Sam 44:17-25

¹⁷Sari doduru tinasuna hire si ta evaṉa koa gami, ba lopu luara panigo gami si Goi, meke lopu va kari pania gami sa Mua vinariva egoi koa gami.

¹⁸Lopu hite etuligo gami si Goi, meke lopu hite sekea gami sa Mua tinarae.

¹⁹Ba ele veko pani gami tu Goi pa varikorapadi rina kurukuru pinomo, meke va opo tamununi gami Goi sa adumuna sa minate!

²⁰Be muliṉi nia gami, sapu Agoi Zihova sina mami Tamasa, babe vahesi gami si kaiqa tamasa votikaedi pule,

²¹ba kote ta gilana mo koa Goi. Ura na gilani Goi sari na binalabala tomedi pa bulomami.

²²Koasa laemu Goi, si tata tava mate nia gami doduru totoso, gua tugo rina sipi si gami pu ta turaṉa va namanama, pude tava mate.

²³Baṉara, Mu tuturei mae harupau! Na vegua ke aqa si Goi? Mu tuturei mae, Mu lopu veko pani gami ninae rane.

²⁴Na vegua ke tome Mua si Goi? Mu lopu muliṉini gami koari mami tinasuna.

²⁵Ele tava hoqa si gami pa pepeso, meke lopu boka turu pule, ele tava kilasa si gami.