Sam 65:7-13

⁷Va bulei Goi sari na ovaṉadi rina kolo lamana, meke sa puzakadi rina tovovo, va nosoa Goi sa vinari kakatorai tadi na tinoni.

⁸Sa doduruna sa kasia popoa si magasa hola ni sari na tiṉitoṉa pu evaṉi Goi, meke velavela nia rini pa kinera vinahesi na qinetuqetu.

⁹Va hoqa ia Goi sa ruku pude kopu nia sa kasia popoa meke va masuria. Va siṉi ni kolo Goi sari na ovuku. Ponia linetelete Goi sa pepeso. Gua asa kopu gunia Goi sa pepeso.

¹⁰Va gorea Goi sa luturu koari na ilaka pepeso pu ta gelidi pude va bobosi. Va malohori Goi sari na pepeso koasa ruku remiremisi, meke va toqoli Goi sari na linetelete.

¹¹Va masuria Goi sa vuaheni, ke soku sa pinakepakete pa inuma. Vasina la Goi si koa tugo sa minamutu.

¹²Sari na ilaka duduli si siṉi na rovana sipi, meke doduru tiṉitoṉa si guana tie pu kera qetuqetu pa dia zinama leana koe Tamasa.

¹³Sari doduru vasidi si siṉi na rovana sipi. Sari na lolomo si siṉi na huiti. Kekeṉoṉo gua na tie sapu kera pa qinetuqetu si arini.