SAN LUCAS 23:18-53

¹⁸Huan nochten san secnin opeuque tzahtzihque: ―¡Mamiqui inin huan xicahcahua in Barrabás!

¹⁹In Barrabás otzactoya telpiloyan ica se tlamohsihuilistli ipan in altepetl huan ic otemicti.

²⁰In Pilato oquinequiyaya tecahcahuas in Jesús huan oc sepa oquiniluic.

²¹Huan yehhuan oquihtohque ocachi chicahuac: ―¡Xicmictican ipan cruz!

²²Ic yexpa in Pilato oquihto: ―Tel, ¿tlen ahmo cuali quichiutoc? Ahmo nicahsi tlen itlahtlacol maquitlapanolti ica miquilistli. Niyau nictlapanolti ic maquihuihhuitequican huan satepa nicahcahuas.

²³Huan in tlacamen ocachi oquihtohque chicahuac mamiqui ipan in cruz, huan yehhuan huan in achtohque den tiopixcamen tequin chicahuac oquihtohque hasta ocahsique tlen oquinequiyayahque.

²⁴In Pilato omotemacac quichihuas in tlen yehhuan oquihtohque.

²⁵Huan ijcon oquicau inon tlacatl aquin oquitlapehpenihtoya, inon aquin otzactoya ica in tlamohsihuilistli huan noyojqui in temictiyani. Huan Pilato oquinmacti in soldados in Jesús maquichihuacan quen oquinejque in tlacamen.

²⁶Ihcuac otehuicaque in Jesús ic temictisque, in soldados oquiquitzquihque se tlacatl den tlali Cirene, itoca Simón. Yehhua ohualaya den mila huan yehhua oquimamaltihque in cruz tecuitlapanuihtiu in Jesús.

²⁷Otecuitlapanuiyayahque miyac tlacamen huan sihuamen huan otzahtzihque ica intlocol ica Yehhuatzin.

²⁸Huan Jesús oquinitaloc huan oquiniluiloc: ―Sihuamen den Jerusalén, ahmo xichocacan ica nehhua, tlahmo ica namehhuan huan ica namopiluan.

²⁹Tleca ahsiquiu in tonalten queman quihtosque: “Mapaquican in aquin ahhuel quitasque inconeu, huan in aquin ahyic oquitaque huan ahyic otlachichitihque.”

³⁰Oncan quihtosque in tlacamen: “Matechpechi in tepemen”; huan noyojqui quihtosque: “Matechtlapacho in tlachquilten.”

³¹Tleca tla ijcon quichihuasque ica nehhua in aquin ahmo tlahtlacolyo, tel, ¿quen quichihuasque ica in aquin tlahtlacolyo?

³²Noyojqui oquinuicayayahque inehuan tlahtlacolyohque ic quinmictisque tehuan Jesús.

³³Ihcuac oahsitoque in canin itocahyan Tzontecontla huan ompa otemasohualtihque ipan in cruz. Noyojqui oquinmasohualtihque inehuan in ichtejcamen ipan sehsen cruz. Huan inuan oquintelquetzque in yiyi cruz, se ic teyejcan huan oc se ic oc se lado.

³⁴Huan ihcuac oquinmasohualtihticatcahque, in Jesús omihto: ―Nohueyitahtzin, xiquintlapohpolui tleca ahmo quimatihque tlen quichiuticaten. Huan in soldados omahuiltihque ica in dados ic quixehxelosque in tetlaquen in Jesús, aquin quitlanis.

³⁵In tlacamen huan in tequihuahmen ompa oteitzticatcahque huan teca omahuiltihque ic oquihtohque: ―Oquimaquixti in oc sequinten; axan mamomaquixti isel in tla nele yeh in Cristo, itlapehpenil Dios.

³⁶In soldados noyojqui teca omahuiltihque Yehhuatzin, huan omopachohtayahque temacahque in tlayili chichic.

³⁷Huan oteiluiyayahque: ―Tla tehhuatl in hueyixtoc den judeahtecos, ximomaquixti mosel.

³⁸Huan oquihcuilohque sequin tlahtoli tetzoncuac ica in tlahtoli griegohteco huan romanohteco huan hebreohteco, tlen quihtohua: “Yeh inin in hueyixtoc den judeahtecos.”

³⁹Se de inon ichtejcamen no ompa omasoutoya ihtech in cruz oteiluic: ―Tla tehhuatl Cristo, ximomaquixti huan noyojqui xitechmaquixti.

⁴⁰Huan in oc seya oquixiluic in icompañero: ―Tel, ¿ahmo titemoucaita in Dios? Teh noyojqui ijcon titlapanotica.

⁴¹Tehhuanten matechtlapanoltican tleca tictlaxtlahuasque in tlen melahuac totlahtlacol oticchiuque. Huan inin tlacatl ahmo quichiutoc in tlen ahmo cuali.

⁴²Oncan oteiluic: ―Jesús, xinechilnamiquis huan noca xitlocoya ihcuac ahxihuas tenahuac in tetlatequiutilistzin.

⁴³In Jesús omonanquilic: ―Ic nele nimitziluiya, de axan nohuan tiyes nepa neluicac.

⁴⁴Cana nepantla otlayohuac ipan nochin tlali huan ohuehcau hasta cana yiyi horahtiotlac.

⁴⁵In tonaltzintli otliliu huan in tatapahtli tlen ic quitlahcoxelohtoque in tiopantli otzomon inepanco.

⁴⁶Oncan Jesús otzahtzihuac: ―Nohueyitahtzin, temajco nictemactis notonal. Huan ic omihto inon, omicohuac.

⁴⁷Ihcuac in tlayecanqui oquitac in tlen opanoc, otemahuestili in Dios huan oquihto: ―Ic nele inin tlacatl tlamelajcan.

⁴⁸Nochin tlacatl aquin ompa ocatcahque huan oquitaque tlen opanoc, yehhuan oyahque nochten moyoluitectihue ica intlocol.

⁴⁹Huan nochten in aquin oteixmatiyayahque in Jesús, huan noyojqui in sihuamen aquin otecuitlapanuiyayahque den Galilea, otlachixticatcahque huehca ica tlen opanoc.

⁵⁰Ocatca se tlacatl tlamelajcan itoca José den altepetl Arimatea den tlali Judea. Inon se tequihua den hueyixtoque judeahtecos.

⁵¹Inin José oquichiyayaya in tetlatequiutilistzin Dios huan ahmo omosetili inuan in tequihuahmen ica tlen oquichiuque.

⁵²In José oya quita in Pilato huan oquitlahtlanili in tetlacayo in Jesús.

⁵³Ihcuac oquitemohuihque in tetlacayo ipan in cruz, otepihpiqui ica se hueyi tatapahtli huan otetlalihque ipan in tlaltecochtli tlachihchiutli icxitlan se tepetl canin ayamo aquin omotocatoya.