mahana i wahuwahuhuri, eo numa tabuna woeona duaduari eai i tapurisi‐helabuini.

⁴⁶Iesu abo ie eaba ma arina lailaina, i ene, “Tamagu e, earuagu ta ea leawa oa nimam eai”. Ena ribariba nei doha, abo i tubahai.

⁴⁷Na Senturion wa, wau laulau wa ie ita, Eaubada abo i aihelahui, i ene, “Mamohoi teina ta taulaulaududuraina ede.”

⁴⁸Tatao gamagamagari se oigogo wa bena se aiewai ginauri wa se itadi, nuapoudi se tubidi, eo se uiouio.

⁴⁹Ia ehanayao gamagamagari, eo sisine hinage Galilaia eai ia se hemuriwataiyama, eda lohaloha eai se tororo, teina ginauri se itaitalaedi.

⁵⁰Na, tau esau esana Iosepa, sunederi tauna esau, ia tau lolona, eo ena nuatu se dudurai:

⁵¹(Ia ede sunederi eai wa edi laulau nige i saguidi;) ia Arimataia tauna, ludea edi eanua esau: ia hinage Eaubada ena basileia i bagibagiei.

⁵²Wau tau wa ie lau Pilato arinai, Iesu sinarena i awanorini.

⁵³Ia sinarena wa i taruhidobeiyama, lulu linen arinai i sumasumaei, bousa eai ie tore, we’u se eatui wa gudana eai, sora nige tau esau arinai se tore.