1Buyambamtapa, nata kau asinggan gatane butaya wamde yanggak kaknga asinggan taiwit. Siwan asingganu nata wamu yanggaak kaknga teke gatu takngatu dua yanggayakge yakapit. Yanikapa bapuna masa masa aatningga atnatapning.
2Nata yanikapmake gata ninde musip gwaangu asinggan asinggan natanimunggayakge yaniwit. Sike gatane siakan wam taknga tapatekwan binga dua singgakge yaniwit. Ngan, wamu waaknga ena kakaa komda kekeknga yuak binga yuak.
3Gata anzing yakuyak, “Nata aminu tapatu gwa yawa yukut. Siwan pasap wam taknga iat yata kekekakut. Ngan, nata wamu takngatu puya amina Devitde gwa yawa kekekakut.”
4Siwan nata anzing inikum, “Masande aminu gatane dongune nana aatningu kuut kingu dakngake yutning. Sike asingganu gatane dongune nana tapatu tasiwa king dakngake yuwik.”
5Buyambam tapa, angela yekaune yuaingga noma nomana tasikuyakge kau taikaing. Taike ita gatane umanda yatangenakaing. Sike waakwakga kap taknga taikaingu gata siakan wam takngakan tawanggayakge taikaing.
6Dasingge, Buyambam tapa, aminu yekaune tapatu ga binga tapatu wena. Siwan angela kuut unzakan, ga binga tapatu wena.
7Sike angelata paut tasikengu gae akgwaukaing. Siwan angela wa kuupbamda ga takumbasike gae akgwaukaing.
8Buyambam tapa, ga Anutu kekekngaka bamban tapa, aminu tapatu kekeknga buyambamu gata pake yuayak binga wena. Sike ga wamu ayanggayak takngakan asinggan tawanggayak. Ga tapatekwana kaya dua daknganggayak.
9Siwan gata yanggabamu kekekngana kaya gwenu kayuak. Sike sambuita enawanu gata yawi kuma siknga yuak.
10Gata Isip nana amindane kekekngana kuupbam gwa zipbuke pasiwi maiking. Siwan gikane kekeknga aknganeta iwanda gwa yapbike yanikwasiwi datakuking.
11Sike yekapat gatu kepdakaat ngangu gikanekan. Gata kepdaka tasike sangabamu undang yuaing kaya pasike pekuyak.
12Siwan gatakan keu kuupbam pasike tekuyak. Tawanu Tabor dakaat gatu Hermon dakaat ngang aminda taikaing binga umandae apbakngake gae kap taikamayak.
13Gatane kekekngaka buyambam siknga. Kekekngaka inata siknga kundu yuak.
14Gata king kapa yuke aminu kuupbam noman takngane kayuwayak. Sike aminu wam yot gwene usanzikgayak kaya noman gan tasinggayak. Gata amin kuupbamde take natayamuke wamu ayanggayak takngakan asinggan tawake ga tapatekwan ba dua singgayak.
15Sike aminbamda umanda yatangenakaingu apbaknganing. Aminbamda gae wesim kuke sukukaingu wa unzing kakaa akngane sukukaing. Siwan waaminda apbaknganing.
16Sike waaminu umanda kopsa akngae kwakngaom gatu zikaane ngangu apbakngake yatangenakaing. Ngan, gata puya noman nomana akngakan ie tasinggayakge kan natanggamatake apbakngakaing.
17Dasingge, gata ninu kekekanimi umaninda kopsa aknga siwan ninda asiknga bakngakamang. Ngan, gata musip kwikwik natanimuke gatanimuwawi ninda kekekake amak kaknga yapikamang.
18Siakan. Gata gika nindane kuyanin yuak kapa yawi yuak. Ngan, ga ninu Isrel amindane Anutunin, gata king kapa ninde nimunangge yawi yuak.
19Tupa siknga gata mia takngatu puya aminda sikngae yamukuyak. Yamuke anzing yanikuyak, “Nata amak aminu tupan sikngaapa gwa yawa yukut. Siwan nata kinggane kupna gwapakngine gwapungamukum. Nata aminbamde banakan take waapa tewa king kapa yuak.
20Ngan, nata Deviu king kapa dakngawikge wel gwapakngane tukwamba gindane king kapasa dakngakut. Natane puya amin tapanan.
21Unzingge natane kekekngana iat gatake asinggan yuwik. Sike nata kekekangama kekeknga yuwik.
22Sike iwanata amak tasike i yapbitnanga dua. Aho, wai aminda dua tasiwa maiwik.
23Siwan nata itane iwana yainggamumbit. Ngan, aminu waakwau ie apbitaningu atzipa kumning.
24Sike ie nata take natangamuke iat gatake asinggan yutzim. Sike kaawa iat iwanaat amak tasiwan kakengu nata tasiwa iwana ayapbimbik.
25Siwan kepna imiu yanggabamu Mediterenian gweneta kuku yangga buyambam tapatu Yufretis ngang inikaingune sandewik.
26Sike ita nae naninggamatake anzing yawik, ‘Ga natane nana. Siwan natane Buyambam tapana. Gata nae kakuya tasike asinggan gatangamunggayak,’ ngang yawik.
27Siwana nata yawa waaknga tupan tapa dakngake kingu kepna kepna yuaingu kuupbam yapbimbik.
28Sike nata ie take siknga asinggan natangamit. Siwana nata pasap wamu takngatu ie tasiwa pasap taknga nit katang asinggan asinggan yuwik.
29Ngan, aminu itane dongane nana tapatuta kingu asinggan dakngawik. Siwan itane dongane nana kingu waapata Isrel nana aminu asinggan kayuwik. Unzing sanga ena kakaa komune yuaingu asinggan yuaing binga.
30Siwan ngana itane bapuna masan aatningga natane mama wama ayama sandeke,
31natane noman taknga dua ba tawaning, ba natane wamae masa imuke mama wama dua ba tawaning.
32Ayok! Nata wai aknganae natapa kuwan nata meya yake yamit. Siwan nata gutongana tasikaingge natake atzipmake toknga yamit.
33Siwan ngana tapduu waomune Devitde dongge take siknga natangamit, tendeknga wena. Sike natanu i dua teke, wamu ie yawa kekekakut taknga dua tewit.
34Sike nata pasap wam taknga iat tasikumau dua zipbuwit. Siwan tapatekwan wamu takngatu wamaatangu genaneta dua yawit.
35Na Anutu noman takngakan tasinggat tapanin. Na waakngae natapa siwan wamu waaknga yawa kekekakut. Nata sipdukan yawa wamu waaknga asinggan asinggan yuwik. Wamu kekeknga waaknga anzing, nata Deviu kemu dua iniwit.
36Sike wamu inikumu itane bapuna wena dua sining. Waakwau asinggan yutning. Siwan gunzitda yuak binga itane dongata aminbamdane tupan tapaapa dakngake komdubam siknga unzing kayutning.
37Sike waakwaau asinggan yutning. Unzing yakau kakaa nimunggakga aminbam yeuyaman natane wama siakan gan siwikgen siking.”
38Siwan ngana apmanu kingu gika yawi yukut tapae kaanga natangamunggayak. Kaanga natangamuke gata i gwa teke masa imunggayak.
39Sike wamu takngatu puya amindaat yawat kekekakut taknga gwa sandekgayak. Sandeke kinggane kup daka gwapungamukuyau gwa sandeke kepdakane mumbi wasap sikut.
40Gata itane damanu yotbam gapmae tasibasikuu gwa zipbuke yotna kekeknga gwegwenu apasiwi maiking.
41Sike aminbamde wagwak saak kuke sangana kakengu kukwae apakaingunin. Kukwae pake notna iat wesim yuaingga sapdut wamu inikaing.
42Ngan, gata itane iwana akapewi amak tasike ayapbiking. Siwan gata pasiwi musip gwaang natapbing.
43Gata tasiwi itane amak amina dua kekekake ambing. Siwan amak tasikaing ngana gata dua gatangami tiuukake apimakut.
44Gata umana kopsa king ngang iniking kaknga sandewi umana waaknga gatu dua yuak. Dua yuke aminu gatu dua kayuak.
45Gata tasiwi aminuake zet siknga siwan maaknga buyambam takngata usukwatapbut.
46Buyambam tapa, ga ninde tape mamayasim kusopuya? Ba asinggan? Gatane musiptok taknga katap gwen binga tokngaake tapduknga dasing yuwik?
47Buyambam tapa, butaya gata ninu tapduu dapaknga yuamang aminde natapso. Gata ninu tumukuyak. Siwan ngana ninu kuupbam akungwake asopunim.
48Maminda asinggan asinggan yuke dua kupik? Maminda kekeknga yuke aminda kupan kwaipeaing komune dua kuwik? Unzing binga aminu tapatu wena. Wena siknga.
49Buyambam tapa, sike dasing? Apmanu ninde take dua nataayak ba? Sike wamu kundu na Devitde musipba kwikwiknga asinggan natangamiyakge yawi kekekakuu dasing?
50Buyambam tapa, gata na puya amin tapakae natanggamatayo. Aminda nae sapdut wam nanikaing. Sike na waiaknga aknga katum aminu kunduta nanikaingunin gwaamuke yuat.
51Buyambam tapa, gata na king kapa dakngake yuwitde napmakuyak. Siwan ngana natane iwanata nae wamu waiaknga aknga nanikaing. Sike keu kuupbam nata kunggat komune wamu waiaknga aknga atnanikaing.
52Ninda Buyambam tapatane umana asinggan asinggan yatangenatnim.
